Read Sangir YEHEZKIEL 6 Bible Online

YEHEZKIEL 6 - Sangir bible

YEHEZKIEL 6

¹MAWU e něhengetang si siạ,

²”Ei taumata kụ bal᷊inewe kakalẹ̌ e, tatingangko manga wul᷊udu Israelẹ̌ e, ringangu paul᷊ịkoʼn tatanata-Ku e mạanung hukumang baugi sire e.

³Pěngoroko si sire e apararingihẹ̌ dingangu pěnẹ̌naung apang kụ Takụ i wera wọu Iạ e MAWU Kụ Limembong Karangetange waugu manga wul᷊ude ene, kerene lai su manga wukide, arau manga tịgal᷊ụ e ringangu manga wal᷊ane. Mamben těngadẹ̌, Iạ e sarung měndingọ u peda waugu i pěnetadẹ̌ manga tampạu pananěmbaěng su mahang duata e.

⁴Manga pananěmbaěnge sarung i pakahaka ringangu kal᷊awọu pěnanutungang buwụ e sarung i pakawěka. Kěbị taumata e sene sarung pateěng su těngong mahang duatane.

⁵Iạ e sarung mapakariading manga maietu tau Israelẹ̌ e mẹ̌sal᷊iawuhẹ̌; dingangu kal᷊awọu manga ruhin sire e Takụ ipẹ̌sawuhẹ̌ su sěndihangu manga pananěmbaěng mạngělikụ ene.

⁶Kěbị soang Israel sarung i pakaupu, patikụ pananěmbaěng e ringangu mahang duatane maghagholang, pěnanutungang manga wuwụ e mẹ̌sal᷊iawuhẹ̌, dingangu kal᷊awọu apang kụ kinoạ i sire e sarung mailang.

⁷Su apan tampạ e piạ taumata kụ pinate, ringangu i sire apang niambange e sarung masingkạu Iạ e kai MAWU.

⁸Sěmbahageang kạdodọ bọi sire e sarung Takụ i pakal᷊iwirẹ̌ bọu pělahataěng ene kaiso i sire sarung i pẹ̌kal᷊iaesẹ̌ su tal᷊oarang manga wansa;

⁹paị sene i sire mẹ̌biahẹ̌ su ral᷊ungu pěmamembangeng. Bọu e i sire sarung makatahěndung si Siạ dingangu makahěngang u Iạ e něhukung dingangu něhinakang si sire[9] u naung i sire e tawẹ satiane si Siạ. I sire e seng naněntangu Iạ dingangu němile mahang duata nakoạ laaweng si Siạ. Bọu e i sire e narěntingu watangeng i sire hala e, ual᷊ingu patikụ karal᷊akisẹ̌ e ringangu katatingkaị kụ seng nikoạ i sire e.

¹⁰Tangu i sire e sarung masingkạ u kai Iạ e MAWU ringangu kěbị tatahěndung kụ Takụ nionggọ e wal᷊inewe kal᷊awọu papatakụ tawẹ lohone samatang.”

¹¹MAWU Kụ Limembong Karangetange něhengetang, ”Pahunsangị e! Ringangu pahul᷊ungkangke! Pěmpẹ̌kiạ e ringangu susa naung ual᷊ingu kal᷊awọu karal᷊akisẹ̌ dingangu katatingkaị kụ seng nikoạu tau Israel. I sire sarung mate ual᷊ingu pẹ̌seketang, karal᷊unusẹ̌, dingangu sahindạ.

¹²I sire kěbị e sarung makapěndang pěngangambungu pědu-Ku. Taumata apang marau su pěmamembangeng e sarung manawo masakị kụ bọu ene mate; apang marani e sarung mate su pẹ̌seketang dingangu apang lěmbene e sarung maten lunusẹ̌.

¹³Manga maietẹ̌ e sarung mẹ̌sal᷊iawuhẹ̌ su tal᷊oarang manga mahang duata dingangu su sěnaung pananěmbaěng mạngělikụ e, naěmpahẹ̌ suapaʼm bukide mararangẹ e, dingangu su pusigu apaʼm bul᷊ude, su al᷊ungu apang kakaluang mal᷊ahěbung e ringangu apang kalu ghaghaghuwạ e; nimbụ e, waẹbe suapa i sire e mạnutung sasěmba waugu mahang duatan sire. Tangu apan taumata kụ masingkạ u kai Iạ e MAWU.

¹⁴O, Iạ e sarung maněden takiahẹ̌-Ku e ringangu mapakawinasaʼm banuan sire e, sarang i pěhione, manětạ bọu Wanua L᷊inggi sěmběkan Timuhẹ̌ e sarang soang Ribla su sěmběkan sawěnahẹ̌ e. Wọu kal᷊awọu tampạ kụ pẹ̌tẹ̌tanakengu tau Israelẹ̌ e, tawẹ u sarang sěmbaụ kụ maambang. Tangu nasingkạ e kěbị taumata u kawe Iạ e MAWU.”