Read Sangir HOSEA 11 Bible Online

HOSEA 11 - Sangir bible

HOSEA 11

¹ MAWU e něhengetang, ”Iạ e kụkěndagu Israel den dokeng i sie wědang kạdodọ, Takụ nikuiang anạ-Ku ene, apasěbang bọu Misirẹ̌.

²Kaiso mangkeng Takụ kuiang anạ-Ku ene kai mangkeng i sie mẹ̌tẹ̌těngkarau wọu Iạ. I sie nẹ̌bawa sasěmba ringangu nẹ̌nutung buwụ baugu Baal dingangu manga mahang duata wal᷊ine.

³Sumbal᷊iau seng Iạ e mạněntiro Israel rumal᷊eng dingangu měnanarul᷊une ringangu napenẹu kakěndagẹ̌. Seng Iạ e mẹ̌tẹ̌tangkiang si sie kaiso i sie tawe mapulu mangaku.

⁴Dingangu kal᷊awọu kakěndagẹ̌-Ku, Takụ ipakarani i sie si Siạ e. Kal᷊awọu sigěsạ e Takụ pakahaěng, mase ringangu karal᷊ondon naung Takụ apakaěng i sie![20]

⁵Taumatang Israelẹ̌ e madiri pẹ̌sul᷊e su anu-Ku, ual᷊ingu ene i sire harusẹ̌ apẹ̌sul᷊e kapia sol᷊ong Misirẹ̌, dingangu tau Asyur sarung mẹ̌parenta si sire.

⁶Pẹ̌sasekẹ e sarung mạběse sarang dal᷊ungu manga soan sire, kal᷊awọu tukadu pasěllangeng sarung gagholangeng, dingangu umatẹ̌-Ku e ipakawinasa. Ene nariadi e ual᷊ingu i sire kawe tụtol᷊e kapulun sire hala,

⁷ringangu mẹ̌tẹ̌tungkětị u maněntang u Iạ. Tangu i sire sarung sědakeng, kụ mamben tawẹ u měliwirʼi sire manilaing i sire mẹ̌kẹ̌kiạ u makịtul᷊ung.”

⁸ MAWU e něhengetang, ”Ei Israel, tawe mariadi i kau Takụ iwala arau Takụ itěntang. Mariadi ngae i kau Takụ ipakaupu kere Adma? Arau Takụ koateng kere Zeboim?[21] Tawe waharia naung-Ku e měngkai mẹ̌koạ hal᷊ẹ̌ ene watụ u enẹ e kasariane kakěndagẹ̌-Ku e si kau!

⁹I kau e tawe Takụ ihukung su ral᷊ungu ral᷊angehẹ̌-Ku; i kau e tawe lai Takụ ipakawinasa. U kawe Iạ e Ruata, wal᷊inewe taumata. Iạ e i Masusi, mạněntanudẹ̌ si kau, ringangu semben tawe lai mapulu mẹ̌pědu si kau.”

¹⁰MAWU e něhengetang, ”Umatẹ̌-Ku e sarung tumol᷊e si Siạ kereu Iạ e lụhuang kere singa ringangu makaghanuẹ̌ sědụ i sire. Umatẹ̌-Ku e sarung tạ karěngụ e su mongo wọu sěmběkaʼm bahẹ mědeạu měněmba si Siạ.

¹¹Bọu Misirẹ̌ i sire sarung duměnta kere kasahawụ u manụ u winalangeng, dingangu wọu Asyur kere ghapaěngu paluma. Wọu e i sire sarung Takụ isul᷊e kapia sol᷊ong bal᷊en sire. Iạ e, MAWU kụ kapělẹ̌hengetange.”