Read Sangir HOSEA 14 Bible Online

HOSEA 14 - Sangir bible

HOSEA 14

¹Samaria harusẹ̌ ihukung ual᷊ingu nẹ̌buntirisang dimokạ si Siạ. Kawanuane sarung mapělegẹ̌ su pẹ̌seketang; manga anạ e rarodọ e sarung ěpisang, dingangu manga wawine piạ kapapia e uaěng tiange.”

²Pẹ̌sul᷊eko su MAWU Ruatanu, ei tau Israel! Dosanu e seng nakakariading kamene něliondohẹ̌ kụ nanawo.

³Pẹ̌sul᷊eko su anung MAWU kụ habarẹ̌ko kakal᷊iomaneng ini kere sasěmbanu si Sie, ”MAWU, ampungeko kal᷊awọu rosang kami, ringangu tarimạko kakal᷊iomaneng i kami ini, tangu i kami e sarung mẹ̌dalo si Kau kerẹewe seng nikědong kami.

⁴Asyur sarung tawe makasal᷊amatẹ̌ si kami, dingangu kawal᷊ong sekẹ tawe makatul᷊ung si kami. I kami semben tawe lai mẹ̌bera su manga tul᷊ada koạ i kami hala u i sire kawe Ruatang kami. O MAWU, i Kau e kụkěndagu kal᷊awọu taumata kụ tawe mananaghuang si sai-sai kụ pěngumbalaěng i sire.”

⁵MAWU e něhengetang, ”Umatẹ̌-Ku apang němpělenga e, Takụ al᷊akeng kapia, kụ Takụ kěndagengu ral᷊ungu naung; i sire semben tawe saụ Takụ pẹ̌pěduang.

⁶Baugu tau Israel Iạ e kere tahiti kụ makaholo ěntana mamara. I sire sarung měměsị kere bungang dingangu kere kalun cěmara kụ hamụ e maral᷊ung.

⁷I sire sarung mẹ̌biahẹ̌ dingangu mahuntinamba kere sasuang himětị su apan tampạ, kere kalun zaitun kal᷊ěnggihe mawěngi kere kalun cěmara!

⁸I sire sarung mẹ̌sul᷊e su anu-Ku kụ matanạ su ral᷊ungu pěnanirung-Ku. I sire sarung mahuntinambang kasorogạ e pẹ̌bawiahʼi sire kere gandung timuwo su rahami matendang dingangu kere waelu anggorẹ̌. Kerẹewe akẹ u anggoru Libanon areng i sire timeleng.

⁹Tau Israelẹ̌ e sarung měnděmẹ u manga tul᷊adan mahang duatane; i sire Takụ padul᷊iang dingangu Takụ daringihang kakal᷊iomaneng i sire. Mẹ̌sul᷊ungu kalu kụ hanesẹ̌ mal᷊awọ daukalune, Iạ e sarung měngěllung si sire. Iạ e kai simbul᷊u kal᷊awọu al᷊amatẹ̌ si sire. Iạ e MAWU, seng něhengetang.”

¹⁰Mal᷊owọko patikụ taumata kụ pelesa e makaěnna apang kụ mạbawohẹ sini e, ringangu měnẹ̌naung ene. Kal᷊awọu tatěntiro wọu MAWU e mamben těngadẹ̌, dingangu taumata maagimatẹ̌ e mẹ̌bẹ̌biahẹ̌ tụtuhụ apan těntiro ene. Arawe taumata waradosa e tawẹ agise hakịu i sire něliondohẹ̌ dingangu nanawo.