Read Sangir YEHEZKIEL 7 Bible Online

YEHEZKIEL 7 - Sangir bible

YEHEZKIEL 7

¹MAWU e nẹ̌bisara si siạ,

²”Ei taumata kụ bal᷊inewe kakalẹ̌ e, Iạ e, MAWU Kụ Limembong Karangetange, makawerạe kirini su ěntanang Israel: Kai ini e pěngěnsueěngu wěkeng kasěllahu wanua ini!”

³MAWU e něhengetang, ”Ei Israel, orasẹ̌ ini e seng nasongo kahẹ̌pusangu e. I kau e sarung makatemang dal᷊angehẹ̌-Ku e. I kau e Takụ hukunang i pẹ̌bewẹeweng kakakoạu e matingkaị.

⁴Iạ e tawe tumal᷊ěntụ arau mẹ̌gěllịu ampung si kau. Iạ e sarung měhukung i kau sěndal᷊engu kal᷊awọu pẹ̌tatingkaị u kụ seng nịkakoạu e. Tangu nasingkạ e i kau u kai Iạ e MAWU.”

⁵Seng ini e nipěhengetangu MAWU Kụ Limembong Karangetange su tau Israel, ”Hombang mịdatingu hombang sarung mawuạ si kamene.

⁶Kụ ini e patikụ e seng napaghohẹ̌. Seng inie pěngěnsueěnge. Seng tawẹ apa lai pělẹ̌harapengu e wědang.

⁷Patikụ e seng nasue si kau, ei wansa kụ mạtanạ su ěntana ini e. Orasẹ̌ ini e selain tawẹ apa manga sal᷊imbang su manga pananěmbaěng su wawul᷊urange, u piạ ute tumbạeng pẹ̌tatanggarạ[10] samatang.

⁸Tawẹ kararěnane lai i kamene sarung makapěndang dal᷊angehẹ̌-Ku masaria e. I kamene Takụ i hukung sěndal᷊engu kakanoạu e. Takụ bal᷊isang si kau e kal᷊awọu kakanoạu e matingkaị.

⁹Iạ e tawe tumal᷊ěntụ, arau mẹ̌gěllị u ampung si kamene. Iạ e sarung měhukung i kamene e sěndal᷊engkeweng kal᷊awọu katatingkaị kụ seng kinoạ i kamene e. Tangu nakahěngangke i kamene u Iạ e kai MAWU ringangu Iạ e měhukung si kamene.”

¹⁰Ěllong hombang baugu tau Israelẹ̌ e seng nasongo. Kal᷊ahěgisẹ̌ e seng nẹ̌tondaisẹ̌. Kal᷊aobotẹ̌ seng nịdatingu pusige.

¹¹Katatingkaị e makạkoạ aị e něngalembong kal᷊awọ e kararal᷊akisẹ̌ e. Patikụ kakakalạ, kawawantugẹ̌ dingangu kal᷊aasagi sire e sarungbe mailang tạ ěnạ e.

¹²Tempone sen tạ karěngụ e marěnta, ěllone seng marani! Měmamělli ringangu mẹ̌bawal᷊ụ e seng tawe makauntung apa-apa, u hukumang u Ruata e sarung mawuạ su patikụ taumata.

¹³Tawẹ apa mal᷊ahumbal᷊ụ e kụ piạ lěsabe saụ makaěbạ kapia apang kụ niwal᷊ụ e, u ral᷊angehu Ruata e mělịhino si sai-sai. Taumata ral᷊akisẹ̌ e tawe masal᷊amatẹ̌.

¹⁴Slompretẹ̌ e huměte, kěbị taumata e seng sạdia. Kaiso tawẹ u sarang sěngkatau e mẹ̌buạ sarang pẹ̌seketang, batụu ral᷊angehu Mawu Ruata e seng nihino su patikụ taumata e.

¹⁵Su manga ral᷊engu soa, piạ pẹ̌sasekẹ, su apaʼm bal᷊e e piạ sahindạ dingangu karal᷊unusẹ̌. Walạewe i sai kụ ene su l᷊ikudu soa e, sarung mate su ral᷊ungu pẹ̌seketang, dingangu apang mạtanạ su soa e, sarung makoạ sasal᷊iun sakị dingangu karal᷊unusẹ̌.

