Read Sangir AMOS 3 Bible Online

AMOS 3 - Sangir bible

AMOS 3

¹Pẹ̌daringihẹ̌ko titaʼm MAWU ini, ei tau Israel kụ seng niapasěbang bọu Misirẹ̌ kahiang MAWU! MAWU e něhengetang,

²”Bọu patikụ bansa su dunia, seng i kamene wansa mang sěmbaụ su kasingkạ-Ku ringangu Takụ kẹ̌kakěllaěng. Kụ kai ene e rosanu masaria, mase Iạ e mambeng nal᷊ahẹu měhukung i kamene.”

³Botonge ruang katau rumal᷊eng sěngkaral᷊eng kụ tawe mẹ̌dal᷊ahintau kal᷊imona?

⁴Makakoạ ngae singa humuang su kěhu, kereu i sie ren tawe nakạěbạ kinaěnge? Mariadi ngae anạu singa humuang su ral᷊ungu liange kereu i sie ren tawe nakạsamẹ apa-apa?

⁵Mariadi ngae manụ u kinoaěng ikasamẹ kụ kurungang, kamagengu tawẹ mẹ̌tataingu sedẹ? Sedẹ makaị ngae kamagengu wědang tawẹ apa nạsamẹ?

⁶Taumatan soane tawe mahungkende mạengu makaringihẹ̌ tingihu slompretẹ̌ tatialang paraěng ngae? Mariadi ngae soa sěmbaụ kahinoěngu hombang, kereu MAWU tawe nẹ̌děndingọ ngae?

⁷MAWU Limembong Karangetange tawẹ běke mẹ̌kẹ̌koạ apa-apa kụ tawe mělahẹu karakinʼE su manga nabi, manga ěllangʼE.

⁸Kereu singa humuang, i sai wue tawe matakụ? Kereu MAWU Limembong Karangetange mẹ̌bisara, i sai wue mẹ̌těngkarěmasu watangenge kụ tawe měhabaru tita-Ne?

⁹Paul᷊ịko ini su taumata apang mạtanạ su istanang Misirẹ̌ e ringangu Asdod, ”Pẹ̌tampungko su manga wul᷊ude mạngělikụ Samaria, ringangu tatinganeko pẹ̌gaghonggạ masaria ore lai pěmaměhạ kụ nariadi paị sene.”

¹⁰MAWU e něhengetang, ”Taumata ene mělẹ̌holo manga istanan sire ringangu manga apal᷊iwụ kụ kinaěbakeng bọu pěngangahěbụ dingangu katatingkaị. Sarangbe lai i sire mambeng běga marihutu mẹ̌těngkatul᷊idẹ̌.

¹¹Ual᷊ingu ene wanuan sire sarung tal᷊iwungang u sědụ, těndạ i sire ghoghaheng, dingangu kěbị istanan sire hampaseng.

¹²Kere sěngkatau měndal᷊ukadẹ̌ kụ makahombang kapia tumbạeng laedu domba sěmparẹ̌ arau tul᷊ine sěmpotọ kụ seng nitěmboěngu singa, kerene lai tumbạeng mahal᷊i matěntang bọu tumanạu Samaria kụ orasẹ̌ ini e rụdal᷊oka mạdimạ mapia su katatikilang i sire masasikome.”

¹³MAWU Kụ Limembong Kawasa ringangu Limembong Karangetange nẹ̌bera, ”Tatinganeko orasẹ̌ ini, ringangu paul᷊ikeko hěnton Yakub.

¹⁴ Su ěllone Iạ měhukungu tau Israel ual᷊ingu rosane, Iạ sarung mapakawinasang manga tampạu pananěmbaěng su Betel. Apan tampạ u pananěmbaěng sarung papědiang apam pondol᷊e sarang manawo su ěntana.

¹⁵Apaʼm bal᷊e kụ baugu musungu matěho ringangu manga wal᷊eʼm pěngangirol᷊oěng su musungu měhangu sarung Takụ ipakagholọ. Manga wal᷊e kụ nilẹ̌gahengu sunge ute ipakahaka; patikụ bal᷊e apang gaghaghuwạ e sarung magholang.