Read Sangir YEHEZKIEL 47 Bible Online

YEHEZKIEL 47 - Sangir bible

YEHEZKIEL 47

¹ Tau esẹ ene nẹ̌bawa si siạ kapia sarang tukadẹ̌ sumuẹ̌ su Wal᷊em MAWU. Kinasiloku e akẹ nelehẹ̌ bọu al᷊ungu tukadẹ̌ ene sarang sěmběkan daki, kere Wal᷊em MAWU mal᷊aing tụtatěngo sěmběkan daki. Akẹ ene nelehẹ̌ bọu wawa al᷊ungu balaku tukadu Wal᷊em MAWU wahageang timuhẹ̌ limiung sěndihange wahageang timuhẹ̌ bọu pananěmbaěng.

²Bọu ene tau esẹ ene nẹ̌bawa si siạ siměbang limiung pasěllangeng sěmběkan sawěnahẹ̌ dingangu něngahạ u iạ sarang pasěllangenge sěmběkan daki. Sal᷊ụ kạdodọ ene e nelehẹ̌ bọu sěndihange sěmběkan timuhẹ̌ bọu pasěllangeng ene.

³Apidu kạsukạ e ringangu těking sasukạ e, tau esẹ ene e nẹ̌bawa si siạ timol᷊e kakanoạ u akẹ ene němaringang si siạ nẹ̌batụ laelehu sal᷊ụ ene sarang sěmběkan daki karaung lima hasụ su metere, wọu ene něngoro si siạ apạl᷊iu. Su tampạ ene akene kětạeng karangẹ u winggi.

⁴Bọu ene i sie něngukurẹ̌ lai lima hasụ su metere, kụ sene akene nịdatingu wuku. I sie něngukurẹ̌ karaung lima hasụ su meterẹ̌, kụ sene akene tumanịu maral᷊ung.

⁵Sěnsul᷊ẹko l᷊ai i sie něngukurẹ̌ karaung lima hasụ su metere, kụ sene akene tumanịu maral᷊ung liuang dumal᷊engu laedẹ̌. Kereu sěngkatau e mapulu lumiu ute i sie harusẹ̌be kalang.

⁶Bọu e angkuěngu tau ene si siạ, ”Ei taumata kụ tawe kakalẹ̌, tatinganeko ini e pakapia-pia.” Bọu ene i sie nẹ̌bawa si siạ kapia timol᷊e sal᷊ụ,

⁷dingangu iạ e nakasilo u su wiwihu sal᷊ụ ene ruam běka e mal᷊awọ kahěngang kakaluang.

⁸I sie nẹ̌bera si siạ, ”Sal᷊ụ ini e nelehẹ̌ sarang sěmběkan daki limiu wanua ini kụ limiu Wal᷊an Sal᷊ụ u Yordan nẹ̌timona sarang Laudẹ̌ Nate. Kereu akene sarang dal᷊ungu Laudẹ̌ Nate. Tangú akẹ u laudẹ̌ kụ mapěhadẹ̌ ene e niawengangu akẹ malele.

⁹Baewe sarang apa sal᷊ụ ini e melehẹ̌, sene lai sarung kaěbakeng kal᷊awọu haghing kinạ dingangu binatang bal᷊ine. Akẹ u Laudẹ̌ Nate e sarung koatenge makoạ malele, dingangu waewe sarang apa akẹ ene melehẹ̌, sene e sarung piạ pẹ̌bawiahẹ̌.

¹⁰Wọu manga simbul᷊u akẹ su En-gedi sarang manga simbul᷊u akẹ su En-Eglaim, apangkewe wiwihe sarung maghahẹ u manga samehẹ̌ kụ měmpěmati somạ i sire sene. Kal᷊awọu haghing kinạ sarung piạ su ral᷊ungu akẹ ene, kerẹewe ene su Laudẹ̌ Tal᷊oara.

¹¹Kaiso akẹ su manga l᷊ěbo arau manga l᷊otạ kanandung apeng ene e tawẹ u měngkalele, kaiso těbe nakoạ simbul᷊u asing.

