Read Sangir YEHEZKIEL 45 Bible Online

YEHEZKIEL 45 - Sangir bible

YEHEZKIEL 45

¹Kal᷊imonang ěntana ene nipẹ̌papahiạ baugu makoạ ěntana pusakạ baugu apang ghal᷊ipoho, harusẹ̌ ihae sěmbahageang baugu MAWU. Ěntana ene nandụ e hinong mapul᷊o dua sitenga su kilo metere, ringangu wěnahe mapul᷊o su kilo metere.[93] Kasěllahu wanua ene ute kai tampạ susi.

²Baugu Wal᷊eʼm MAWU e nisadia wọu ěntana ene sěmbahageang kụ nẹ̌buku ěpạ, ukurange rua hasụ limam pul᷊o su metere apang biwihe, ringangu nilikutangu rělahe wěnahe ruam pul᷊o lima meterẹ̌ dingangu sene e harusẹ̌ pěmětikang Bal᷊eʼm MAWU.

³Sěmběka wọu ěntana ene, nandune mapul᷊o dua sitenga su kilo metere, ringangu wěnahe limang kilo meterẹ̌ harusẹ̌ diahiang baugu měmangung Bal᷊eʼm MAWU, kụ tampạ ene tampạ kasusiange.

⁴Ěntana ene susi; ringangu nisadia waugu manga imang kụ piạ hal᷊ẹ̌ e mẹ̌kẹ̌koạ pẹ̌kakal᷊iomaneng su Wal᷊eʼm MAWU. Sěmbahageang bọu ěntana ene sarung makoạ tampạ u pẹ̌koateng bal᷊en sire, dingangu sěmbahageang lai e waugu Wal᷊eʼm MAWU.

⁵Sěmběka l᷊ai wọu ěntana ene kạguwạe mapul᷊o dua sitenga su kilo metere kaliangu limang kilo meterẹ̌ harusẹ̌ diahiang baugu tau Lewi kụ mělẹ̌hal᷊ẹ̌ su ral᷊ungu Wal᷊eʼm MAWU. Sene sarung pěndarisikangu manga soa su apang botonge katanakeng i sire.[94]

⁶Su l᷊iung ěntana kụ susi ene e, harusẹ̌ ihae ěntana sěmpalang nandụ e mapul᷊o dua sitenga su kilo metere ringangu wěnahe dua sitenga su kilo metere, baugu soa sěmbaụ kụ botonge pẹ̌tanakeng i sai-sai kụ bọu wansang Israel.

⁷Baugu měngangawasa kụ mẹ̌pẹ̌parenta e harusẹ̌ lai riahiangu ěntana. Ěntana ene nawatedẹ̌ bọu pẹ̌saraěnge su sěmběkaʼm bahẹ, banua kụ nitani waugu MAWU ene, sarang Laudẹ̌ Tal᷊oara, dingangu wọu pẹ̌saraěnge su sěmběkan daki wanua kụ nihae ene, sarang pẹ̌saraěnge su sěmběkan daki wọu soa ene. Kụ nandune mẹ̌sul᷊ung kanandụ u sěmbahageang bọu ěntana kụ nionggọ su manga ghal᷊ipohong Israel.

⁸Ěntana ene nakoạ tataghuanengu měngangawasa kụ mẹ̌pẹ̌parenta su Israel, tadeạu i sie tawe měnědạ umatẹ̌-Ku e lai kaiso měngonggọu wanua kụ lěmbene ene e makoạ tataghuanengu manga ghal᷊ipohong Israel.

⁹MAWU Kụ Limembong Karangetange něhengetang, ”Seng kapapiane manga rosanu, ei apang mangangawasa Israel! Ědọ e pẹ̌kakakoạ u matatingkaị e kụ kawe měngẹ̌ngěpisẹ̌ apang kawanua ene. Pẹ̌koạ e apang kụ nihino ringangu adilẹ̌ e. Mambeng kumbahang-bahang delaing i kamene měnokol᷊u umatẹ̌-Ku wọu ěntanan sire e. Iạ e MAWU Kụ Limembong Karangetange nẹ̌parentang ene e si kamene.

¹⁰ Pẹ̌pakẹ en timbangeng dingangu sasupane kahěngang:

¹¹Sěng efa waugu ipěnupa apal᷊iwụ mamara kụ hinoʼm mẹ̌sul᷊ung lohone ringangu sěm batẹ̌ baugu ipěnupa apal᷊iwụ maral᷊egẹ. Ukurange ute harusẹ̌ sěng homer. Kụ manga sasupa ene e harusẹ̌ kirini: Sěng homer = 10 efa = 10 bat.[95]

¹²Timbangengu e harusẹ̌ kirini: Sěng syikal = 20 gera[96] Sěng mina = 60 syikal.

