Read Sangir YEHEZKIEL 43 Bible Online

YEHEZKIEL 43 - Sangir bible

YEHEZKIEL 43

¹Bọu ene tau esẹ ene nẹ̌bawa si siạ sarang tukadu pasěllangeng tụtatěngo sěmběkan daki;

² dingangu sene e kinasiloku piạ tualagẹ̌ kimerong narěnta wọu sěmběkan daki, kụ měnẹ̌nialan darěntaʼn Duatang Israel. Tingihu Ruata e kinaringihẹ̌ kere gal᷊ědụ u taghal᷊oang, dingangu wanua e měngkate matualagẹ̌ ual᷊ingu tualagu rarěntan Duata.

³Papasilo ene mẹ̌sul᷊ungu kere takụ nikasilo piạ Duata e riměnta waugu mapakagholọ u Yerusalem, dingangu mẹ̌sul᷊ungu kere nạung takụ kinasilo su Sal᷊ụ u Kebar. Bọu e iạ nẹ̌těngkasumagẹ̌ dingangu němul᷊angeng.

⁴Tualagẹ̌ makạl᷊angị ene e nẹ̌kakanoạ limiung pasěllangenge sěmběkan daki wọu ene simuẹ̌ sarang dal᷊ungu Wal᷊eng MAWU.

⁵Rohkẹ̌ u MAWU e něhengkẹ u iạ dingangu nẹ̌bawa si siạ sarang dělahẹ̌ batuhu ral᷊unge; kụ sene kinasiloku Wal᷊em MAWU nilikutangu tualagu rarěntaʼm MAWU.

⁶Piạ e tau esẹ ene wědang dụdarisị su sěndihangku, takụ kinaringihẹ̌ MAWU nẹ̌bera si siạ bọu ral᷊ungu Wal᷊em MAWU, angkuěngʼE,

⁷”Ei taumata tawe kakalẹ̌, ini e kal᷊aianeng-Ku. Seng sini e Iạ sarung matanạ su tal᷊oarang umatʼu Israel dingangu mẹ̌parenta si sire sarang karěngụ e. Baewe i sire, arau lai manga ratun sire, tawe lai sarung makal᷊amuhụ areng-Ku susi e ringangu měněmba mahan duata arau ual᷊ingu mělěbing kasuangu[90] manga ratun sire su tampạ ini.

⁸Kal᷊imona manga ratun sire e nẹ̌koạ manga balaku wowon tukadẹ̌ dingangu manga rihin tukadu istanan sire su sěndihangu manga balaku wowon tukadẹ̌, dingangu manga rihin tukadu Wal᷊e-Ku, hakịu kětạeng piạ darěndung sěmbaụ samatang su tal᷊oarane. I sire seng nakal᷊amuhụ areng-Ku kụ susi, ringangu kakanoạ i sire e kụ nakararěnting. Ual᷊ingu ene Takụ ipakawinasa i sire su ral᷊ungu ral᷊angehẹ̌-Ku.

⁹Kaiso měnětạ bọu orasẹ̌ ini i sire harusẹ̌ pěngědo měněmba mahan duata ringangu měngal᷊ing kasuangu[91] manga ratun sire. Bọu ene, Iạ sarung matanạ su tal᷊oaran sire sarang marěngụ-děngụ.”

¹⁰Bọu e MAWU něhengetang kapia, ”Ei taumata kụ tawe kakalẹ̌, paul᷊ịko su umatʼu Israel mạanum Bal᷊e-Ku ini, ringangu oroko i sire pěnitị ol᷊ange. Apakameako i sire ual᷊ingu kal᷊awọu rosan sire.

¹¹Kụ sarětạeng i sire namea ual᷊ingu manga kakanoạ i sire e, ute pěnualagẹ̌kong umbuʼm Bal᷊e-Ku ini e si sire: modelẹ̌ e, apan tukadu sasuěkang dingangu sasěbangenge, hundugu wal᷊ene, kal᷊awọu atorange ringangu manga tiahane. Bohẹko kěbị ene waugʼi sire tadeạu i sire makasilo ringangu makapěnitị gampang atoru kěbị e, ore tumuhụ kěbị atorange.

¹²Seng ini e kakoạ e tani wọu Wal᷊em MAWU: Kal᷊awọu wanua mạngělikụ e su wongkoʼm bul᷊ude e kai enẹ e susi.”

¹³ Seng ini e ukurangu pananěmbaěng tuhụ ukurang kụ nipakẹ baugu ipěngukurẹ̌ Bal᷊eʼm MAWU. Mangělikụ manga ral᷊aedu pananěmbaěnge kai piạ songe sěmbua kụ dal᷊unge sitengaʼm meterẹ̌ dingangu wěnahe mal᷊ain sitengaʼm meterẹ̌, dingangu wawiwihe watuhu l᷊ikude karangẹ u sěmeterẹ̌ pahiạ ěpạ.

