Read Sangir YOËL 2 Bible Online

YOËL 2 - Sangir bible

YOËL 2

¹Pěniụko slompretẹ̌, apahěteko tatialang silakạ, su Wul᷊udu Sion kụ susi, kal᷊aianengu Ruata. Pěmpẹ̌ganuẹ̌ko, ei tumanạ u Yehuda! Batụu Ěllom MAWU e masandigẹ̌ dingangu sen tạ kararěnane marěnta.

²Ěllo ene e marěndung dingangu malělubẹ̌, napenẹ u hiwụ kụ masunaubẹ̌. Sordadong kal᷊imbotong kạpahunděntane kere winawa kụ nawatedẹ̌ su wowom bawul᷊urange. Hal᷊ẹ̌ kerene e ren tawẹ běke kụ piạ, kụ tawe saụ mariadi sarang marěngụ-děngụ.

³Mẹ̌sul᷊ungu putung kụ nanutung dingangu něhěngisẹ̌, i sire něngupu kal᷊awọu sasuang. Kal᷊imonang banua ene e, kere Eden, dahaming MAWU, mal᷊iung ene e, mẹ̌sul᷊ungu wanua l᷊inggi kụ nẹ̌kěllisẹ̌. Tawẹ manga apa-apa kụ nal᷊ěmbe, tawẹ apa kụ nal᷊iwirẹ̌ bọu pěngangalong sire.

⁴ Lulun sire kai mẹ̌sul᷊ungu kawal᷊o; tatal᷊ange kere tatal᷊angu kawal᷊o su tampạ u pẹ̌seketang.

⁵I sire měmpạhul᷊insọ su wongkom bawul᷊urange, tingihe kere tatarangkal᷊u karetan sekẹ dingangu kere tahěteng putung mạnutung kalung ěmme. I sire měmpẹ̌bẹ̌barisẹ̌ kere wuntuangu wawahani, kụ seng tumotọ tampạ u pẹ̌seketang.

⁶Su tempong i sire seng něhěso, kěbị e něngkawintogẹ̌, kěbị gati e něngkawilosẹ̌ dingangu něngkal᷊uạ.

⁷Tabidạu mol᷊ensekẹ i sire němpěngalo, ringangu němpẹ̌awị meselẹ̌ kere mahorone. I sire mẹ̌bẹ̌barisẹ̌ matul᷊idẹ̌ sol᷊ong těngo, tawẹ lengane arau měmal᷊engkọ mona.

⁸I sire tawe měmpẹ̌sasasěsẹ, su sal᷊uhe hala i sire mědẹ̌daral᷊eng. I sire sěngkapěněnehẹ̌ kal᷊awọu wal᷊oarị, kụ tawe kinaědung pẹ̌tatenten sire.

⁹I sire němpěngalo sol᷊ong dal᷊ungu soa, kụ mạhuntal᷊ang su wowom meselẹ̌. I sire němpẹ̌awị sol᷊ong dal᷊ungu manga wal᷊e; kere tahatako, i sire němpẹ̌suẹ̌ bọu těba.

¹⁰ Těntal᷊ang i sire kạpahundal᷊enge, wanua e gimanuẹ̌, dingangu langị mal᷊aing gụganuẹ̌. Mase narěndungke matangěllo ringangu wul᷊ang, dingangu tualagu manga wituing e nailang.

¹¹ Tingihu MAWU e nẹ̌děllụ nẹ̌gěllịu komando, su wuntuangu sekẹ e. Apạ e kasěllahe rekenangu sordadone! Kai apạ e kakuate sordado měndal᷊engu parentanʼE! Mamben těngadẹ̌ maraitẹ̌ dingangu mahuagatẹ̌ Ěllom MAWU! Tawẹu sarang sěngkatau makararagẹ̌.

¹²MAWU e něhengetang, ”Kai orasẹ̌ ini e, pẹ̌sul᷊ẹ e sol᷊ong anu-Ku, ringangu kasěllahu ral᷊ungu naung, kapẹ̌puhědange, sụsindukung dingangu sụsangị.

¹³Gaghonaịko naungu kụ kumbahangbe pakeangu.” Pẹ̌bịhuko su MAWU Ruatanu. I Sie manandụ sabare ringangu matal᷊ěntụ maělugẹ̌ dingangu napenẹ u kakěndagẹ̌. Mal᷊uasẹ̌ mẹ̌gěllịu ampung dingangu mạdiri měndal᷊engu hukumang.

¹⁴Aramanung MAWU Ruatanu e němal᷊ui tingirang, kụ něngal᷊amatẹ̌ si kamene niapẹ̌dal᷊embo. Hakịu i kamene makapaněmbang sasěmba anggorẹ̌ dingangu gandung baugu MAWU Ruatanu.

¹⁵Tiụko slompretẹ̌ su Sion, bul᷊udu Ruata, pěhabarẹ̌kong ěllong pẹ̌papuhědang, dingangu koạko pẹ̌sasombang masaria.

¹⁶Tampungko kal᷊awọu kawanua, mase pakasueko apẹ̌komol᷊ẹ̌ kal᷊awọu umatẹ̌. Aparěntako kal᷊awọu apang maghaghurang, manga rariọ dingangu manga rariọ bědang darodọ lai. Saral᷊aing manga boroitẹ̌ buhu e harusẹ̌be rěnta lai. Dolohẹ̌ko i sire apěněntangu manga kamarʼi sire.