¹² Su kanandung biwihu sal᷊ụ duam běka ene timuwo kal᷊awọu haghiʼm manga wua-bua. Daungu kalu ene tawe malolang, dingangu manga wuane tawẹ masasue. Manga kakaluang ene sarung mẹ̌gěllịu manga wuane wuhu apaʼm bul᷊ang, batụu akẹ kụ mělahuakẹ e nelehẹ̌ bọu Wal᷊eʼm MAWU. Manga wuane nakoạ kaěng dingangu manga raukalune nakoạ undang.”

¹³MAWU Kụ Limembong Karangetange nẹ̌bera, ”Ini e pẹ̌saraěngu ěntana kụ sarung ipẹ̌papahiạ su ghal᷊ipohong Israel mapul᷊o dua, ghal᷊ipohong Yusup něnarimạ duam bahageang.[100]

¹⁴Iạ seng nẹ̌salu u ěntana ene sarung Takụ ighěllị su manga i upung i kamene. Ual᷊ingu ene, al᷊ạ e ěntana ene kụ pahiạ e pakaadilẹ̌ su tal᷊oarang kamene.

¹⁵Pẹ̌saraěnge su sěmběkan sawěnahẹ̌ nitětạ bọu Laudẹ̌ Tal᷊oara mẹ̌timona sěmběkan daki, mahumpạu soang Hetlon, mẹ̌timona Hamat, matěpasu sarang soang Zedad,

¹⁶sarang Berota ringangu Sibraim (manga soa ene kaěbakeng su wěllạu soang Damsyik dingangu soang Hamat), bọu ene sarang soang Hazar-Enan, su pẹ̌saraěngu soang Hauran.

¹⁷Kụ pẹ̌saraěngu sěmběkan sawěnahẹ̌ nitětạ bọu Laudu Tal᷊oara sarang sěmběkan daki, sarang soang Hazar-Enan; tangú wanuan Damsyik dingangu Hamat ene su sěmběkan sawěnahẹ̌ bọu pẹ̌saraěng ene.

¹⁸Pẹ̌saraěnge su sěmběkan daki mẹ̌timona sěmběkan timuhẹ̌, bọu tampạ sěmbaụ su wěllạu ěntanang Damsyik dingangu ěntanan Hauran. Kụ Sal᷊ụ u Yordan nakoạ kere pẹ̌saraěngu tal᷊oarang ěntanang Israel su sěmběkam bahẹ dingangu Gilead su sěmběkan daki, mahumpạ sarang Tamar[101] su apeng u Laudẹ̌ Nate.

¹⁹Pẹ̌saraenge su sěmběkan timuhẹ̌ mẹ̌timona sěmběkam pol᷊oěng bahẹ bọu Tamar sarang simbul᷊u akẹ u Kades-Meriba, bọu ene sarang sěmběkam pol᷊oěng sawěnahẹ̌ kanandung pẹ̌saraengu Misirẹ̌ sarang Laudẹ̌ Tal᷊oara.

²⁰Pẹ̌saraěng sarang sěmběkaʼm bahẹ nakoạ ual᷊ingu Laudu Tal᷊oara, bọu e mẹ̌timona sěmběkan sawěnahẹ̌ sarang tampạ sěmbaụ su sěmběkam bahẹ bọu ral᷊eng sumuẹ̌ sarang Hamat.

²¹Pahiạko ěntana ene su tal᷊oarang kamene, tuhụ manga ghal᷊ipohong Israel;

²²kụ ěntana ene e kai tataghuanengu sarang marěngụ-děngụ. Taumata raghị kụ něngindunụ su tal᷊oarang kamene e, ringangu piạ manga anạ i sire nipěhěnding sene e, harusẹ̌ lai makaěbạ bahageange wọu ěntana ene. I sire harusẹ̌ ikoạ kawanuang Israelẹ̌ patutune, ringangu i sire e mal᷊aing ihurị sěngkahurị baugu makaěbạ ěntana su tempong nikoạ pẹ̌papahiạ u ěntana e su tal᷊oarang manga ghal᷊ipohong Israel.

²³Apan tumanạ e tau raghị e harusẹ̌ onggotangu ěntana ringangu tau Israel suapang i sie mạtanạ. Iạ MAWU Kụ Limembong Karangetange seng nẹ̌bisara.”