Read Sangir HOSEA 2 Bible Online

HOSEA 2 - Sangir bible

HOSEA 2

¹Ual᷊ingu ene kuieko sěndinganengu e ringangu arengu, ”Umatu Ruata” ringangu ”Ikẹ̌kěndagu MAWU.”

²MAWU e něhengetang, ”Ei manga anạ-Ku, i ninangu e sembeng bal᷊inewe lai kawing-Ku, dingangu Iạ sembeng bal᷊ine kawinge. Ual᷊ingu ene pěrkaraị e i sie tadeạu i sie kumbahangbe lai saụ mawuang dingangu abe relaing saụ mẹ̌sundal᷊ẹ̌.

³Mạeng i sie měngkai mawuang, Iạ e sarung měluạ pakeange tadeạu i sie těntol᷊e kere nạung i sie piněhěnding. I sie sarung Takụ ipakakoạ kere ěntana mamara ringangu kaigẹ̌, tangu i sie sarung maten dou.

⁴I kamene manga anạe, tawe sarung Takụ ikěndagẹ̌; i kamene piněhanạ u pẹ̌sasundal᷊ẹ̌.

⁵I ninang i kamene e tahapẹ̌sundal᷊ẹ̌ běga mamea. I sie něhengetang, ’Iạ e sarung tamai sol᷊ong anung manga ikẹ̌kěndagẹ̌ku kụ něngonggọu kaěng dingangu inumang, wolẹ̌ dingangu hekạ leneng, lanan zaitun dingangu anggorẹ̌.’

⁶Ual᷊ingu ene, Iạ sarung měngurung si sie ringangu kěhu mal᷊ahoro, dingangu měhěping dal᷊enge ringangu pagarẹ̌ meselẹ̌.

⁷I sie sarung měnahusu manga samolọ e, kaiso sarung tawe mẹ̌sombang i sire. I sie sarung mẹ̌deạ si sire, kaiso tawe makapẹ̌sombang i sire. Bọu e i sie sarung mẹ̌bera u, ’Iạ e sarung mẹ̌sul᷊e kapia su anung kawingku humotong; nạung kạngerẹ e pẹ̌bawiahẹ̌ku e limembong kapiane wọu orasẹ̌ ini.’

⁸I ninangu e tawẹ běke reng měngaku u kawe Iạ e něngonggọu gandung, anggorẹ̌, lanan zaitun, dingangu kal᷊awọu wul᷊aeng sal᷊aka nạung nipakẹ e waugu maněmba Baalẹ̌ ene.

⁹Ual᷊ingu ene, su musungu pamaměnsạ, Iạ e sarung měngul᷊e kapia gaghěllị-Ku, kụ kai gandung dingangu anggorẹ̌, ore lai wolẹ̌ dingangu hekạ leneng nạung Takụ nionggọ si sie nakoạ pakeange.

¹⁰Takụ pakatěntol᷊e i sie su těngong kěbị samolọ e. Tawẹu sarang sěngkatau wọʼi sire makal᷊iwirʼi sie wọu kawasa-Ku.

¹¹Kal᷊awọu sal᷊imbang i sie Takụ ipakiědo, baewe sal᷊imbangu apan taung, arau lai sal᷊imbangu apaʼm bul᷊ang dingangu apang ěllon Sabatẹ̌; nimbụe, kal᷊awọu pěngangagamane.

¹²Iạ e sarung mapakagholọ u kal᷊awọu kalung anggorẹ̌ dingangu kal᷊awọu kalung ara kụ angkuěnge kai tatendengu pẹ̌tatangkiange su manga samolọ e. Sarung Takụ bal᷊uiang baelu manga anggorẹ̌ e ringangu waelu manga arane makoạ kěhu; manga binatang dul᷊u sarung mapakagholọ ene.

¹³Iạ sarung měhukung i sie batụu kanandung ěllo e nipakẹ e gunang měnutung buwụ baugu Baal, mase mẹ̌tẹ̌těngkal᷊ěnggihu wadange ringangu ral᷊ěgahẹ̌, mědeạu měnahusu manga samolọ e, mase mẹ̌timbul᷊eng Iạ marihutu. Iạ e kai MAWU, seng nẹ̌bisara.”

¹⁴MAWU e něhengetang, ”Ual᷊ingu ene Iạ sarung mẹ̌bawa si sie sol᷊ong ngara l᷊inggi; kụ sene i sie sarung Takụ ologang dingangu wawerang pẹ̌sasamolọ.

¹⁵ Manga waelu anggore sarung Takụ isul᷊e si sie, ringangu Wal᷊an Susa e sarung Takụ koateng tukadu pělaharapẹ̌. Sene i sie sarung měnarimạ u Iạ kere su tempong kangangudạ e, piạ i sie wuhu sasěbang bọu Misirẹ̌.

¹⁶Mase i sie sarung mẹ̌sěbạu Iạ kawinge, kụ bal᷊ine relaing Baale.[4]

¹⁷Iạ e tawe mapakawalan sie relaiʼm mẹ̌sěbạ arengu Baal, mědeạu taumata e sarung miwul᷊eng areng ene.

¹⁸Su tempo ene Iạ sarung mẹ̌koạ pẹ̌dariandi ringangu kal᷊awọu haghiʼm binatang tadeạu i sire kumbahang měnahaghe umatẹ̌-Ku. Iạ sarung mapakaědong kal᷊awọu pẹ̌sasekẹ dingangu mapakaraung aghidẹ̌ bọu wanuang umatẹ̌-Ku ene, ringangu mapakariadin sire wiahẹ̌ dingangu mal᷊enehẹ̌ dingangu tawẹ konsange apa.

¹⁹Israel, i kau sarung Takụ koateng kawing-Ku, kawing kahěngang sarang karěngụ e. I kau sarung Takụ kěndageng dingangu sěntiniạ tal᷊ěntukang; Iạ e sarung mẹ̌těngkatul᷊idẹ̌ dingangu masatia.

²⁰Natuhụ kere su kědo-Ku, i kau sarung Takụ koateng kawingku. I kau sarung mangakung Iạ e kai MAWUnu e hala.

²¹Su tempo ene, kereu umatẹ̌-Ku Israel[5] mẹ̌kal᷊iomaneng, Iạ e sarung dumaringihẹ̌ si sire. Bọu l᷊angị Iạ mapakahondosu tahiti, hakịu wanua e makaual᷊i gandung, anggorẹ̌ dingangu lanan zaitun.

²³ Umatẹ̌-Ku e sarung Takụ apakal᷊unsemahẹ̌ dingangu apakatatapẹ̌ su wanuan sire. Baugʼi sire apan nisěbạ ’Apan Tawe Nikěndageng’ sarung Takụ lahekang u i sire kai ikẹ̌kěndagẹ̌-Ku dingangu waugʼi sire apang isẹ̌sẹ̌bạ ’Bal᷊inewe Umatẹ̌-Ku e’ sarung Takụ pẹ̌beraěngu, ’I kamene e kai Umatẹ̌-Ku’. I sire sarung sumimbahẹ̌ kere ini, ’Seng i Kau e Ruatang kami.’ ”