Read Sangir HOSEA 12 Bible Online

HOSEA 12 - Sangir bible

HOSEA 12

¹MAWU e něhengetang, ”Tau Israel mělẹ̌liwung si Siạ e ringangu konti arau tahuakal᷊ẹ̌; tau Yehuda e mang těbe rudokạ si Siạ, Duata Susi ringangu satia.

²Kal᷊awọu sabarang kụ kẹ̌koateng u tau Israelẹ̌ wọu mal᷊ukadẹ̌ sarang hěbi e tawẹ gunane ringangu piạ lulune měngupu kere angingu raki. Akal᷊ẹ̌ dingangu tingkaị e nahuntinamba su tal᷊oaran sire. I sire němpẹ̌taingu manga pẹ̌dariandi ringangu Asyur dingangu němpẹ̌bawa lana sol᷊ong Misirẹ̌ nakoạ kere tialang pẹ̌dal᷊ahapị.”

³ MAWU e piạ pěrkarane ringangu tau Yehuda; i Sie lai sarung měhukungu Israel ual᷊ingu lulun sire. I Sie sarung měmal᷊isẹ̌ kakanoạ i sire.

⁴ Den dokeng bọu gandongang, i Yakub i upung i sire seng něngal᷊ung si Esau tuhange hinduane; ringangu sarangke natěllang, i Yakub něhawạ dingangu Ruata.

⁵I sie něhawạ dingangu sěngkatau malạekatẹ̌ kụ i sie nakauntu. Bọu e i sie simangị kụ nẹ̌dorong nakial᷊amatẹ̌. Bọu e su Betel, Duata riměnta su anun Yakub i upung i kitẹ e, kụ nẹ̌bisara ringang i sie.

⁶Duata ene ute kai MAWU Kụ Limembong Kawasa. Arenge ute kai MAWU, kụ dingangu areng ene e i Sie mapulu tadeạu taumata e pẹ̌kal᷊iomaneng si Sie.

⁷Ual᷊ingu ene, ei kamene hěnton Yakub, pangimangke su Ruatanu ringangu pẹ̌sul᷊ẹ e su anun Sie. Pẹ̌biahe ringangu mẹ̌papinunụ u kakěndagẹ̌ ore katul᷊idẹ̌, dingangu pěngampal᷊ẹ̌ko pakasabarẹ̌ sarang Duatanu mẹ̌karadiahang.

⁸MAWU e něhengetang su tau Israel, ”I kamene e tawẹ katul᷊ide kere tau Kanaan; apan tahawalantẹ e puluang měngakal᷊ẹ̌ měmamělline su timbangeng tawe mělahino.

⁹ ’I kitẹ orasẹ̌ ini e kalạ,’ angkuěng i sire. ’I kitẹ e nakauntung! Tawẹ u sarang sěngkatau měnoke u i kitẹ e makahombang kakakalạ ene e su tawẹ katul᷊ide!’

¹⁰Arawe Iạ e, MAWU Ruatanu, kụ seng nẹ̌bawa si kamene nipasěbang bọu Misirẹ̌ e, sarung mapakariading kamene lai mẹ̌tanạ su manga pẹ̌darasengang kere nạung kal᷊imona piạ Iạ e riměnta su anung kamene su ngara l᷊inggi.

¹¹Iạ e seng nẹ̌bisara su manga nabi ringangu něngonggọu papasilo l᷊awọ si sire. Limiun sire Iạ e něhabaru manga karaki-Ku e waugi kamene, umatẹ̌-Ku,

¹² kaiso maning kerene wědang piạ u měmpaněmba mahang duata su Gilead, dingangu měmpaněmban sapi su wowom pananěmbaěng su Gilgal. Kaiso i sire apang měmpaněmba mahang duata e sarung mate, ringangu kal᷊awọu pananěmbaěng su Gilgal ene sarung makoạ niěndukangu watu su apan dahami.”

¹³ I Yakub i upung i kitẹ e timal᷊ang sol᷊ong Mesopotamia, bọu ene waugu makareạ marehokange, i sie harusẹ̌ mẹ̌tahuěllang su taumata sene ringangu měngahạ kal᷊awọu domban tau ene.

¹⁴MAWU e něndolohu sěngkatau nabi mědeạu mapasěbang u tau Israel bọu pẹ̌tatahuěllang su Misirẹ̌, dingangu waugu pěndiagạ si sire.

¹⁵Tau Israelẹ̌ e seng nakakariadin MAWU e limangehẹ̌ marasai; hinone i sire ihukung ual᷊ingu karal᷊akisʼi sire. MAWU e sarung měhukung i sire ual᷊ingu i sire seng nakariadin taumata e něhinakang si Sie.