Read Sangir DANIEL 3 Bible Online

DANIEL 3 - Sangir bible

DANIEL 3

¹Piạ sěnsul᷊e tempon Datu i Nebukadnesar nẹ̌koạ tul᷊ada wul᷊aeng sěmbaụ dangẹ e duam pul᷊o pitu su metere ringangu wěnahe maraning těllu meterẹ̌. I sie něndarisị ene su wal᷊an Dura su propinsing Babel.

²Bọu ene ratu e něnotẹ̌ u kěbị datung banua, manga guběrnurẹ̌, bupati, měnanasa wanua, běndahara, mělahukung, masasingkạ u toratẹ̌, dingangu kěbị těmbonang u daerah, waugu tumol᷊e sal᷊iwangu měngguanting u tul᷊ada kụ seng nirarisị e ene.

³Sarangke i sire kěbị diměnta kụ dimarisị su těngon tul᷊ada ene,

⁴nẹ̌giọ e lukadu ratu e maihạ, ”Manga anạ u sěmbaụ bọu patikụ bansa, ghal᷊ipohom bansa, ringangu ghal᷊ipohom bera! Daringihẹ̌ko parentan datu ini:

⁵Kereu napiri e huměte, tol᷊eěng u tingihu suling, kěcapi, biola, gambusẹ̌, suling gẹ̌guwạ dingangkewelaing pakakasu musikẹ̌ bal᷊ine, manga anạu sěmbaụ harusẹ̌ mẹ̌tumpěkuhẹ̌ mẹ̌suba tul᷊ada wul᷊aeng kụ seng nirarisị u Ratu i Nebukadnesar.

⁶I sai-saịewen tawe tumuhụ parenta ini, sarung apidu irěmmẹ su rapuhang kụ kạděllị e.”

⁷Tangú nakaringihe manga pakakasu musikẹ̌ e nipahěte, kal᷊awọu taumata wọu patikụ bansa e, ghal᷊ipohom bansa ringangu ghal᷊ipohom bera e nẹ̌tumpěkuhẹ̌ kụ nẹ̌suba tul᷊ada wul᷊aeng ene e.

⁸Pirang katau tau Babelẹ̌ e nẹ̌pakẹ u lẹ̌sabe ene e mẹ̌deạu manilakạ tau Yahudi.

⁹I sire nẹ̌bera su Ratu i Nebukadnesar, ”Pẹ̌biahe i Tuangku e sarang marěngụ-děngụ!

¹⁰I Tuangku hala e seng naněbang parenta u pakasahawụ samuring manga pakakasu musikẹ̌ e ipahěte, patikụ taumata e harusẹ̌ mẹ̌tumpěkuhẹ̌ dingangu maněmba tul᷊ada wul᷊aeng ene,

¹¹ringangu i saing kụ tawe tumuhụ parenta ene sarung irěmmẹ su ral᷊ungu rapuhang kụ dụděllị.

¹²Arawe pirang katau tau Yahudi kụ piněnarakaneng i Tuangku paparentaěng u propinsing Babelẹ̌ e tawe měndarekeng u parentan Tuangku ene. I sire ene ute kai i Sadrakh, i Mesakh dingangu i Abednego. I sire ene tawe mapulu mẹ̌suba manga ruatan Tuangku ringangu tawe lai maněmba manga tul᷊ada wul᷊aeng kụ nipararisị i Tuangku e.”

¹³Nakaringihẹ̌ ene e ratu e měngkai apa limangehẹ̌ marasai, bọu e nẹ̌parenta tadeạu i sire těllu ene iwawa pẹ̌těngon sie.

¹⁴Datu e nakiwal᷊o si sire, ”Sadrakh, Mesakh dingangu Abednego! Kahěngang i kamene mạdiri maněmba manga ruataku ringangu mạdiri lai mẹ̌suba tul᷊ada wul᷊aeng kụ takụ nirarisị ene?

¹⁵Kụ, ini e sadia i kamene mẹ̌tumpěkuhẹ̌ dingangu maněmba tul᷊ada ene kereu musikẹ̌ e huměte? Mạengu i kamene mạdiri, i kamene sarung apidu irěmmẹ su ral᷊ungu rapuhang kụ kạděllị e marasai. Dingangu kai ruata sude kụ makaumal᷊ẹ̌ mapakasal᷊amati kamene wọu kawasaku?”

¹⁶I Sadrakh, i Mesakh dingang i Abednego simimbang, ”I tuangku lẹ̌adateng, i kami e tawe sarung měnal᷊ukạ mẹ̌tahutěndạ u watangeng.

¹⁷Kereu Ruata kụ sẹ̌sěmbaěng i kami e makaumal᷊ẹ̌ měngambang si kami wọu rapuhang kụ dụděllị marehe ene e ringangu wọu kawasan Tuangku, nal᷊ahẹ u i Sie e mẹ̌koạ ene.[2]

¹⁸Kaiso kereu andene i Sie tawe lai mẹ̌koạ ene e, ute i Tuangku e kasingkạko u i kami e sarung tawe mẹ̌dalo ruatan Tuangku e ringangu l᷊ai tawe maněmba tul᷊ada wul᷊aeng kụ nipararisị i Tuangku ene.”

