Read Sangir DANIEL 6 Bible Online

DANIEL 6 - Sangir bible

DANIEL 6

¹Samuring Belsyazar kinapate, i Darius tau Media němul᷊aho kal᷊aianeng u kararatuang. Su tempo ene umbure ěnnungu pul᷊o dua su taunge.

²I Darius němahiạ kararatuange nakoạ mahasụ duam pul᷊oʼm propinsi kụ sěmbaụ-sěmbaụ mẹ̌paparentane ute sěngkatau guběrnurẹ̌.

³I Daniel dingangu ruang katau wal᷊ine tangu nihengkẹ e waugu ipěnahimata apang guběrnurẹ̌ ene tadeạu kumbahangbe ratu ipakarugị.

⁴Ta nararěnnạ nạung karal᷊ahẹ e hal᷊ẹ̌ i Daniel limembong kapiane wọu manga hal᷊ẹ̌ u guběrnurẹ̌ dingangu manga měnanahimatane wal᷊ine e. Ual᷊ingu ene, datu e luěnningu makoạ měngangawasa kasěllahu kararatuang.

⁵Kaiso manga guběrnurẹ̌ dingangu měnanahimata ene e mẹ̌tẹ̌tondoal᷊ị u měnoken sal᷊a si Daniel su ral᷊ungu munaram pẹ̌paparenta, kaiso i sire tawe nakapẹ̌koạ apa, batụu i Daniel e satia ringangu matul᷊idẹ̌ dingangu tawẹ manga kirul᷊ene arau manga pẹ̌sasal᷊ane apa.

⁶Mase i sire nẹ̌bera, ”I kitẹ e kětạengbeng nakaěbạ pẹ̌sasal᷊an Daniel su hal᷊ẹ̌embeng piạ kahěmpukange ringangu agamane.”

⁷Bọu ene tamaị e i sire sěngkahindọ nẹ̌těngon datu ringangu nẹ̌bera, ”O Tuan Datu Darius, biahẹ̌ i Tuangku e sarang marěngụ-děngụ.

⁸I kami kěbị e něngurusẹ̌ kararatuang i Tuangku, baẹbe apang měnanahimata, apang guběrnurẹ̌, manga lintuhu guběrnurẹ̌, dingangu manga mapapangkatẹ̌ lai wal᷊ine, seng sěngkanaung baugu mẹ̌dorong kereu wotonge i Tuangku e mapasěbangu suratu parenta kụ harusẹ̌ tuhuke ringangu kạguwạu naung. Mal᷊owọko i Tuangku e remben mẹ̌parenta tadeạu karěngụu těllum pul᷊o su ěllone ren tawẹ u sarang sěngkatau ipakawala měhabaru rorong su sěngkatau wọu kal᷊awọu mahang duata arau taumata tabeạu katewe si Tuangku e sẹ̌sane. I sai-saing lumampa parenta ene sarung iwahung su ral᷊ungu liangu singa.

⁹I kami e mědẹ̌dorong mal᷊owọko i Tuangku reng měnekeng suratu parenta ene tadeạu makoạ ondang-ondang u Media ringangu Persia kụ semben tawe ikasawụ kapia.”

¹⁰Tangú Ratu i Darius něnekeng suratu parenta ene.

¹¹Ene i Daniel nakaringihe hal᷊ẹ̌ ene, napul᷊ẹ e i sie sol᷊ong bal᷊ene. Kamare su wowone rasị piạ manga janelane tụtatěngo sol᷊ong Yerusalem. Dingangu kerẹewe wiasane, i sie mẹ̌doa su Mawu Ruatane ringangu mẹ̌dalo si Sie těllu sul᷊e su ral᷊ungu sěhěllo kụ měmul᷊angeng su těngom manga janela mạbawuka ene.

¹²Piạ manga sědụ i Daniel nakasilo si Daniel kạpẹ̌dẹ̌doane su Ruatane,

¹³tamaị e i sire kěbị nẹ̌těngon datu mědeạu měngalakẹ̌ i Daniel. I sire nẹ̌bera u, ”Bal᷊inewe i Tuangku seng něnekeng suratu parenta kụ pẹ̌sěding kěbị taumata karěngụu těllum pul᷊o su ěllone ini maul᷊ịu kahumang su sěngkatau wọu manga mahang duata arau taumata tabeạu katewe si Tuangku e samatang? Dingangu l᷊ai, u i sai saing lumampa parenta ene e sarung bahungang sol᷊ong dal᷊ungu liang u singa?” Datu e simimbang, ”Mamben těngadẹ̌, dingangu parenta ene nakoạbe pělatorang u Media ringangu Persia kụ tawe ikasawụ kapia.”

¹⁴Mase angkuěng i sire su ratu, ”I Daniel, sěngkatau wọu tal᷊oaran sire wọu nawembang su Yehuda e, tawe nẹ̌pandung si Tuangku ringangu tawe něndekeng parentan Tuangku. I sie mẹ̌kẹ̌kal᷊iomaneng mahurupẹ̌ tahạ těllu sul᷊e su ral᷊ungu sěhěllo.”