¹³Ini e wal᷊ang ukurang baugu měnantung manga sasěmba: gandung: 1/60 wahageange wọu l᷊ěnạu pěnsạu jamawut: 1/60 wahageange wọu l᷊ěnạu pěnsạu lanan zaitun: 1/100 wahageange wọu wuang manga kakaluang. (Ukurẹ̌ko tuhụ bat: 10 bat = 1 homer = 1 kor) domba: domba sěmbaụ bọu apang 200 su waụ e. I kamene harusẹ̌ mẹ̌gěllịu sasěmba gandung, sasěmba tẹ̌tutungang, dingangu sasěmbaʼm pẹ̌darame, tadeạu apan dosanu e ampungang. Iạ e MAWU Limembong Karangetange kụ něngonggọu parenta waugu ene.

¹⁶Kal᷊awọu tumanạu wanua e harusẹ̌ pẹ̌bawa[97] manga sasěmba ene su měngangawasa kụ mẹ̌pẹ̌parenta su Israel.

¹⁷Seng i sie e hinong měmělli binatang baugu sasěmba tẹ̌tutungang dingangu manga kakoạ e waugu sasěmba gandung dingangu sasěmba anggorẹ̌ baugu patikụ bansang Israel su manga ěllo masasěllahẹ̌, Pěmamantugu Wul᷊ang Buhu, manga ěllon Sabatẹ̌ dingangu mangạewe ěllo ghaghuwạ bal᷊ine. I sie harusẹ̌ měndiahing sasěmba ampungu rosa, sasěmba gandung, sasěmba tẹ̌tutungang, dingangu sasěmbaʼm pẹ̌darame waugu mẹ̌dorong kal᷊aampung baugu tau Israel.”

¹⁸MAWU Kasěllahenge nẹ̌bera su manga umatʼE, ”Su tanggalẹ̌ humotong bul᷊ang humotong, i kamene harusẹ̌ pěnusi Wal᷊e-Ku kụ pěněmban sapi esẹ kawuhuang sěmbaụ kụ tawẹ turạ e.

¹⁹Imang e harusẹ̌ pěngal᷊ạ daha wọu sasěmba ampungu rosa ene, wọu ene pěmuhang ene su manga rihing tukadẹ̌ su Wal᷊e-Ku, kerene lai su manga wukuʼm pananěmbaěng ěpạ e, ringangu su manga rihiʼn tukadu pasěllangeng kụ mẹ̌timona rělahe watuhu ral᷊unge.

²⁰Pẹ̌koạko lai kerene su tanggalẹ̌ pitu su wul᷊ang ene, waugu apan taumata kụ seng nẹ̌dosa ringangu tawe pinẹ̌tatudẹ arau ual᷊ingu wěga wue. Kụ dingangu kakoạ e kerene i kamene sarung měndiagạ kasusing Bal᷊e-Ku.

²¹ Su tanggalẹ̌ mapul᷊o ěpạ wul᷊ang humotong, i kamene harusẹ̌ měmantugẹ̌ Sal᷊iwangu Paskah. Pitu ěllo karěngụ e kěbị taumata harusẹ̌ kumaěng borotẹ̌ kụ tawẹ kabọ e.

²²Su ěllo humotong, měngangawasa kụ mẹ̌pẹ̌parenta e harusẹ̌ pěněmbang sapi esẹ baugu sasěmbang ampungu rosa waugu watangenge ringangu waugu kal᷊awọu kawanua.

²³Karěngụu pěmamantugẹ̌ e nikoạ sěngkamisa ene e, apang ěllo i sie e harusẹ̌ maněmbang sapi esẹ pitum baụ dingangu domba esẹ pitum baụ kụ tawẹ turạ e su MAWU, kụ bọu ene mẹ̌tongkạ u ene tinalung. Apang kal᷊aěllo i sie lai harusẹ̌ maněmbang kambing esẹ sěmbaụ baugu sasěmbang ampungu rosa.

²⁴Su l᷊iung ene, harusẹ̌ pěněmbang gandung kal᷊awọe mapul᷊o pitu sitenga su litere baugu apan sapi esẹ ringangu těllun literẹ̌ lanan zaitun baugu apang domba esẹ.

²⁵ Su Sal᷊iwangu Sělon Daukalu, kụ nitětạ su tanggalẹ̌ mapul᷊o l᷊ima wul᷊ang kapitune, apang kal᷊aěllo karěngụ u sěngkamisa měngangawasa e harusẹ̌ měněmbang manga sasěmba kụ mẹ̌sul᷊ung, kụ kai sasěmbang ampungu rosa, sasěmba tẹ̌tongkateng, dingangu sasěmba gandung ore lai lanan zaitun.”