Read Sangir DANIEL 8 Bible Online

DANIEL 8 - Sangir bible

DANIEL 8

¹Su taung katěllune pẹ̌paparentan Datu i Belsyazar, iạ e nakahombang papasilo karuane.[12]

²Su ral᷊ungu papasilo ene sěngkahombange watangengku e su propinsing Elam, su Susan, iněngen soam Persia. Iạ dụdarisị su rěduhu Sal᷊ụ u Ulai,

³kụ su wiwihu sal᷊ụ ene kinaěbakeng domba esẹ sěmbaụ piạ sungene rarua mananandụ, sěmbua limembong kanandune dingangu limembong kawuhune wọu apam bal᷊ine.

⁴Susiloku e, tangú domba esẹ ene něnunge sol᷊ong sěmběkam bahẹ, sawěnahẹ̌ dingangu timuhẹ̌. Tawẹ sarang manga binatang sěmbaụ kụ deng mẹ̌daragẹ̌ mẹ̌těngon sie arau mal᷊iwirẹ̌ bọu kawasane. I sie mẹ̌kẹ̌koạ kapulun naunge ringangu kai naobotẹ̌.

⁵Těntal᷊ang iạ kạpẹ̌tẹ̌tingange, nakasilọ e kambing esẹ sěmbaụ kạtal᷊ange wọu sěmběkam bahẹ timěpasu wanua. Apạe mahawesẹ̌ tatal᷊ange hakịu l᷊aede tawe mararasagu ěntana. Su tal᷊oarang matane rarua e piạ sungene sěmbaụ e matimporọ.

⁶Kambing esẹ e riměduhẹ̌ domba esẹ kụ kinasiloku e su wiwihu sal᷊ụ ene, mase něngalo mẹ̌tẹ̌timona si sie kụ apạ e mahasa.

⁷Tinganengku e i sie něněmbo domba esẹ ene. Kahiang kahasane ute timangga domba esẹ e kụ němědi sungene rarua. Domba esẹ ene e tawe makakoạ apa. I sie nahipe sol᷊ong ěntana kụ nipẹ̌tatahidang, kụ tawẹu sarang sěngkatau nakaambang.

⁸Kambing esẹ ene e mangkeng kakạsariane. Kaiso piạ i sie nịdatingkem pusigu kawasane, napědị e sungene ghẹ̌guwạ ene, mase su tampạ ene nituwoěngken sunge ěpạ u wua kụ matimporọ, sěmbaụ-sěmbaụ e timonane mẹ̌dẹ̌darol᷊e.

⁹Bọu sunge sěmbua e timuwọ e sunge kạdodọ, kụ nakoạ masaria-saria, kụ kawasane e nawěnahẹ̌ sol᷊ong sěmběkan timuhẹ̌, sěmběkan daki, ringangu sěmběkang ěntana maholẹ.

¹⁰ Sunge ene mangkeng kakạsěllahe kụ seng matoghasẹ̌ baugu ipěndokạ sordadon sorga kụ mangạ e wituing, hakịu piạ e pira-pira wọu e niwahunge sol᷊ong ěntana mase nipẹ̌tatahidaěnge.

¹¹Pundangu i sie rumokạ mol᷊ensekẹu sordadon sorga, ipěngědong sasěmba ghaghěllị měllo-měllo, kụ isẹ̌sěmba su mol᷊ensekẹ ene, ringangu měhakạ wal᷊eng pẹ̌kakal᷊iomaneng baugi sie.

¹²Mase i sire paị sene nanětạ e nẹ̌dosa ringangu tawe měgěllịu sasěmba hinong ighěllị e.[13] Tangú pẹ̌kakal᷊iomaneng matul᷊idẹ̌ e seng nipahị su ěntana. Sunge ene seng piạ ual᷊ine su ral᷊ungu patikụ kakanoạ e.

¹³Bọu ene iạ nakaringihẹ̌ piạ malạekatẹ̌ sěngkatau nẹ̌bera su malạekatẹ̌ bal᷊ine, ”Sarang kạděngụ e kěbị apang kinasilo su ral᷊ungu papasilo ene sarung mariadi tangu? Sarang tempo sude dosa masaria ene měngaweng sasěmba měllo-měllo? Sarang tempo sude sordadon sorga e ringangu wal᷊em pẹ̌kakal᷊iomanengang e tatahidaěng?”