¹⁴Bọu songe sarang běhị u pananěmbaěng kasanakenge, rangẹ e sěmeterẹ̌. Batuhu tal᷊oarane rangẹ e rua meterẹ̌, dingangu sitengaʼm meterẹ̌ limembong kahepọ e wọu guwạu ral᷊aedu pananěmbaěng. Bahageang katěllune ute tampạu pěnanutungang gaghěllị, kụ kai pusigu pananěmbaěng, mal᷊aing sitengaʼm meterẹ̌ limembong kahepọ e wọu guwạu wahageang tal᷊oarane.

¹⁵Bahageang katěllune ini ute tampạu pěnanutungang gaghěllị, dangẹ e rua meterẹ̌. Su wukune ěpạ piạ bahageange kụ timiol᷊ẹ̌ kere sunge.

¹⁶Pusigu pananěmbaěng ene nẹ̌buku ěpạ; apan sěndihange ukurange ěnnungu meterẹ̌.

¹⁷Tal᷊oarane mal᷊aing nẹ̌buku ěpạ, apan sěndihange ukurange pitu meterẹ̌, dingangu piạ bawiwihe sěmbaụ su l᷊ikude, rangẹ e sěngkapahiakeng ěpạ su metere. (Běnahu songene sitengaʼm meterẹ̌.) Su sěndihange sěmběkan daki piạ tukadẹ̌ kụ kaawikang sarang bowom pananěmbaěng.

¹⁸ MAWU Kụ Limembong Karangetange něhengetang si siạ, ”Ei taumata wal᷊ine kakalẹ̌, daringihẹ̌ko apang kụ Takụ iwera si kau. Kereu pananěmbaěng ene e masuem pětị e, i kau e harusẹ̌ mapakaghuantingu ene ringangu měnutung gaghěllị su wowone ringangu pěsikang rahang sasěmba ene.

¹⁹Kětạeng imang hěnton Zadok bọu ghal᷊ipohong Lewi e samatang, kụ botonge makakarěnta su těngo-Ku waugu měndal᷊engu pẹ̌kakal᷊iomaneng. Iạ e MAWU Kụ Limembong Karangetange kụ mẹ̌pẹ̌parentang hal᷊ẹ̌ ene. Pẹ̌gěllịko si sire sapi esẹ kawuhuang sěmbaụ gunan sasěmba kal᷊aampungu rosa.

²⁰Pěngal᷊ạko rahane kadodọ kụ buhako su manga sunge su wukune ěpạ bọu pusigu pananěmbaěng ene, kerene lai su manga wukune wahageang tal᷊oarane mạngělikụ biwihu pananěmbaěng ene. Dingangu mẹ̌koạ kerene e i kau e mapakasusing piněnutungang sasěmba ene ringangu napakataning ene waugu Iạ.

²¹Mase, pěngal᷊ạko sapi esẹ baugu tatubusẹ̌ dosa e, ringangu tutungko su tampạ kụ seng nitantu, kụ su l᷊ikudu tampạ susi Wal᷊em MAWU.

²²Sěngkarịěllone i kau e harusẹ̌ měněmbang kambing esẹ sěmbaụ kụ tawẹ turạ e waugu sasěmbang ampungu rosa. Pakasusiko pananěmbaěng ene ringangu rahang kambing ene, mẹ̌sul᷊ungu kere nikoạ u su sapi esẹ kawuhuang ene.

²³Kereu seng nasueng koạ e karạ u, pěngal᷊ạko sapi esẹ kawuhuang ene e sěmbaụ dingangu kambing esẹ kawuhuang sěmbaụ, kụ i rẹ̌dua e tawẹ turạ e,

²⁴bọu e wawako ramahi sarang anu-Ku. Manga imang harusẹ̌ měnawuhu asing su wowom binatang darua ene dingangu manutung makoạ sasěmba si Siạ.

²⁵Apang kal᷊aěllo karěngụ u pitu ěllo e, i kau harusẹ̌ pěněmbang kambing sěmbaụ, sapi esẹ kawuhuang, dingangu kambing esẹ baugu sasěmba ampungu rosa. Manga binatang ene tawe wotonge piạ turạ e.

²⁶Pitu ěllo karěngụ e manga imang harusẹ̌ mẹ̌koạ munarang pěnggaghuanting pananěmbaěng ene ringangu měndiahing ene mědeạu wotonge paketang.

²⁷Samuring pitu ěllo ene masue, manga imang hinong měnětạ měnarakangu sasěmba su wowong pananěmbaěng ene sasěmba tẹ̌tutungang dingangu sasěmbam pẹ̌darame waugu umatẹ̌. Tangú Iạ e sarung mal᷊uasẹ̌ dingang i kamene kěbị. Iạ e MAWU Kụ Limembong Karangetange seng nẹ̌bisara.”