Read Sangir YEHEZKIEL 46 Bible Online

YEHEZKIEL 46 - Sangir bible

YEHEZKIEL 46

¹MAWU Kụ Limembong Karangetange něhengetang, ”Tukadu pasěllangeng sěmběkan dakị e kụ mẹ̌tẹ̌timona rělahẹ̌ batuhu ral᷊unge harusẹ̌ těbe kạl᷊ahěping karěngụ u kaěnnungu ěllom pělahal᷊ẹ̌. Pasěllangeng ene e kětạeng botonge topeěng su ěllon Sabatẹ̌ dingangu Pěmamantugu Wul᷊ang Buhu.

²Su apang ěllo ene mangangawasa e harusẹ̌ sumuẹ̌ bọu rělahe watuhu l᷊ikude lumiung huange ghẹ̌guwạ bọu e rumarisị su sěndihang u rihing pasěllangeng, těntal᷊ang manga imang měnarakang u sasěmba tẹ̌tongkateng dingangu sasěmba pẹ̌darame wọu měngangawasa. Su tukadu pasěllangeng ene i sie harusẹ̌ mẹ̌tumpěkuhẹ̌ kụ měněmba MAWU, wọu ene měmeho. Mase sarang mahěbi sasuěkang ene e tawe wotonge hěpingang.

³Su těngom pasěllangeng ene e lai, kal᷊awọu kawanua e harusẹ̌ mẹ̌tumpěkuhẹ̌ kụ měněmba MAWU apang ěllon Sabatẹ̌ dingangu Pěmamantugu Wul᷊ang Buhu.

⁴Su ěllon Sabatẹ̌ měngangawasa e harusẹ̌ měnarakangu sasěmba su MAWU sasěmba tẹ̌tongkateng kụ anạ u domba ěnnungu waụ dingangu domba esẹ sěmbaụ kụ kěbị e tawẹ apa turạ e.

⁵Nẹ̌dingangu domba esẹ ene e harusẹ̌be lai měněmbang gandung kal᷊awọe manga mapul᷊o pitu sitenga su litere, ringangu pěndingang apang anạu domba e, harusẹ̌ lai maněmbang sasěmba gandung kal᷊awọeweng ilẹ̌ěninge. Apan sasěmba gandung e harusẹ̌be ringanengu sasěmba lanan zaitun těllu literẹ̌.

⁶Su Pěmamantugu Wul᷊ang Buhu, sasěmba ene harusẹ̌ sapi esẹ sěmbaụ, anạu domba ěnnungu waụ, dingangu domba esẹ sěmbaụ, kěbị e tawẹ apa turạ e.

⁷Pẹ̌dingangu apan sapi esẹ dingangu kambing esẹ, i sie harusẹ̌ měněbang gandung kal᷊awọe mapul᷊o pitu sitenga su litere, mase ipěndingang apang anạu domba, pira wue tuhụ ilẹ̌ěninge. Apang sasěmba gandung harusẹ̌ dingangu sasěmba lanan zaitun těllu literẹ̌.

⁸Kereu měngangawasa e mapulu mẹ̌kal᷊iomaneng su Wal᷊e-Ku, i sie harusẹ̌ sumuẹ̌ bọu huange ghẹ̌guwạ, dingangu mapul᷊ẹ e mal᷊aing ene lai.

⁹Samurine, kereu su manga ěllo ghẹ̌guwạ kawanua e ruměnta waugu mẹ̌kal᷊iomaneng su MAWU, tangu i sire e kụ sumuẹ̌ lumiu pasěllangeng sěmběkan sawěnahẹ̌ mapul᷊ẹ e harusẹ̌ lumiu pasěllangenge sěmběkan timuhẹ̌ kereu i sire seng masueng kal᷊iomanenge. Dingangu i sire kụ simuẹ̌ limiung pasěllangeng sěmběkan timuhẹ̌, mapul᷊ẹ e harusẹ̌ lumiung pasěllangenge sěmběkan sawěnahẹ̌. I sire isẹ̌sěding mapul᷊ẹ lumiu ral᷊eng kụ seng niliuang i sire su tempon simuẹ̌: i sire harusẹ̌ kapul᷊ẹ lumiung pasěllangenge su sěmběkane.

¹⁰Měngangawasa e harusẹ̌ sumuẹ̌ sarang Bal᷊eʼm MAWU sěngkasuẹ̌ dingangu kawanua mase mapul᷊ẹ e mal᷊aing harusẹ̌ lai sěngkakapul᷊ẹ.

