Read Sangir HOSEA 10 Bible Online

HOSEA 10 - Sangir bible

HOSEA 10

¹Israelẹ̌ e kere kalung anggorẹ̌ nẹ̌bua mahěbung. Mangkeng kakạl᷊awọe kakakalạ e, mangkeng kakạl᷊awọe pananěmbaěng kẹ̌koateng e. Mangkeng kakạpiane wiahẹ̌, mangkeng kakạpaele lai manga palẹ̌ u mahang duata kụ sẹ̌sěmbaěnge.

²Taumata apan naunge wengkọ ene, ini e harusẹ̌ měnanggung aị u rosane. Duata e sarung mapakagholọ u pananěmbaěng i sire ringangu mapakaghoghahu apam palẹ̌ u mahang duataʼn sire.

³Tawẹ kạděngụe lai i sire sarung mẹ̌bera, ”I kitẹ e tawẹ datung kitẹ batụu i kitẹ tawe matatakụ u MAWU. Apạe gunane sěngkatau ratu e si kitẹ?”

⁴I sire e mẹ̌bẹ̌bisarang konti ringangu mẹ̌kẹ̌kědo konti ore lai mạngikị u riandi tawẹ kěhase. Toratẹ̌ e ipẹ̌kẹ̌kal᷊intuinge hakịu tạ kạadile sụsombọ kere sasuang makạkilu su sasuang kụ seng nipacolẹ̌.

⁵Tumanạ u soan Samaria sarung matakụ; i sire ringangu manga imang kụ mẹ̌tẹ̌tangkiang sapi wul᷊aeng su Betel[17] e sarung masusa naunge ringangu mahungkiạ ual᷊ingu kawantugu mahang duatan sire e seng napuạ.

⁶Mahang duata ene sarung hengketang sol᷊ong Asyur mědeạu iporoseěng su ratu masěllahẹ̌. Israel tụtol᷊e karaki kụ makạmea ringangu makạsamedẹ̌ si sire.

⁷Samaria e sarung magholọ dingangu ratune sarung ital᷊ang kere kalu sěmpědi i onodu akẹ.

⁸ Manga pangkunang su manga wul᷊ude su Betel[18] tampạu tau Israel měmpaněmba mahang duata e sarung ipakagholọ. Kal᷊awọu hanggange ringangu rěmpugẹ̌ e sarung tumuwo su pananěmbaěng i sire. Bọu e i sire sarung mahungkui manga wul᷊ude, ”Ambungẹ e i kami!” ringangu su manga wongkone, ”Lingkubẹ e i kami!”

⁹ MAWU e něhengetang, ”Nanětạ bọu apa nariadi su Gibea,[19] tau Israel lai wědang tawe nạngědo nẹ̌dosa rimokạ si Siạ. Ual᷊ingu ene i sire sarung aloěngu sekẹ su Gibea lai.

¹⁰Iạ sarung měnekẹ taumata apam baradosa ene, kụ měhukung i sire. Manga wansa e sarung mẹ̌tatal᷊iwung si sire, kụ i sire sarung ihukung ual᷊ingu rosan sire mal᷊awọ ene.

¹¹Kal᷊imona e Israelẹ̌ mẹ̌sul᷊ungu sapi kawuhuang kụ seng nipakanarang su hal᷊ẹ̌, kụ makěhagẹ̌ měndal᷊inda gandung. Iạ e sen tawahal᷊uasu mělěngkangu papal᷊inge su rěhụ e mal᷊ěnggihẹ̌ ene. Arawe ini e Iạ seng němutusẹ̌ u tadeạu měnihasa pěhal᷊ẹ̌ pakasěgadẹ̌. Yehuda Takụ irolohẹ̌ pěngal᷊i ěntana ringangu Israelẹ̌ e pěnambeka.

¹² Iạ e něhengetang, ’Ei Israel! Pěmukako sasuangu wuhu, kụ pěnawuhẹ̌kom bineng kaadilẹ̌ e, ringangu pěměnsạkong al᷊amatẹ̌ kụ nikaual᷊ing kạguwạu naungu e kuměndagu Iạ. Batụu sen tempone waugʼi kau mẹ̌deạ si Siạ, MAWUnu. Iạ sarung duměnta ringangu maparasehʼi kau kahiang kal᷊awọu al᷊amatẹ̌-Ku.’

¹³Arawe kẹ̌koatengu kawe mẹ̌dẹ̌darol᷊e; i kau kawe měkẹ̌koạ dal᷊akisẹ̌, dingangu mạměnsạ u tạkạadile. I kau e seng kimaěng wua-buang ual᷊ing kontinu.” MAWU e něhengetang lai, ”Ei tau Israel, ual᷊ingu i kamene kawe mạngumbalang karetan sekẹ i kamene ringangu kal᷊awọu manga sordadong kamene,

¹⁴tangú kawanuang kamene sarung kahinoěngu paraěng dingangu kěbị těndạ i kamene sarung ipakaghoghahẹ̌. Kakakoạ e sarung kere su ěllong Datu i Salman napakawinasang soang Bet-Arbel su ral᷊ungu pẹ̌seketang dingangu měngěpisẹ̌ kal᷊awọu manga marehokang dingangu manga anạ i sire.

¹⁵Kai ene sarung mariadi si kamene, ei tumanạ u Betel, batụu i kamene seng nẹ̌koạ karal᷊akisẹ̌ masaria. Su tempong běmbanaho, tạ kararěngụ e sarětạeng pẹ̌sasekẹ e nanětạ, datung kamene e sarung mate.”