¹⁹Tangu nasongkahe libutun Datu i Nebukadnesar si Sadrakh, i Mesakh, dingangu i Abednego, hakịu gahị e nẹ̌těngkahamụ maghurang. I sie nẹ̌parenta tadeạu rapuhang ikoạ pitu sul᷊e limembong katětị e wọu tiniạ.

²⁰Bọu ene i sie něngoro pirang katau limembong katoghase wọu sordadone waugu ipěngikị si Sadrakh, i Mesakh dingangi Abednego, ore lai apěnděmmẹ i sire sol᷊ong dal᷊ungu rapuhang kụ dụděllị ene.

²¹Tawe nararěnnạ i sire těllu ene mal᷊aing niikị masěgadẹ̌ kapẹ̌pẹ̌pakẹeng pakeang nasahiangkung bọu kemeja, kakingkaeng, sapeọ dingangkewelain pal᷊edetẹ̌ bal᷊ine, bọu e nirěmmẹ sol᷊ong dal᷊ungu rapuhang kụ kạpẹ̌dẹ̌darěllịe ene.

²²Ual᷊ingu parentan datu ene kereng kasěgade, tangú, rapuhang ene e seng pinakatětị pinẹ̌dahenesang hakịu rěllịu putung nakahěngisẹ̌ taumata apang něhengkẹ i Sadrakh, i Mesakh dingangu i Abednego, sol᷊ong děduhu rapuhang.

²³Kerene i sire těllu kụ kạl᷊aikị masěgadẹ̌ ene e nawunsal᷊ẹ̌ su ral᷊ungu rapuhang kụ kạděllị e ene.

²⁴Sěngkělěndịu Ratu i Nebukadnesar himěkosẹ̌ tạ sihinge. I sie měngkate apa nẹ̌bal᷊ikěkasẹ̌ nẹ̌bangung kụ nẹ̌kuị manga sawohị e, ”Kụ bal᷊inewe i kitẹ něngikị si sire těllu kanini e ringangu němunsal᷊i sire těllu e sol᷊ong dal᷊ungu putung ene tangu?” I sire simimbang, ”Mambeng kerene Tuang!”

²⁵Angkuěng u ratu, ”Kawe unụe takụ kinasilo ěpạ u katau němpẹ̌dal᷊eng su tal᷊oarang putung tangú? I sire tawe kạl᷊aikị dingangu mamben tawe nẹ̌kapura. Dingangu kaěpạ e ene e kere luhudu mẹ̌sul᷊ungu mahang duata.”

²⁶Bọu e i Nebukadnesar dimani tukadu rapuhang ene kụ nẹ̌kui, ”Sadrakh, Mesakh dingangu Abednego, manga ěllangu Ruata Kụ Karangetange! Sěbangke wọu ral᷊ungu rapuhang ene!” Tangú nahunsẹ̌bangke i sire.

²⁷Kal᷊awọu apang tumatimbang datu e, manga guběrnurẹ̌, bupati ringangu apang sawohị e lai wal᷊ine e něliwung si sire těllu kụ nakasilo u i sire mamben tawe kinal᷊ewa kahiang putung. Utạ i sire tawe natutung, dingangu pakeang i sire e tawe nahěngisẹ̌ sarang l᷊ai tipu e mamben tawẹ apa si sire.

²⁸Masene něhengetangke ratu, ”Pẹ̌daloko Ruata isẹ̌sěmbang Sadrakh, Mesakh dingangu i Abednego. I Sie seng dimolohu malạekatʼE waugu ipěngambang si sire těllu ěllangʼE kụ mạngimang si Sie. I sire e kai seng limawang parentaku ringangu mạendokangbe mapulu mate sul᷊ungu maněmba arau mẹ̌dalo mahang duata sude tabeạu katewe Ruatan sire hala.

²⁹Ual᷊ingu ene iạ e nẹ̌parenta u apan taumata bọu wansa, ghal᷊ipohong bansa arau wera lai sude, kụ makawerang lahinakang mihino su Ruata kụ sẹ̌sěmbaěng i Sadrakh, Mesakh dingangi Abednego e, sarung papotokang dingangu wal᷊ene sarung hakaěng dingangu l᷊ai koateng niěndukang manga ěnnạu kakoạ bal᷊e. Ual᷊ingu ene tawẹ apa mahang duata kụ makakoạ apan seng kinoạ u Ruata e.”

³⁰Bọu ene ratu e napaawị u pangkatʼi Sadrakh, Mesakh dingangu i Abednego, hakịu i sire nakoạ mapapangkatẹ̌ mararangẹ su propinsiʼm Babelẹ̌ e.