¹⁶Sěmbahageange sarung mal᷊iwirẹ̌ dingangu tumal᷊angu watangeng sarang bawul᷊urange. Sene i sire sarung mẹ̌sul᷊ungu manga manụ u winalangeng kụ lẹ̌liwuaheng bọu manga wal᷊ane; kěbị e sarung mẹ̌kẹ̌kiaratagẹ̌ ual᷊ingu rosan sire e.[11]

¹⁷Apan taumata e sarung měmpelome l᷊imane ringangu mẹ̌gaghal᷊isa wukune.

¹⁸I sire e sarung mẹ̌pakẹ u karong dingangu kasěllahu wadange sarung sumal᷊ungkende. Těmbọ i sire e sarung lungguhang, dingangu i sire e tahumeang.

¹⁹Bul᷊aeng dingangu sal᷊aka e sarung děmekang i sire e su ral᷊eng kere onasẹ̌, u su ěllong MAWU e mapasongkahu ral᷊angehʼE, bul᷊aeng dingangu sal᷊aka ene e tawe makasal᷊amatẹ̌ si sire e, katewe mundangu makawunsal᷊i sire e su ral᷊ungu rosa e. I sire e tawe makapakẹ u ene waugu mapakawatụ u abul᷊i arau waugu měloho tiang i sire e.

²⁰Nạung kal᷊imona e i sire rụl᷊esạ u paramatan sire e maral᷊ěnggihẹ̌, kaiso ual᷊ingu i sire e kawe mẹ̌pẹ̌pakẹ baugu i pẹ̌koạ mahang duatan sire makạdarěnting e, MAWU e napakariading arětạ i sire e nakoạ sěmbaụ katatakụ tạ sihinge.

²¹MAWU e něhengetang su tau Israel, ”Iạ e sarung mapakawalan tau l᷊iwụ e měhampasẹ̌ si kamene. Taumata raral᷊akisẹ̌ e sarung měhampasẹ̌ arětạ u ringangu mapakal᷊amuhụ u ene.

²²Iạ e tawe mẹ̌taghul᷊ima kamagengu Wal᷊e-Ku e gholangeng dingangu lamuhukangu manga mělahampasẹ̌ e.

²³Kasěllahu runia e nẹ̌kal᷊emboghang;[12] su apan tampạ piạ pẹ̌papapate ringangu pẹ̌tatatingkaị.

²⁴Manga wansa kụ tumanịu makarangěngisẹ̌ e Takụ i parěnta mẹ̌deạu apẹ̌tanạ su wal᷊eng kamene e. Apang bawahaning kamene kapapiaěnge sarung měngkaol᷊ọ kereu manga wansa ene e Takụ i wala pěnggolang tampạ u pẹ̌kakal᷊iomanengang i kamene e.

²⁵I sire kawuakengu susa naung dingangu kapapěndụ, kụ bọu ene kapẹ̌dẹ̌deạ e pẹ̌darame, kaiso tawe kahombangeng i kamene.

²⁶Hombang basagiạ dingangu habarẹ̌ dal᷊akisẹ̌ e sarung duměnta turusẹ̌-turusẹ̌. I kamene e sarung kumakindoạu tadeạu manga nabi e mapulu měmpaněbal᷊ẹ̌ e, katewe i sire kawe tawe makakoạ. Kerene lai manga imang e tawẹ manga apa-apa waugu i těntiro su manga umatẹ̌ e, ringangu apang pangahạ e kinasueěngu sasasa.

²⁷Datu e sarung dumal᷊umpasiang, ahusu ratu e sarung manawo naunge, dingangu kawanua e mahungkenden takụ e. Iạ e sarung měhukung i kamene tuhụewe kal᷊awọu kakanoạ e ringangu měhukung i kamene mẹ̌sul᷊ungkeweng kamene e měhukungu taumata wal᷊ine e. Tangu nakahěngangke i kamene e u Iạ e kai MAWU.”