Read Sangir YEHEZKIEL 8 Bible Online

YEHEZKIEL 8 - Sangir bible

YEHEZKIEL 8

¹Su tanggalẹ̌ l᷊ima wul᷊ang kaěnnunge su taung kaěnnunge tempom pěmamembang i kami e, apam pangahạ u taumataʼn Yehuda nawembang e diměnta sarang bal᷊eku kụ měmpạhungkaiang dingangku. Sěngkianu kawasaʼm MAWU Kụ Limembong Karangetange e nẹ̌kawasa si siạ.

² Iạ e rimal᷊ingara kụ nakasilo piạ apa mạngawẹ taumata. Bọu sěndihange tanaẹ i sie kẹ̌kasilo kere putung, dingangu wọu sěndihange taraị i sie kụkerong kere kal᷊aukangu tambaga ringangu timběha e wọu nịkakěkisẹ̌.

³I sie něngul᷊uhu apa mẹ̌sul᷊ungu lima, kụ bọu ene e něhěngkasẹ̌ utạku. Bọu ene su ral᷊ungu papasilo ene e, iạ e nisapuạ pinakarangẹ sarang binangaeng kahiang Rohkẹ̌ u Mawu Ruata e, kụ niwawa sarang Bal᷊eʼm MAWU e su Yerusalem, sarang tukadu sasuěkang sarang dělahe su ral᷊unge su sěmběkan sawěnahẹ̌. Sene kaěbakeng tul᷊adaʼm mahan duata kụ seng nakakasongkang dal᷊angehu Ruata e.

⁴ Bọu ene iạ e nakasahidi tualagẹ̌ e kimerong mạnialaʼn darěntaʼn Duatang Israel, mẹ̌sul᷊ungu seng kinasiloku e piạ iạ e ene su wiwihu Sal᷊ụ u Kebar.

⁵Duata e nẹ̌bera si siạ, ”Ei taumata kụ bal᷊inewe kakalẹ̌ e, pěmandako sarang sěmběkan sawěnahẹ̌.” Iạ e tumuhụ, dingangu su sěmběkaʼm panananěmbaěng maranin dal᷊eng sumuẹ̌ e, kinasiloku e mahan duata kụ seng nakakasongkang dal᷊angehu Ruata ene.

⁶Mawu Ruata e něhengetang si siạ, ”Ei taumata kụ bal᷊inewe kakalẹ̌ e, i kau nakasilo kaia nariadi e? Kakěllako kal᷊awọu kakanoạ makạdarěnting e nikoạ u tau Israelẹ̌ e, kụ napakaraung Iạ e wọu Wal᷊e-Ku! Mahiko, Takụ i todẹ si kau kal᷊awọu apang kụ limembong lai katingkaị e.”

⁷Bọu e niwawa-Ne iạ sarang tukadẹ̌ sumuẹ̌ sarang dělahẹ̌ su l᷊ikude dingangu niapasilo-Ne lohang sěmbaụ su meselẹ̌.

⁸AngkuěngʼE, ”Ei taumata kụ bal᷊ine kakalẹ̌, apakạguwạko lohange ini.” Sarětạeng takụ nikoạ, kinasiloku e tukadẹ̌ sěmbaụ.

⁹AngkuěngʼE si siạ e, ”Suẹ̌ e kụ kakěllako kal᷊awọu kakanoạ u tingkaị e kụ makạdarěnting kinoạ i sire sene e.”

¹⁰Iạ e simuẹ̌ dingangu nakasilo. Manga rarěndungu huange ene e, nighambarengu kal᷊awọu haghin těmpu, ringangu manga binatang i pẹ̌tẹ̌tělling e[13] wal᷊ine, dingangu l᷊ai haghing gambaru mahan duata kụ pẹ̌sẹ̌subaěngu tau Israel.

¹¹Pitum pul᷊o su kataune taumata pangahạ u tau Israelẹ̌ e ene sene, nasowa l᷊ai i Yaazanya anạ i Safan. Sěngkatau-sěngkatau e mạngumbelẹ tampạu wuwụ pẹ̌sěmbaụ mạněbangu tipu.

¹²Mawu Ruata e něhengetang si siạ, ”Ei taumata kụ bal᷊inewe kakalẹ̌ e, i kau nakasilo apa nikoạu manga pangahạ u Israel marěma-rěmasẹ̌ e? I sire mẹ̌kẹ̌kal᷊iomaneng su ral᷊ungu huange kụ napenẹ u mahan duata ual᷊ingu Iạ e seng naněntangu wanua ini ringangu tawe němanda pẹ̌kakoạ i sire e.”

¹³Bọu ene MAWU e nẹ̌bera si siạ, ”I kau e sarung makasilo si sire někoạ hal᷊ẹ̌ kụ limembong lai nakararěnting.”

¹⁴Tangu niwawa-Ne iạ e sarang tukadu Wal᷊eʼm MAWU su sěmběkan sawěnahẹ̌ dingangu nipatodẹʼE si siạ manga wawine kụ mạhul᷊ungkangu papateng mahan duata esẹ i Tamus.[14]

¹⁵Mawu e nakiwal᷊o si siạ, ”Ei taumata kụ bal᷊inewe kakalẹ̌ e, i kau nakasilo hal᷊ẹ̌ ene tangu? Mase mal᷊awọ lai apang kụ něngalembong nakararěnting.”

¹⁶Su al᷊ungʼE iạ nakoạ sarang dělahe su ral᷊ungu Wal᷊eʼm MAWU. Su rěduhu tukadẹ̌ sasuěkang sarang huange susi, su tal᷊oarang pananaěmbaěng dingangu ral᷊eng kạdodọ e, piạ i sire ruam pul᷊o l᷊ima su kataune. I sire timal᷊ikudẹ̌ huange susi e, ringangu nẹ̌tumpěkuhẹ̌ sarang sěmběkan daki naněmba matangěllo siměbang.

¹⁷MAWU e nẹ̌bera si siạ, ”Ei, taumata kụ bal᷊inewe kakalẹ̌ e, i kau nakasilo ene e? Taumatang Yehuda ini e tawe mawul᷊ugẹ̌ kereu kětạeng mẹ̌kẹ̌koạ kal᷊awọu kakanoạ kụ makạdarenting ene, dingangu měkẹ̌koạ kal᷊awọu kakanoạ kụ tawe tumatatal᷊ěntụu taumata e su kasěllahu dunia e. I sire katewe lai mẹ̌kẹ̌koạ kěbị ene e sini, su ral᷊ungu Wal᷊e-Ku ringangu mapạkariading Iạ e saụ limembong mẹ̌pědu. Kakěllạ e kereapa i sire e něhinakang si Siạ dingangu kakakoạ e limembong katingkaitange[15] ini e!

¹⁸I sire e sarung makapěndang dal᷊angehẹ̌-Ku masaria e! Iạ e tawe mapakal᷊oahẹ̌ dingangu tawe mẹ̌gěllịu ampung si sire. Manilaing i sire e měmpěmansagu raroa si Siạ e sěngapang kaihạ e, Iạ e tawe rumaringihẹ̌!”