Read Sangir AMOS 2 Bible Online

AMOS 2 - Sangir bible

AMOS 2

¹ MAWU e něhengetang, ”Tumanạu Moab seng masau su sul᷊ene němpẹ̌dosa, ual᷊ingu ene nal᷊ahẹu Iạ e sarung měhukung i sire. I sire mělẹ̌hodatẹ̌ datung Edom kụ seng nate ene, kụ měmpěmungke lěbinge ringangu měngẹ̌ngal᷊ạ manga ruhine kụ tutungang pakakoạ awu.

²Ual᷊ingu ene, Iạ sarung maparěntaʼm putung su wanuang Moab, kụ pěnutung kal᷊awọu těndạ u Keriot sarang pakasue. Tau Moab sarung mate sutal᷊oarang pẹ̌sasekẹ, těntal᷊ang kạtiụ e slompretẹ̌, dingangu komandon sekẹ e wẹ̌bansageng.

³Makakawasa su Moab dingangu kěbị sawohị u mẹ̌paparenta u sarung Takụ pateěng.”

⁴MAWU e něhengetang, ”Tau Yehuda e seng masau su sul᷊ene němpẹ̌dosa, ual᷊ingu nal᷊ahẹ u Iạ e sarung měhukung i sire. I sire limawang kal᷊awọu parenta-Ku ringangu tawe mẹ̌papadul᷊i kal᷊awọu těntiro-Ku. I sire nipakapal᷊idẹ̌ kahiang manga ruata wal᷊ine kụ sẹ̌sěmbaěng i upung i sire.

⁵Ual᷊ingu ene, Iạ e sarung mapakarěntaʼm putung su Yehuda kụ měnutung kal᷊awọu těndạ u Yerusalem sarang pakasue.”

⁶MAWU e něhengetang, ”Tau Israel seng masau su sul᷊ene němpẹ̌dosa, ual᷊ingu ene nal᷊ahẹu Iạ sarung měhukung i sire. Taumata matul᷊idẹ̌ kụ tawẹ makasul᷊e ědange, seng niwal᷊ụ i sire nakoạ ěllang. Kerene lai pẹ̌kakoạ i sire su taumata kasiang kụ tawe makawaehẹ̌ utange, manilaing utang ene kětạeng kere arěgang sapatu.

⁷I sire nanědạ taumata lome kụ tawe makakoạ manga apa, ringangu mẹ̌gěnggaẹ̌ taumata kasiang. I amang dingangu anạ mělẹ̌himaugẹ̌ ěllang bawine mẹ̌sul᷊ung, hakịu makạsamedẹ̌ areng-Ku kụ susi e.

⁸Suapan tampạ u pẹ̌kakal᷊iomanengang, taumata e mẹ̌tẹ̌tikị dingangu pakeang kụ nial᷊ạ i sire kere wawaehẹ̌ utang bọu taumata kasiang. Su wal᷊eng Duatan sire, i sire mạnginung anggorẹ̌ nạung lẹ̌al᷊akeng i sire wọu taumata apang piạ utange si sire.

⁹ Manilaing kerene, ei umatẹ̌-Ku, kai waugʼi kamene hakịu Iạ napakawihuan tau Amori mararangẹ kere kalun cěmara ringangu matatoghasẹ̌ kere kalun terpentin.

¹⁰I kamene seng Takụ nipasěbang bọu Misirẹ̌, dingangu Takụ niahạ limiung ngara l᷊inggi ěpạ u pul᷊o su taunge karěngụ e. Ěntanan tau Amori sen Takụ nionggọ si kamene nakoạ banuang kamene hala.

¹¹ Iạ seng němile pirang katau wọu manga anạu mědeạu makoạ nabi, ringangu pira-pirang katau mangangudạ baugu makoạ sěngkatau Nazir.[2] Ei tau Israel, kai wal᷊inewe kahěngang tangu ene? Iạ e kai MAWU, kụ seng něhengetang.

¹²Arawe i kamene napěnginungu anggorẹ̌ suapan nakoạ Nazir hakịu i sire němpělandang kire. Dingangu i kamene němpẹ̌sěding manga nabi měhabaru tita-Ku.

¹³Orasẹ̌ ini e i kamene sarung Takụ sẹ̌dakeng sol᷊ong ěntana, sarang i kamene měmpẹ̌sal᷊indoro kere kareta napenẹ u lurange gandung.

¹⁴Tumal᷊ang masahawụ e mal᷊ain tawe makapěllọ; taumata matoghasẹ̌ e sarung kailangengu katoghase, dingangu taumata mal᷊ahasa e sarung tawe makaambang batangenge hala.

¹⁵Měmamitị tawe makatahang, tumatal᷊ang masahawụ e tawe makatal᷊angu watangenge ringangu sumasake kawal᷊o e tawe mal᷊iwirẹ̌.

¹⁶Su ěllo ene sordado kawahaniange mal᷊ain sarung maněntangu aghide, bọu e tumal᷊ang. Iạ e MAWU kụ seng něhengetang.”