Read Sangir YEHEZKIEL 48 Bible Online

YEHEZKIEL 48 - Sangir bible

YEHEZKIEL 48

¹Pẹ̌saraengu ěntana su sěmběkan sawěnahẹ̌ nawal᷊andang sarang sěmběkan daki, nanětạ bọu L᷊audẹ̌ Tal᷊oara sarang soang Hetlon, dal᷊eng sumuẹ̌ sarang Hamat, soang Hazar-Enan, sarang pẹ̌saraěngu soan Damsyik dingangu soang Hamat. Manga ghal᷊ipoho tuhụe ini e sěmbaụ-sěmbaụ e nakahombang sěmbahageang bọu ěntana něměnahẹ̌ bọu pẹ̌saraěng su sěmběkan dakị nẹ̌timona sarang sěmběkam bahẹ nịdatingu sarang Laudu Tal᷊oara, su ral᷊ungu pẹ̌tatuhụ e kere ini wọu sawěnahẹ̌ sarang timuhẹ̌: Dan Asyer Naftali Manasye Efraim Ruben Yehuda

⁸Bageang tuhụ e wọu ěntana ene harusẹ̌ ihae waugu ipẹ̌baraguna těntani. Nandune harusẹ̌ mapul᷊o dua sitenga su kilo metere bọu pẹ̌saraěng sěmběkan sawěnahẹ̌ sarang timuhẹ̌. Manga pẹ̌saraěng sěmběkan daki ringangu wahẹ harusẹ̌ mẹ̌sul᷊ung nandune ringangu manga wahageange kụ nionggọ su manga ghal᷊ipohong Israelẹ̌. Bal᷊em MAWU sarung ipararisị su wahageang ene.

⁹Sěmbahageang bọu ěntana ene e nihae waugu MAWU, kụ ěntana sěmpětong e su wahageang puide, nandune mapul᷊o dua sitenga su kilo metere ringangu wěnahe mapul᷊o kilo meterẹ̌.[102]

¹⁰Su tal᷊oarang ěntana ene sarung pěndarisikangu Wal᷊em MAWU. Manga imang e harusẹ̌ makaěbạ bahageange wọu ěntana susi ene. Bahageang i sire e ute mapul᷊o dua sitengang kilo meterẹ̌ wọu sěndihange sěmběkan daki sarang sěmběkam bahẹ, dingangu limang kilo meterẹ̌ bọu sěndihange watuhu sawěnahẹ̌ sarang timuhẹ̌.

¹¹Ěntana kụ nahae ene e sarung mariadi tataghuanengu manga imang hěnton Zadok. I sire e nẹ̌tangkiang MAWU ringangu kasatia ringangu wal᷊inewe mẹ̌sul᷊ungu tau Lewi e kụ bansa sěmbaụ dingang i sire, kụ mal᷊aing natol᷊e nẹ̌baradosa ringangu taumatang Israelẹ̌ bal᷊ine.

¹²Ual᷊ingu ene waugu hěnton Zadok e harusẹ̌ gěllirangu ěntana těntani su l᷊iung ěntana kụ nionggọ su tau Lewi. Dingangu ěntana nihae ene e mamben susi.

¹³Ěntanan tau Lewi e nandune mapul᷊o dua sitenga su kilo metere wọu sěmběkan daki sarang sěmběkam bahẹ, dingangu wěnahe limang kilo meterẹ̌ bọu sěmběkan sawěnahẹ̌ sarang timuhẹ̌ kụ pěllọ e nẹ̌sihe ringangu ěntanang manga imang.

¹⁴Sěndango wọu ěntana ene tawe wotonge iwal᷊ụ i sire arau ipẹ̌sasal᷊iun sire; wahageange kapiaěnge wọu ěntanang Israel tawe wotonge al᷊ingang sarang liman taumata wal᷊ine, watụ u ěntana e seng nihae waugu MAWU ringangu nakoạ tataghuanengʼE.

¹⁵Su sěmběkan timuhẹ̌ bọu ěntana nihae ene, bědang piạ lěmbene kụ nandụ e mapul᷊o dua sitenga su kilo metere, ringangu wěnahe ruang kilo meterẹ̌ sitenga. Bahageang ene wal᷊ine susi dingangu wotonge ipakẹ u kawanua waugu tampạ u pẹ̌tatanakeng dingangu waugu wimbaengu rěmpugẹ̌ su tal᷊oarane kahěngang harusẹ̌ ipětị soa sěmbaụ.

