Read Sangir DANIEL 12 Bible Online

DANIEL 12 - Sangir bible

DANIEL 12

¹ Malạekatẹ̌ kụ mělẹ̌luheng pakeang leneng ene e nẹ̌berako l᷊ai, ”Su tempo ene sarung suměpụ malạekatẹ̌ gẹ̌guwạ isẹ̌sẹ̌bạ si Mikhael měngangěllung bansanu. Bọu ene sarung piạ tempong sigěsạ tawẹ sihinge nanětạ bọu nạung piạ manga wansa. Kaiso patikụ taumata wọu wansanu kụ arenge mạbawohẹ su ral᷊ungu bukẹ̌ u Ruata e sarung ipakasal᷊amatẹ̌.

² Mal᷊awọ bọu tal᷊oaran sire apan seng nate sarung ipẹ̌biahẹ̌ kapia; sěmbahageang sarung makateěng pẹ̌bawiahẹ̌ kakalẹ̌, dingangu sěmbahageang lai sarung makahombang kal᷊ahina ringangu katatakụ kakalẹ̌ l᷊ai.

³Apan těmbonange kụ pelesa e sarung humena kere tualagu l᷊angị. Dingangu i sire apan seng něněntiro taumata l᷊awọ baugu ipẹ̌koạ mapia ringangu adilẹ̌ e, sarung suměnnang kere manga wituing sarang marěngụ-děngụ.”

⁴ Mase angkuěngu malạekatẹ̌ ene lai si siạ, ”Daniel, takạko bukẹ̌ ini, ringangu rěkatengkong mětěrai tadeạu tatapẹ̌be kạtatakạ sarang pěngěnsueěngu dunia. Mal᷊awọ taumata sarung měnal᷊ukạ měnanẹ̌sui apa seng nariadi. Kaiso karạdiahang i sire e sarungbe tạ mangal᷊ene.”

⁵Bọu ene iạ nakasilo manga esẹ duang katau. Sěngkatau rụdarisị su wiwihu sal᷊ụ sěmběka ini, dingangu sěngkatau wal᷊ine ute su sěmběkane pai.

⁶Sěngkatau nakiwal᷊o si sain dụdarisị lembong karanine wọu ul᷊un sal᷊ụ, ”Angerẹ tempone kal᷊awọu apan nariadi kụ makạdal᷊inaụ ini e mapaghohẹ̌?”

⁷ Arawe i anu wal᷊ine ene něhengkẹen takiahe ruam běka e sol᷊ong langị. Daringihangku i sie nẹ̌salu su arengu Ruata kụ kakalẹ̌ dingangu nẹ̌bera, ”Patikụ apan nariadi e sarung dumal᷊eng karěngụ u těllu taung sitenga. Sarangke pěnaningkaị baugu umatʼu Ruata e napaghohẹ̌, tangú napaghohe lai kal᷊awọu karal᷊inaụ ene.”

⁸Patikụ apang niwerane ene mamben takụ kinaringihẹ̌, kaiso iạ e tawe nakahěngang hal᷊ẹ̌ ene. Mase iạ nakiwal᷊o, ”Tuang, kereapa wue sarung kěbị ini e mapaghohẹ̌ ngae?”

⁹I sie simimbang, ”Tamaị e ini, Daniel, batụu kal᷊awọu bawera tamai ini e hinombeng kạbawuni ringangu kạdarahasia sarang pěhěpusangu dunia.

¹⁰ Mal᷊awọ taumata sarung banikateng dingangu ipakatilang. I sire apan dal᷊akisẹ̌ sarung tawe makaěnna kụ měngkate sěntiniạ mẹ̌kẹ̌koạ dal᷊akisẹ̌; kětạembeng i sire apaʼm pelesa sarung makaěnna.

¹¹ Bọu tempon sasěmba měllo-měllo ene niěndung dingangu sěmbaụ makạtatakụ kụ isẹ̌sěbạ Karal᷊akisẹ̌ kụ makawihua e[25] pakạtei e, sarung pakapaghohẹ̌ 1.290 su ěllone.

¹²Kariangkamang i sire apan tatapẹ̌ satia sarang ěllo ka 1.335.

¹³I kau e Daniel, pakasatia wue sarang pěngěnsueěnge. I kau sarung mairị, kaiso sarung mẹ̌bangung baugu pěnarimạ bawal᷊ise su ěllo pěngěnsueěnge.”