¹¹Su manga ěllon sal᷊imbang dingangu pěmamantugẹ̌, sěngkahindọ u apan sapi esẹ dingangu apan domba esẹ e harusẹ̌ isěmba gandung kal᷊awọe mapul᷊o pitu sitenga su litere, mase ipẹ̌dingangu apang anạu domba, walạewe měnsang pira tumuhụ ěnningu taumata kụ mẹ̌kẹ̌kal᷊iomaneng. Apan sasěmba gandung e harusẹ̌ děndinganengu sasěmba lanan zaitun těllu literẹ̌.

¹²Kereu měngangawasa e měnningu měngonggọu sasěmba ringangu naung mal᷊uasẹ̌ e su MAWU, baewe sasěmba tẹ̌tongkateng arau lai sasěmbang pẹ̌darame, tangu pasěllangeng sěmběkan daki mẹ̌tẹ̌timona rělahẹ̌ su ral᷊unge hinong tope waugi sie. I sie harusẹ̌ měngonggọu sasěmba ene ringangu kakakoạ e mẹ̌sul᷊ungu kere seng nikoạ e su ěllon Sabatẹ̌, kaiso tạ kararěngụ e sarětạeng i sie seng napul᷊ẹ ute pasěllangeng ene hinong saụ hěping.”

¹³MAWU e něhengetang, ”Apang kal᷊aěllo e su tempong mal᷊ukadẹ̌ e, anạ u domba sěmbaụ kụ umure sěntaung dingangu tawẹ turạ e harusẹ̌ isěmba waugu sasěmba tẹ̌tongkateng baugu MAWU.

¹⁴Su l᷊iung ene, apang kamal᷊ukadẹ̌ e harusẹ̌ isěmba gandung duang kilo ringangu lanan zaitun sěliterẹ̌ baugu laukangu gandung ene. Seng ene e sasěmba gandung kụ apang kal᷊aěllo e harusẹ̌ isěmba su MAWU; atorange ene mariadi sarang marěngụ-děngụ.

¹⁵Apang kamal᷊ukadẹ̌ e harusẹ̌ hanesẹ̌ isěmba su MAWU: anạ u domba sěmbaụ, sasěmba gandung dingangu lanan zaitun.”

¹⁶MAWU Kụ Limembong Karangetange něngonggọu parenta, angkuěngʼE, ”Kereu těmbonange kụ mẹ̌pẹ̌parenta e měngonggọu sěmbahageang bọu ěntana pusakạ e su sěngkatau ahuse, ěntana ene nakoạ tataghuanengu manga ahuse ringangu nakoạ kere arětạ u walagẹ̌.

¹⁷ Arawe kamagengu těmbonange ene e něngonggọu sěmbahageang bọu ěntana pusakạ e su sěngkatau ěllange, ěntana ene e sarung mẹ̌sul᷊e makoạ tataghuanengu těmbonange ene su Taungu Pěnanul᷊e.[98] Ěntana ene kai tataghuanenge ringangu kětạeng i sie ringangu manga ahuse samatang kụ botonge měnaghuang ěntana ene sarang marěngụ.

¹⁸Těmbonange ene tawe wotonge měngal᷊ạ sarang kadodọ bọu arětạ pusakạ u kawanuane. Kětạeng ěntanane hala kụ botonge i onggọ e su manga ahuse hakịu tawẹu sarang sěngkatau wọu umatẹ̌-Ku e wotonge i kahae wọu wuạ e tataghuanenge.”

¹⁹Bọu ene manga esẹ ene e nẹ̌bawa si siạ limiung tukadẹ̌ su sěndihangu pasěllangeng, sarang manga kamarẹ̌ susi, kụ tụtatěngo sěmběkan sawěnahẹ̌. Manga kamarẹ̌ ene nisadia waugu manga imang. Tau esẹ ene něněbọ sarang huange su pondol᷊e su sěmběkaʼm bahẹ,

²⁰dingangu nẹ̌bera, ”Su tampạ ini manga imang harusẹ̌ mẹ̌tuěng sasěmba laěmụ dosa ringangu sasěmba laaweng dugi ore lai něnapa gandung sasěmba, tadeạu manilaing kadodọ bọu sasěmba kụ susi e tawe niwawa sarang dělahẹ̌ su l᷊ikude kụ makasilakạ kawanua.”[99]

²¹Bọu ene iạ niwawane sarang dělahẹ̌ su l᷊ikude ringangu niapasilone si siạ u su wukune ěpạ e, sěngkatau-sěngkatau e ene su rělahe něngalembong kadodọ, nandụ e duam pul᷊o su metere, wěnahe mapul᷊o lima su metere.

²³Apan dělahẹ̌ ene nilikutangu meselẹ̌ batu, ringangu su apang meselẹ̌ ene e piạ manga sunggilẹ̌.

²⁴Angkuěngu tau esẹ si siạ e, ”Seng ini e manga rapuhang tampạ u manga mẹ̌tatangkiang Bal᷊eʼm MAWU mẹ̌tuěng manga sasěmbang kawanua e gaghěllị.”