Read Sangir YEHEZKIEL 9 Bible Online

YEHEZKIEL 9 - Sangir bible

YEHEZKIEL 9

¹Bọu ene iạ e nakaringihẹ̌ Duata e kimahiorọu, ”Děntạ e sini ei taumata kụ sarung měndal᷊engu hukumang-Ku e waugu soa ini e. Bawạ e kal᷊awọu manga aghidu.”

²Sěngkahindọ siměpụ ěnnungu katau wọu l᷊ikudu pasěllangengu Wal᷊eʼm MAWU e sěmběkan sawěnahẹ̌, sěngkatau-sěngkatau e nasịbawa aghide. Dingangi sire lai e piạ taumata němpěluheʼm pakeange leneng, kụ němpẹ̌bawa apal᷊iwụu pamohekang. I sire nahunsuẹ̌ kụ němpẹ̌darisị maraning panananěmbaěng nikoạ bọu tambaga kal᷊aukangu timběha.

³Mase tualagẹ̌ e kimerong kụ něniala rarěntan Duatang Israel, simarang bọu manga kerub,[16] bọu e něngal᷊ing bọu tampạ e humotong ene sarang tukadẹ̌ sumuẹ̌ su Wal᷊eʼm MAWU e. Tangú MAWU e nẹ̌kui taumata piạ pakeange leneng ene e, angkuěngʼE,

⁴ ”Dakọ e kakoạko sarang patikụ sěsọ u soa e kụ tialaiko rěhụ u apan taumata kụ makạpěndang susa naung dingangu sigěsạ ual᷊ingu kěbị kakanoạ makạdarěnting kụ nịkakoạ su soa ene.”

⁵Iạ e nakaringihẹ̌ Duata e nẹ̌bera su apan taumata wal᷊ine, ”Tol᷊eiko i sie sarang patikụ sěsọ u soa e kụ pateko apan taumata e tawẹ ampunge.

⁶Pateko kěbị manga esẹ dingangu wawine, maghurang dingangu mangangudạ, taumata maghurang dingangu manga rariọ. Kaiso kumbahang měnenggehẹ̌ sarang sěngkatau kụ apang piạ tatialane su rěhụ e. Panětạ e wọu ini, wọu Wal᷊e-Ku ini.” Tangu i sire e němpanětạʼem munaran sire e kụ němpěmate apaʼm pangahạ u Israel kụ kạpahundarisị e su Wal᷊eʼm MAWU e.

⁷Duata e něhengetang si sire, ”Lamuhukẹ e Wal᷊e-Ku ini! Peneị e manga rělahe ringangu manga maietẹ̌ e. Kụ tětạ e!” Tangu i sire e nanětạ e němpěmate apan taumata su ral᷊ungu soa e.[17]

⁸Karěngụ u pělahata ene e kẹ̌koateng, iạ e ene sene sẹ̌saku. Iạ e sụsasimpěllọ dingangu kụkahiorọ, ”MAWU Kụ Limembong Karangetange, kạsariane tangu ral᷊angehʼU e su Yerusalem, hakịu kawe pateěngʼU patikụ taumata kụ bědang ene su Israelẹ̌ ini e?”

⁹Duata e simimbang, ”Tau Israel dingangu Yehuda e seng němpẹ̌koạ dosa tumanịu masaria. I sire němpěmate su patikụ tampạ, dingangu Yerusalem e nilamuhukangu pẹ̌kakoạ dal᷊akisẹ̌ e. I sire e mẹ̌bẹ̌bera u Iạ, MAWU e seng naněntang u wanua ini hakịu tawe makasilo kakanoạ i sire e.

¹⁰Iạ tawe kuměndagi sire e. Takụ sarung koateng si sire apang kụ nịkakoạ i sire e su taumata wal᷊ine.”

¹¹Bọu ene taumata kụ piạ pakeange leneng e mẹ̌bal᷊ị kụ měhabarẹ̌ su MAWU u angkuěnge, ”Kal᷊awọu titaʼm MAWU e seng nakoạ.”