Read Sangir HOSEA 6 Bible Online

HOSEA 6 - Sangir bible

HOSEA 6

¹Tau Israel nẹ̌bera, ”Mahiko i kitẹ deng mẹ̌sul᷊e sol᷊ong anung MAWU, seng i Sie e nakatědụ si kitẹ, kaiso i Sie lai sarung makakaul᷊e. I Sie napakal᷊esẹ, kaiso i Sie lai sarung měmikung manga lesẹ ene.

²Su ral᷊ungu rua ěllo arau těllu ěllo ini i Sie sarung mapakaul᷊eng kitẹ, dingangu i kitẹ sarung mẹ̌biahẹ̌ su ral᷊ungu pěngangěllungʼE.

³Ual᷊ingu ene mahiko i kitẹ e mẹ̌tawakal᷊i sěngapam botonge mẹ̌kiral᷊a MAWU. I Sie mamben sarung duměnta su anung kitẹ kere rarěntam běmbanaho, ringangu kere tahiti kụ mělẹ̌holo runia su pěngěnsueěngu musungu tahiti.”

⁴Arawe MAWU e něhengetang, ”Ei Israel ringangu Yehuda! Iạ kai mẹ̌koạ e apa si kamene? Tatal᷊ěntụ i kamene si Siạ e mal᷊ighạ maparung kere hiwụ dingangu namuhẹ̌ su tempong mal᷊ukadẹ̌.

⁵Kai ual᷊ingu ene Iạ e rimolohu manga nabi-Ku apaul᷊ị u putusang-Ku u i kamene harusẹ̌ ihukung dingangu ipakawinasa. Takụ ilẹ̌ěnning bọʼi kamene e seng matualagẹ̌ dingangu mal᷊ahẹ:

⁶ Iạ e něngalembo puluang i kamene makakiral᷊a si Siạ dingangu sěntiniạ kụkěndagu Iạ, sul᷊ungu i kamene měnutung dingangu měnarakangu sasěmba si Siạ.

⁷Arawe kere si Adam,[12] i kamene nělanda kirenu ringang-Ku.

⁸Gilead ute kai soa kụ napenẹ u taumata ral᷊akisẹ̌ dingangu tahapate.

⁹Manga imang su soa ene mẹ̌sul᷊ungu sěnggopol᷊angu tahapěhampasẹ̌ měhěgạ sumasahe. Su ral᷊eng kụ mẹ̌tẹ̌timona tampạ susi su Sikem lai i sire němpẹ̌koạ pěmamate! Patikụ karal᷊akisẹ̌ e pẹ̌tatatudẹ kẹ̌koateng i sire.

¹⁰Su Israel Iạ e nakasilo hal᷊ẹ̌ makạtatakụ: umatẹ̌-Ku e němpẹ̌těngkal᷊amuhụ u watangeng i sire kụ němpěněmba mahang duata.

¹¹Mạanung kamene, ei tau Yehuda, Iạ e seng něnantun tempone waugu měhukung i kamene lai ual᷊ingu kakanoạ i kamene.”