¹⁵Nakaringihẹ̌ ene e ratu e apạ e kimondọ dingangu ghụgěnggang, hakịu i sie mědẹ̌deạ dal᷊enge waugu měngambang si Danielẹ̌. Sarangke nawawěllọ e ratu měngkate wẹ̌dang kapẹ̌tẹ̌timonane.

¹⁶Bọu ene i sire ene e nẹ̌sul᷊e nẹ̌tẹ̌ngon datu mase nẹ̌bera, ”Tuangku, kawe hinong mẹ̌tahěndung u tumuhụ ondang-ondang u Media ringangu Persia, parenta kụ nisěbangu ratu e tawe ikawal᷊ui.”

¹⁷Tangú pěngěnsueěnge ratu e nẹ̌parenta tadeạu i Daniel pakisamẹ dingangu pakịrěmmẹ su ral᷊ungu liangu singa. Angkuěngu ratu si Daniel, ”Mal᷊owọko Ruatanu kụ sẹ̌sěmbaěngu ringangu satia ene e makasal᷊amatẹ̌ si kau.”

¹⁸Samuring ene e batu sěmbaụ masaria e nipěllọ su mohongu l᷊iang ene, dingangu ratu e měnyapẹ̌ batu ene ringangu capẹ̌ u kararatuang ore lai capẹ̌ u manga těmbonange, hakịewen tawẹu sarang sěngkatau kụ makal᷊iwirẹ̌ si Daniel bọu manga singa ene.

¹⁹Bọu e napul᷊ẹ e ratu sol᷊ong istana. I sie mạdiri mangidopẹ̌ arau l᷊ai makihiborẹ̌. Dingangu su ral᷊ungu sěhěbi ene i sie tawe kal᷊ahuntikilang.

²⁰Su tempong kalonge tangú nẹ̌bangungke ratu kụ dingangu wẹ̌sang nakoạ sol᷊ong liangu singa.

²¹Nahumpạ e sene, nẹ̌kiạ e i sie ringangu tingihe sahene kal᷊inso, ”Daniel, ěllangu Mawu wiahẹ̌! Apa Ruatanu kụ sẹ̌sěmbaěngu e ringangu satia makaumal᷊ẹ̌ bue měngambang si kau e wọu manga singa ene tangu?”

²²Bọu e kinaringihe tingihʼi Daniel kụ simimbang, ”Biahẹ̌ i Tuangku e waugu sarang marěngụ-děngụ!

²³Duatang ěllangu e seng dimolohu malạekatʼE waugu pěnggěmming mohongu manga singa ene hakịu i sire tawe iapẹ̌kapurang ěllang e. Duata e něngambang ěllange batụu i Sie masingkạ u ěllange, tawe nẹ̌koạ pẹ̌sasal᷊a su těngo-Ne ringangu mihino si Tuangku.”

²⁴Bal᷊inewe gampang dal᷊uasu naungu ratu e kụ i sie nẹ̌parenta tadeạu i Daniel pakịsěbang bọu ral᷊ungu liang ene. Ene naral᷊engke parenta ene tangú, nal᷊ahẹu tawe kinaẹ̌bakeng lesẹ sarang kadodọ-dodọ si Daniel, ual᷊ingu i sie mạngimang su Ruatane.

²⁵Bọu e ratu nẹ̌parenta taumata tadeạu apěnamẹ taumata apan něngalakẹ̌ i Daniel. Mase i sire sěngkahindọ dingangu manga anạ dingangu manga kawing i sire nirěmmẹ sarang dal᷊ungu liangu singa ene. Deng bědang i sire tanạdating u wal᷊ahuangu liang ene, manga singa e apidu něněmbo si sire ringangu němpěhěmpung kewe manga ruhin sire.

²⁶Bọu ene Ratu i Darius něndingọ u suratẹ̌ su apan taumata wọu kal᷊awọu wansa, hěnto arau kal᷊awọu wera su kasěllahu dunia, ”Adatẹ̌ dingangu karal᷊unsemahẹ̌!

²⁷Takụ parentaěng baugu patikụ taumata kụ ene su wanuang kararatuangku tadeạu matakụ dingangu měngadatẹ̌ su Mawu Ruata kụ sẹ̌sěmbaěng i Daniel! I Sie e kai Ruata kụ biahẹ̌ sarang marěngụ-děngụ, sarang kahěpusangu dunia e i Sie nẹ̌parenta. KararatuangʼE tawe waharia mawinasa. KawasanʼE e tawẹ pěngěnsueěnge.

²⁸I Sie měngambang dingangu měliwirẹ̌, mẹ̌koạ karal᷊inaụ dingangu kal᷊aherang su langị ore lai su dunia. I Daniel seng niambangengʼE, wọu pěnaněmbong manga singa.”

²⁹Kerene i Daniel tatapẹ̌ piạ kal᷊aianenge marangẹ karěngụeweng pẹ̌paparentang Darius dingangu pẹ̌paparentang Koresh tau Persia ene.