Read Sangir YEHEZKIEL 44 Bible Online

YEHEZKIEL 44 - Sangir bible

YEHEZKIEL 44

¹Bọu ene tau esẹ ene saụ něngahạ si siạ sarang pasěllangeng su l᷊ikude su sěmběkan daki wọu Wal᷊eʼm MAWU nengelikụ. Pasěllangeng ene e mal᷊ahěping,

²MAWU e něhengetang si siạ, ”Pasěllangeng ini harusẹ̌ těbe kạl᷊ahěping dingangu tawe wotonge topeěng. Tawẹ u sarang botonge makakasuẹ̌, batụu Iạ, MAWU Ruatang Israel, seng sumuẹ̌ su Wal᷊e-Ku lumiung pasěllangeng ini. Kụ pasěllangeng ini e harusẹ̌ těbe kạl᷊ahěping.

³Kaiso měngangawasa kụ mẹ̌pẹ̌parenta e wotonge makoạ sarang pasěllangeng ene waugu kumaěng kaěng susi su těngo-Ku. I sie harusẹ̌ sumuẹ̌ bọu huange ghěguwạ dingangu mẹ̌bal᷊ị bọu ral᷊eng ene lai.”

⁴Bọu ene tau esẹ ene nẹ̌bawa si siạ sarang pasěllangenge su sěmběkan sawěnahẹ̌ kụ mẹ̌tẹ̌těngong Bal᷊eʼm MAWU. Iạ e tụtatingang, dingangu iạ nakasilo Wal᷊eʼm MAWU nilikutangu tualagẹ̌ mahamagẹ̌ tatialan darěntaʼm MAWU. Bọu e iạ nẹ̌těngkasumagu watangeng dingangu němul᷊angeng,

⁵kụ MAWU e něhengetang si siạ, ”Ei taumata wal᷊ine kakalẹ̌, tatingangko pakapia apa kinasilonu ringangu apa nikaringihu. Iạ e sarung maul᷊ị si kau kal᷊awọu atorange ringangu toratu mạanum Bal᷊e-Ku ini. Bohẹko pakapia i sai-saing kụ ipakawala sumuẹ̌ su Wal᷊e-Ku ringangu i sai-sai kụ isẹ̌sěding.

⁶Pẹ̌berako su umatu Israel kụ puluang lumawang ene u Iạ e, MAWU Kụ Limembong Karangetange, tawe lai mapulu mapakawalan sire e mẹ̌koạ lamuhụ.

⁷I sire e seng nakal᷊amuhụ Bal᷊e-Ku, u těntal᷊ang tawane ringangu raham binatang sasěmba si Siạ, i sire e mapakawala sumuẹ̌ sarang dal᷊unge taumata raghị kụ tawe nisunatẹ̌, dingangu apan tawe tumatuhụ si Siạ. Dingangu manga kakanoạ i sire kụ makạděnting ene, i sire seng nělanda riandi-Ku e ringang i sire.

⁸Wal᷊inewe i sire hala kụ nẹ̌koạ manga tundung agama kụ masasusi e su ral᷊ungu Wal᷊e-Ku, kaiso taumata raghị kụ nioron sire waugu mẹ̌koạ ene.

⁹Iạ e, MAWU Kụ Limembong Karangetange, něhabarẹ̌ u taumata raghị kụ tawe nisunatẹ̌ dingangu taumata kụ tawe tumatuhụ si Siạ e, tawe ipakawala sumuẹ̌ su Wal᷊e-Ku. Ene e mihino l᷊ai su taumata raghị kụ matanạ tatapẹ̌ su tal᷊oaran tau Israel.”

¹⁰MAWU e něhengetang si siạ, ”Iạ e sarung měhukung tau Lewi kụ sěngkahukung dingangu tau Israel bal᷊ine, seng něněntangu Iạ dingangu něněmba mahan duata.

¹¹Su ral᷊ungu Wal᷊e-Ku, i sire kětạeng botonge mẹ̌tangkiang si Siạ kere měmamunara ringangu měndariagạ pasěllangeng. I sire wotonge měmotọ manga binatang baugu sasěmba tẹ̌tutungang dingangu sasěmba, ringangu i sire e wotongewe sěntiniạ mẹ̌tangkiang umatẹ̌.

¹²Kaiso ual᷊ingu i sire seng nẹ̌koạ tundung pěnaněmba mahan duata waugu tau Israel, dingangu ual᷊ingu ral᷊enge ini e měnuhudu wansa ene su ral᷊ungu rosa, tangú Iạ, MAWU Kụ Limembong Karangetange, mẹ̌salu u i sire e hinong ihukung.

¹³I sire e tawe wotonge relaing mẹ̌tangkiang si Siạ kere sěngkatau imang arau měnggehě apang kụ susi waugu Iạ, arau makakasuẹ̌ su tampạ Kụ Limembong Kasusiange. Kai ene e hukumang baugu kal᷊awọu kakanoạ mal᷊amuhụ kụ seng nikoạ i sire.

¹⁴Ini e i sire Takụ ipěmunara waugu pẹ̌koạ hal᷊ẹ̌ kasarẹ̌ kụ hinong ikoạ su Wal᷊e-Ku.”