¹⁶Soa ene harusẹ̌ pẹ̌buku ěpạ, apan sěndihange ruang kilo meterẹ̌ sěngkuarẹ̌.

¹⁷Su kaguwạu soa ene mal᷊ikụ e harusẹ̌ piạ ěntana mal᷊oahẹ̌ kụ běnahe mahasụ duam pul᷊o l᷊ima su metere.

¹⁸Su sěmběkan daki ringangu wahẹ bọu soa ene piạ ěntana mal᷊oahẹ̌ kụ sěmbaụ-sěmbaụ e ukurange liman sul᷊e pẹ̌tahạ duang kilo meterẹ̌ sitenga. Tadetene mal᷊oahẹ̌ darua ene e harusẹ̌ paketang baugu ěntanang pělahěnsinuangeng kahiang tumanạ u soa e.

¹⁹Patikụ taumata wọu kěbị gal᷊ipohong Israel kụ matanạ su soa ene e wotonge měhal᷊ẹ̌ ěntana ene.

²⁰Kụ kasěllahu wanua ene, nasowa l᷊ai ěntana kụ nahae ringangu ěntana waugu soa, kakakoạ e nẹ̌buku ěpạ ukurange mapul᷊o dua sitenga su kilo metere su apan sěndihange.

²¹Ěntana su sěmběkam bahẹ dingangu rakị e wọu ěntana tani kụ sinadia waugu Wal᷊em MAWU, manga imang, tau Lewi ringangu soa ene e, kai waugu těmbonange kụ mẹ̌pẹ̌parenta. Su sěmběkan daki wọu ěntana ene e naměnahẹ̌ sarang pẹ̌saraěng su sěmběkan daki, ringangu su sěmběkam bahẹ nịdatingu Laudu Tal᷊oara, ringangu kaěbakeng su wěllạu ěntanang Yehuda ringangu ěntanang Benyamin.

²³Ěntana kụ ene su sěmběkan timuhẹ̌ bọu wanua kụ nitani ene, kai waugu manga ghal᷊ipoho wal᷊ine. Kaguwạ u ěntana ene e nanětạ bọu pẹ̌saraěnge su sěmběkan daki mẹ̌timona sěmběkam bahẹ sarang Laudu Tal᷊oara e, ringangu ipahiạ tuhụ lintuhe ini wọu sěmběkan sawěnahẹ̌ sarang timuhẹ̌: Benyamin Simeon Isakar Zebulon Gad

²⁸Su sěmběkan timuhẹ̌ bọu ěntanang Gad kaěbakeng pẹ̌saraěnge kụ měnětạ bọu sěmběkaʼm pol᷊oěng bahẹ Tamar lumiu simbul᷊u akẹ u Kades-Meriba, wọu ene mẹ̌timona sěmběkam pol᷊oěng sawěnahẹ̌ kanandung pẹ̌saraěngu Misirẹ̌ sarang Laudu Tal᷊oara.

²⁹MAWU Kụ Limembong Karangetange něhengetang, ”Kerene ěntana ene harusẹ̌ ipẹ̌papahiạ su apang gal᷊ipohong Israel.”

³⁰ Tukadu sasuěkang sarang soang Yerusalem kěbị e kai mapul᷊o dua. Meselẹ̌ ěpạ e sěmbaụ-sěmbaụ e ukurange duang kilo meterẹ̌ sěngkuarẹ̌, dingangu piạ pasěllangenge tatěllu. Manga pasěllangenge nisěbạ tuhụ arengu sěngkatau wọu ghal᷊ipohong Israel. Manga pasěllangenge su sěmběkan sawěnahẹ̌ e nisěbạ si Ruben, Yehuda ringangu i Lewi; manga pasěllangeng su meselẹ̌ sěmběkan daki nisěbạ si Yusup, Benyamin, dingangu i Dan; apang ene su meselẹ̌ sěmběkan timuhẹ̌ ikaěbạ areng i Simeon, Isakar dingangu i Zebulon; arawe su meselẹ̌ sěmběkam bahẹ nisěbạ si Gad, Asyer, dingangu i Naftali.

³⁵Kal᷊awọu meselẹ̌ ene nandune siong kilo meterẹ̌. Dingangu měnětạ bọu ini taumata mẹ̌sěbạ u soa ene e: ”MAWU E ENE SENE!”