Read Sangir YEHEZKIEL 5 Bible Online

YEHEZKIEL 5 - Sangir bible

YEHEZKIEL 5

¹MAWU e něhengetang, ”Ei taumata kụ tawe kakalẹ̌, pěngal᷊ạko pisọ mahoro kụ pakẹko pěngul᷊ụ bianggụu ringangu utạu e pakasue. Bọu ene timbangko utạu ene su timbangenge kụ pahiạko těllung kamonaěng.

²Sěngkatěllung kapahiakenge harusẹ̌be tutungu su tal᷊oaran soa e wọuteng pẹ̌tatal᷊iwunge napurạ. Sěngkapahiakeng tatěllu l᷊ai wal᷊ine e harusẹ̌be wẹ̌kaʼm pedanu e apidu kapělẹ̌likụ e soa e. Dingangu sěngkapahiakeng tatěllu pěngěnsueěnge harusẹ̌be pẹ̌kakaesu sarang kinoaěnge, kụ bọu ene Iạ měnahusu ringangu peda-Ku.

³Těntangko kạdodọ bọu utạu ene e ringangu pikungko su ral᷊ungu lěkung pakeangu manandụ e.

⁴Bọu ene pěngal᷊ạko lai kạdodọ bọu utạu ene e, kụ bahungko sarang dal᷊ungu putung kụ balạe kal᷊ahěngise. Bọu ene e putunge sarung mẹ̌darakị sarang kal᷊awọu tau Israel.”

⁵MAWU Kụ Limembong Karangetange něhengetang, ”Kakělla, seng ini e Yerusalem. Soa ini e Takụ i pěllọ su puidu runia, ringangu apang něgara ewe lai wal᷊ine e mạngělikụ e.

⁶Arawe Yerusalem seng něnuhudu tita-Ku e dingangu kawe nạung něngalembong karal᷊akise wọu manga wansa wal᷊ine, ore něngalembong tawe rumararingihẹ̌ bọu apang sěmbihingangu wanua wal᷊ine mạngělikụ e. Yerusalem limampa kal᷊awọu tita-Ku ringangu mạdiri tumuhụ manga toratẹ̌-Ku e.”

⁷MAWU Kụ Limembong Karangetange něhengetang, ”Ei Yerusalem, daringihẹ̌ko! I kau e tawe rumararingihẹ̌ kal᷊awọu tita-Ku e ringangu manga toratẹ̌-Ku e; i kau něngalembong dụdendehẹ̌ bọu manga wansa wal᷊ine mạngělikụ si kau e, ringangu seng nakatol᷊e tundung manga wansa wal᷊ine ene.

⁸Tangu, Iạ e MAWU Kụ Limembong Karangetange, nělahẹ u Iạ e kai sědụu. I kau e sarung Takụ i hukung su těngong manga wansa wal᷊ine.

⁹Ual᷊ingu kal᷊awọu kakanoạu e Takụ i kẹ̌kawěnsing, tumanạu e sarung Takụ i hukung kụ kawěhạe wědang tawe nikẹ̌koạ-Ku ringangu sen tawe Takụ saụ koateng.

¹⁰ Taumata maghurange sarung kuminạ anạ e sẹ̌sane ringangu anạ e sarung kuminạ gaghurange. Kerene kakakoạ i sire e sarung Takụ i hukung, dingangu apang bědang biahẹ̌ e Takụ i pẹ̌kal᷊iaesẹ̌ sarang patikụ pungu anging.

¹¹Iạ e kai Ruata kụ biahẹ̌, MAWU Kụ Limembong Karangetange, ringangu kai ini hengetang-Ku e: Ual᷊ingu i kau seng nakal᷊amuhụ Bal᷊e-Ku e ringangu kal᷊awọu kakanoạu ral᷊akisẹ̌ e ringangu makạdarěnting, Iạ e sarung mapakagholọ i kau tawẹ ampunge.

¹²Sěngkatěllung kapahiakenge wọu tumanạu e sarung mate ual᷊ingu sahindạ ore hombangu karal᷊unusẹ̌ e kụ timompẹ su soa e. Sěngkatěllung kapahiakenge sarung hataěngu peda su l᷊ikudu soa, ringangu sěngkapahiakeng tatěllu lai wal᷊ine e sarung Takụ i pẹ̌kakaesẹ̌ sarung patikụ pungu anging dingangu sarang Takụ pẹ̌sasahusuang dingangu peda e.

¹³I kau e sarung makapěndang kal᷊ahasang bawal᷊uang dingangu parandaseng-Ku e sarang Iạ e mawutul᷊ẹ̌. Sarangke kěbị ene e nariadi, i kau e sarung maiakingu Iạ MAWU e seng nẹ̌bisara ringangu ual᷊ingu Iạ e limangehẹ̌ baugu tawẹ satianu.

¹⁴I kau e sarung makoạ manga ěnạ e marihutu ringangu manga wansa mạngělikụ e sarung mẹ̌baheau si kau; apan taumata kụ sumahe e sarung mẹ̌tihọ i kau.

¹⁵Kereu Iạ e lumangehẹ̌ dingangu mẹ̌pahuwungkadẹ̌ si kau ore lai měhukung i kau, kěbị bansa mạngělikụ e sarung makapěndang mawintogẹ̌. I sire sarung měheghesẹ̌ si kau ringangu marěnting makasilo si kau.

¹⁶Iạ e sarung mapakaupung diahing kaěngu ringangu mapakawalang tumanạu e kal᷊unusang. I sire sarung makapěndang likibu kal᷊unusang, kere horom papitị kụ mahoro e matěbị dingangu mapakawinasang kau e.

¹⁷ Sul᷊iung hombangu karal᷊unusẹ̌ sarung Takụ aparěnta lai sahindạ, pẹ̌tatatingkaị dingangu pẹ̌sasekẹ baugu pěmate tumanạu ringangu manga binatang dul᷊u baugu pěmate manga anạ i sire e. Iạ e kai MAWU, kụ seng nẹ̌bisara e.”