¹⁵MAWU Kụ Limembong Karangetange nẹ̌bera, ”Su tempong tau Israel něněntangu Iạ, manga imang tau Lewi wọu hěnton Zadok těbe satia mẹ̌tangkiang si Siạ su Wal᷊e-Ku. Ual᷊ingu ene, seng i sire e orasẹ̌ ini harusẹ̌ mẹ̌tangkiang si Siạ dingangu ruměnta su těngo-Ku waugu maněmban tawa ringangu raha wọu manga sasěmba e.

¹⁶Kětạeng i sire hala kụ botonge sumuẹ̌ su Wal᷊e-Ku, mẹ̌tangkiang si Siạ su pananěmbaěng-Ku, ringangu měngahạ pẹ̌kakal᷊iomaneng su Wal᷊e-Ku.

¹⁷ Su tempong i sire sụsuẹ̌ tukadu pasěllangeng mẹ̌tẹ̌timona rělahẹ̌ batuhu ral᷊unge, i sire e harusẹ̌ mẹ̌pakẹ u pakeange leneng. Tawe wotonge i sire e mẹ̌pakẹu pakeang bọu wolẹ̌ mạengu kạpěhal᷊ẹ̌ e su rělahẹ̌ batuhu ral᷊unge, arau su ral᷊ungu Wal᷊e-Ku.

¹⁸Tadeạu tawe kapědisang dingangu liaghaěng, i sire harusẹ̌ měluheng sal᷊ana leneng tawẹ papehẹ e, ringangu tawẹ laikị těmbọ e wọu leneng.

¹⁹ Mạengu i sire tamai sarang dělahẹ̌ su l᷊ikude, su apang umatẹ̌ e mẹ̌tampung, manga imang ene e harusẹ̌ měluạ pakeangu hal᷊ẹ̌ i sire su ral᷊ungu manga kamarẹ̌ susi su Wal᷊e-Ku, wọu ene měluheng pakeang bal᷊ine, tadeạu pakeang tani e tawe makasilakạ umatẹ̌.[92]

²⁰ Manga imang tawe wotonge měngul᷊ụ těmbọ i sire, arau mapakawalang utạ e mẹ̌sambulungang. Utạ ene harusẹ̌ potokang pakanimbụ tuhụ atore kụ seng nitantu.

²¹ I sire e tawe wotonge měnginung anggorẹ̌ kereu mapulu sumuẹ̌ su rělahẹ̌ batuhu ral᷊unge.

²² Manga imang kětạeng botonge mapẹ̌kawingu manga mahualang Israel ku bědang parawang arau sěngkatau wal᷊ung imang. I sire tawe wotonge mẹ̌kawingu wawine kụ nisindoěng.

²³ Manga imang e harusẹ̌ měněntiro su umatẹ̌-Ku waugu mapẹ̌dal᷊ahaedu sude nitani waugu Iạ dingangu sude tala, sude wurěsi tuhụ agama, ringangu sude mal᷊amuhụ.

²⁴Kereu suměpụ pẹ̌dararendehu pěrkarang toratẹ̌ e, i sire e harusẹ̌ i urusẹ̌ tuhụewe manga tita-Ku. I sire e hinong měmantugẹ̌ manga sal᷊imbang u agama, tuhụ atorang dingangkeweng manga tita-Ku, ringangu měngadatẹ̌ Sabatẹ̌ e al᷊ingkai ěllo tani waugu Iạ e.

²⁵ Sěngkatau imang tawe wotonge mapakal᷊amuhụ u watangeng ual᷊ingu něnenggehẹ̌ kasuang, tabeạu katewe maietu ghaghurange, anạ e, mahuanene arau wawinene kụ apam ta někẹ̌kawing.

²⁶Sarětạeng i sie nawurẹ̌si kapia, i sie harusẹ̌ měngampal᷊ẹ̌ lai sěngkamisa,

²⁷wọu ene sumuẹ̌ sarang dělahu Wal᷊e-Ku, dingangu měnarakangu sasěmba waugu měmurěsi watangenge tadeạu i sie wotonge měmunara kapia su Wal᷊e-Ku. Iạ MAWU Kụ Limembong Karangetange seng nẹ̌bisara.

²⁸ Manga imang něnarimạ u pangkatu imang ene e kai kere wuạ i sire e wọu apan Takụ nionggọ su Israel hěnto mẹ̌bẹ̌bawěllasẹ̌. I sire tawe wotonge měnaghuang apa-apa su Israel: Kai Iạ e arětạ i sire.

²⁹ I sire e harusẹ̌ mẹ̌biahẹ̌ bọu sasěmba gandung, sasěmba laěmụ dosa, dingangu sasěmba laaweng dugi; bọu kal᷊awọu sabarang kụ seng nitani waugu Iạ, hinong ionggọ si sire.

³⁰Manga imang harusẹ̌ gěllikang buạ i sire kapiaěnge wọu kal᷊awọu haghing gěsiʼm pěnsạ kahumotongange, ringangu walạewe wọu apa nisěmba si Siạ. Masaun sul᷊ene tau Israel mẹ̌koạ borotẹ̌, tangú borotẹ̌ humotong ute kai waugu manga imang. Tangú Iạ sarung mẹ̌ngal᷊amatẹ̌ manga wal᷊en tau Israel.

³¹ Manụ u winalangeng dingangu manga binatang bal᷊ine e kụ mate sẹ̌sane, arau těmboěngu binatang dul᷊u, tawe wotonge kinasengu manga imang.”