¹⁷Dolohẹ̌ko manga imang kụ pẹ̌tangkiang MAWU, apasangị su wěllạ u pananěmbaěng dingangu tanumbal᷊e su těngone, apidu kapẹ̌berane, ”Tal᷊ěntuke wue umatʼU, o MAWU; abe wala tataghuanengʼU e apakasamedẹ̌,” hakịu manga wansa wal᷊ine e měnindirẹ̌ dingangu mẹ̌bera u, ”Kai suapa Ruatan sire?”

¹⁸Bọu e MAWU tụtatingang ěntananʼE ringangu kụkěndagu umatʼE.

¹⁹I Sie sụsimbahẹ̌ si sire kerei, ”Ini e i kamene kěbị Takụ gěllirangu: gandung, anggorẹ̌ dingangu lanang zaitun baugu kanengang, tadeạu i kamene kěbị ipakal᷊aedẹ̌. Iạ e tawe ipakawalang kamene hinakaneng arau ipahul᷊ěgeng manga wansa.

²⁰Gapaěngu kal᷊imbotong bọu sawěnahẹ̌ sarung Takụ liwuaheng, sěnggạ Takụ saghaěng sol᷊ong banua l᷊inggi. Gapaěng su těngone e Takụ suhudang sol᷊ong Laudẹ̌ Nate, arawe ghapaěng e su l᷊ikude Takụ suhudang sol᷊ong Laudẹ̌ Tal᷊oara. Manga maiete sarung dumal᷊uru. I sire e Takụ ipakawinasa u kawe seng nanịgěsạ si kamene.

²¹Abe katakụ, ei manga rahami; pakal᷊uasẹ̌ bue naungu; pẹ̌tahěndung bue hal᷊ẹ̌ masaria kinoạ u MAWU e si kamene!

²²Ei manga binatang, kumbahangbe rěnděnganeng. Manga wimbaengu rěmpugẹ̌ orasẹ̌ ini e seng něngkaelong. Manga kakaluang měngkai němpẹ̌bua mal᷊ahěbung, kụ buang anggorẹ̌ dingangu ara kai apạe mahěmpal᷊iung kal᷊awọe.

²³Ei kawanuang Sion, pahul᷊uase! Pahul᷊uasẹ̌ dingangu pahul᷊iagẹ̌! ual᷊ingu kapiang MAWU Ruatanu. Su musungu měngkahondosẹ̌ e nighěllirangu tahiti mal᷊awọ si kamene.[1] Su musungu matěho e tahiti e niaparasehʼE, kụ kerene su musungu kalalělubẹ̌ e kerẹewe lai nạung kal᷊imona.

²⁴Tangú gandung sarung lai měloho tampạ u raral᷊indaěng; anggorẹ̌ dingangu lanan zaitun sarung maelọ bọu tampạ u papěhaseng e.

²⁵Iạ e sarung měngaweng kal᷊awọu ruginu su apạeweng taung kụ nạung kal᷊imbotonge nahungkinạ manga ghěsin sasuang i kamene. U kai Iạ e něndingọ u kal᷊imbotong ene si kamene.

²⁶I kamene sarung makahombang kaěng mạhěmpal᷊iu kụ makapěndang mal᷊aedẹ̌. MAWU Ruatanu e sarung daloěng i kamene, u waugʼi kamene e sarung koatengʼE karal᷊inạu mal᷊awọ. Umatẹ̌-Ku e sen tawe lai makoạ laheghesang i kamene!

²⁷Tangú kasingkạ e i kamene tau Israel, u Iạ e kai ene su tal᷊oarang kamene, kụ Iạ e kai MAWU Ruatanu. Tawẹ Duata wal᷊ine, tabeạu katewe Iạ sẹ̌saku. Umatẹ̌-Ku e sen tawe lai ipakamea!”

²⁸ ”Bọu ene tangú kal᷊awọu taumata e sarung Takụ ipẹ̌papinunụ u rohkẹ̌-Ku. Tangu manga ahusu dingangu sangiangu sarung měmpěhabaru kal᷊awọu tatumbal᷊ung-Ku; manga matatimadẹ̌ su tal᷊oarang kamene e sarung makahombang ipi, papasilo e sarung ionggọ su kal᷊endesang manga esẹ dingangu wawine.

²⁹Su tempo ene rohkẹ̌-Ku e sarung Takụ lai wěmbingang lai su manga mẹ̌tatangkiang esẹ dingangu wawine.”

³⁰Su langị dingangu dunia e sarung Takụ koateng karal᷊inaụ mal᷊awọ. Sarung piạ katatědọ u raha, rěllị u putung dingangu ghopol᷊angu tipu.

³¹ Matangěllo e sarung marěndung dingangu wul᷊ange mẹ̌těngkahamụ kere raha. Kěbị ene e sarung mariadi těntal᷊ang Ělloʼm MAWU e tawe nạděnta, ěllọ e mahuagatẹ̌ dingangu makạbintogẹ̌!

³² Kaiso i saing kụ mẹ̌dẹ̌dorong tul᷊umang u MAWU e sarung ipakasal᷊amatẹ̌. MAWU e něhengetang, ”Su Yerusalem tangú taumata kụ Takụ nipile e sarung masal᷊amate.”