¹⁴Iạ nakaringihẹ̌ piạko l᷊ai malạekatẹ̌ sěngkatau simimbang, ”Sarang sěhiwu mahasụ limam pul᷊o su ěllone ko l᷊ai. Karěngụ u ene e sasěmba wawěllo ringangu sasěmba mal᷊ukadẹ̌ e tawe isěmba. Bọu ene wuhụewe wal᷊eng pẹ̌kakal᷊iomanengang e sarung ipakaul᷊ị kapia.”

¹⁵Kutẹu piạ iạ e kapẹ̌tawakal᷊ine měngěnna mangal᷊eng papasilo ene e, sěngkianu piạ apa rụdarisị su těngoku kụ al᷊ingkai taumata.

¹⁶ Ene kinaringihe karạku piạ tingihẹ̌ paị sěmběkan Sal᷊ụ u Ulai, angkuěnge, ”Gabriel, tualageko i sie hal᷊ẹ̌ u papasilone ene.”

¹⁷Mase i Gabriel kụ dụdarisị su těngoku e riměduhẹ̌ si siạ. Iạ e měngkai apạ e natakụ, hakịu iạ e nawatang. Angkuěng i Gabriel si siạ u, ”Ei taumata kụ tawe kakalẹ̌ e, i kau e hinong masingkạ u papasilo ene e kai mạanung hal᷊ẹ̌ u pěngěnsueěngu dunia.”

¹⁸Ene i sie kạpẹ̌bẹ̌berane e, iạ e napinsang. Kaiso i sie něngumbelẹ si siạ kụ nẹ̌tul᷊ung si siạ dimarisị kạpia. Bọu e i sie nẹ̌bera,

¹⁹”Iạ e sarung maul᷊ị u apa sarung mariadi si kamene ual᷊ingu ral᷊angehu Mawu Ruata e. U papasilonu e mělẹ̌lahẹ u pěngěnsueěngu dunia.

²⁰Domba esẹ kụ kinasiloku e piạ sungene rarua ute kai mạmalang kararatuangu Media ringangu Persia.

²¹Kambing esẹ e mạnialang kararatuangu Yunani, dingangu sunge kụ tumanịu mạbodẹ su tal᷊oarang matane ruam běka e kụ kawe ratune nạung humotong.

²²Sunge ěpạ siměpụ tuhụ u sunge humotonge napědi, mangal᷊ene ute kararatuangu Yunani e sarung mapahiạ makoạ ěpạ u kararatuang, kaiso tawẹ u sarang sěmbaụ sarung kere katoghasu kararatuang nạung humotonge.

²³Kakạdanineng kasueěngu manga kararatuang ene, kereu karal᷊akisẹ̌ e seng mẹ̌dahenesang, tangu sarung suměpụ sěngkatau ratu kụ těmbọ e makětị dingangu pande měngakal᷊ẹ̌.

²⁴I sie sarung matoghasẹ̌ kahěngang, kaiso wal᷊inewe ual᷊ingu katoghase hala e. I sie sarung maparěntang kawawinasa makạtatakụ, dingangu walạewe měnsang apạe koatenge kụ sarung piạ ual᷊ine mapia. I sie sarung mapakawinasang kal᷊awọu apan taumata kụ mal᷊ahasa, dingangkeweng umatʼu Mawu Ruata.

²⁵Ual᷊ingu i sie kai taumata mal᷊iewehẹ̌, kal᷊awọu manga akal᷊e sarung piạ ual᷊ine. I sie sarung měngobotu watangenge, dingangu tawẹ paraul᷊ị e kal᷊imona, i sie sarung mapakawinasan taumata l᷊awọ. Sarang kate i sie wahani rumokạ Datu Kasěllahenge. Kaiso i sie sarung ipakagholọ u tawẹ katoghasu taumata.

²⁶Papasilo mạanung gaghěllị bawěllo ringangu mal᷊ukadẹ̌ kụ nạung seng nitualagẹ̌ si kau ene, kahěnga-hěngang sarung mariadi. Arawe kěbị ene e sarung mariadi su tempo ramahi kụ deng marau, kụ kumbahangbe iwěke su sarang sěngkatau.”

²⁷Bọu e iạ nakapěndang lome mase nanawo nasakị mangạe pira-pirang ěllo karěngụ e. Bọu ene nẹ̌bangungke iạ e kụ bọu e nẹ̌bal᷊ị nẹ̌koạ manga hal᷊ẹ̌ku waugu ratu. Kaiso iạ e tụtaghiawahẹ̌ měngěngěnnạ e kal᷊awọu papasilo ene, ringangu tawe nakaěnna.