Read Sangir YOËL 3 Bible Online

YOËL 3 - Sangir bible

YOËL 3

¹MAWU e něhengetang, ”Su tempo ene Yerusalem dingangu Yehuda e sarung Takụ ipakaul᷊ị katatul᷊endene.

²Patikụ bansa e Takụ sarung tampungang dingangu Takụ ěntudang su Wal᷊ang Pělahukumang. Mase Takụ hukunang i sire sene ual᷊ingu karal᷊akisʼi sire miěbạ umatẹ̌-Ku ual᷊ingu i sire seng nẹ̌papahiạ u ěntanang Israel dingangu umatẹ̌-Ku e seng nirěmmẹ i sire sol᷊ong haghiʼm banua.

³I sire němpẹ̌dal᷊ahurị baugu měnantu měnsang i sai sarung makahombang taumatan taweng. I sire mạhumbal᷊ụ u manga mahuala ringangu manga laumbaseng mědeạu koateng manga ěllang. Mase roitẹ̌ paketang i sire baugu ipẹ̌sundal᷊ẹ̌ dingangu ipěnginung anggorẹ̌.

⁴ Kai kapuraneng i kamene kereapa Iạ ini, e Tirus, Sidon dingangu kasěllahu wanuang Pilistin? I kau kai lụěnningu měmal᷊isẹ̌ une si Siạ tangu? Ho, tarimạko wue wawal᷊isẹ̌-Ku e kụ tạ kararěnane marěnta e.

⁵Bul᷊aeng dingangu sal᷊aka-Ku e seng nihampasʼi kamene, ringangu arětạ-Ku maarěga e seng nihuwong kamene sol᷊ong pěnanal᷊eěng i kamene.

⁶Tumanạ u Yehuda ringangu Yerusalem seng niwawang kamene pinakarau wọu soane, mase niwal᷊ụ i kamene su tau Yunani.

⁷Kụ ini e, Iạ nẹ̌bawa si sire nipasěbang bọu kal᷊awọu tampạ i kamene, měmpẹ̌bal᷊ụ, dingangu Iạ e sarung měmal᷊isẹ̌ karal᷊akisʼi kamene si sire.

⁸Manga ahusʼi kamene e sarung Takụ bal᷊ukang su tumanạ u Yehuda, kụ sarung lai mahumbal᷊ụ su Syeba, banua e marau tạ sihinge. Iạ e MAWU seng něhengetang.

⁹Pěhabarẹ̌ko malumatẹ̌ ini e su apam bansa: Pẹ̌dariahiko mẹ̌sekẹ dingangu mẹ̌tohạ u wadang! Pakasueko apasěbang manga wawahani ringangu tahapẹ̌sekẹ, komol᷊ẹ̌ko patikụ sordado, kụ tamaị e.

¹⁰ Sěsal᷊ẹ̌ko horong kakal᷊inu koạ peda, ringangu pisọ l᷊aambesu koạko aghidu tatěkạ. Kerene lai taumata lome e harusẹ̌ pẹ̌bera, ’Iạ e makapẹ̌kul᷊ěte lai kere sordado!’

¹¹Mahịe rěnta pakarol᷊ạ,[2] ei manga wansa wọu kal᷊awọu puěngu anging! Pěmpẹ̌komol᷊ẹ̌ko su wal᷊ane pai.” O MAWU, pěngoroko sordado-Nu pěnekẹ si sire!

¹²MAWU e něhengetang kapia, ”Manga wansa e harusẹ̌ pěmpẹ̌dariahi kakoạ sol᷊ong Bal᷊ang Pělahukumang. Sene Iạ kụ MAWU e sarung měhukung u manga wansa ipělẹ̌lampung u manga umatẹ̌-Ku e.

¹³ I sire kai tumanịu ral᷊akisẹ̌; běbase i sire kere něměbasẹ̌ gandung maghurang su rahami. Tatahidaị e i sire kere něnahida anggorẹ̌ su ral᷊ungu papěhasengu anggorẹ̌ kụ napenẹ sarang tumompẹ.

¹⁴Dingangu hiwune taumata su Wal᷊ang Pělahukumang. Batụu paị sene e Ěllong MAWU e sarung tawẹ kararěnane marěnta.

¹⁵Matangěllo ringangu wul᷊ange narěndung, dingangu manga wituing e selain tawe natualagẹ̌.”

¹⁶ MAWU e lụhuang bọu Sion, bul᷊udʼE; bọu Yerusalem gụgal᷊ědụ tingihʼE. Langị dingangu dunia e ghụganuẹ kahian Sie. Arawe MAWU e sarung těbe tumatawang dingangu měngěllung Israel, umatʼE.

¹⁷”Ei Israel, ini e i kamene sarung masingkạ, u kai Iạ e MAWU Ruatanu. Iạ e natanạ su Sion, bul᷊udẹ̌-Ku nạung susi. Tangu Yerusalem mal᷊aing nakoạ soa kụ susi, kụ tau raghị e semben tawe lai makasuẹ̌.

¹⁸Su tempo ene manga wul᷊ude sarung mapenẹ u waelu anggorẹ̌. Binatang papiaraěnge sarung kumaěng děmpugẹ̌ su manga wul᷊ude matatawa e. Manga sal᷊ụ su Yehuda tawe masasue akene. Sal᷊ụ sěmbua e sarung melehẹ̌ bọu Wal᷊em MAWU, dingangu měholo Wal᷊ang Akasia ringangu akẹ burẹ̌si.

¹⁹Misirẹ̌ e sarung makoạ banua l᷊inggi, dingangu Edom e nal᷊ungguhẹ̌ kụ tawẹ u mẹ̌tanạ. Batụu i sire seng něnekẹ tau Yehuda, kụ němate tumanạ u wanua kụ tawẹ sal᷊ane.

²⁰Baugu rahan sire e sarung Takụ tuntukang bawal᷊ise,[3] i saing němate si sie sarung Takụ ěging. Arawe Yehuda ringangu Yerusalem sarung piạ u mạtanạ, dingangu Wul᷊udu Sion sarung tatapẹ̌ Takụ pẹ̌tanakeng.”