Read Sangir AMOS 5 Bible Online

AMOS 5 - Sangir bible

AMOS 5

¹Pẹ̌daringihẹ̌ko ei umatʼu Israel! Iạ hědo mẹ̌kantarịu kakantarị u ral᷊umpasiang u susa naung sěmbua waugʼi kamene:

²Israel seng nanawo i sie rem bědang parawang, kụ i sie sen tawe saụ makapẹ̌bangung kapia! Su wowong ěntanane hala, i sie niwala, kụ tawẹu reng naontol᷊ẹ̌ si sie nipararisị.

³MAWU Kasěllahenge něhengetang, ”Soa sěmbaụ su Israel napasěbangu sordado sěhiwu su kataune, arawe nẹ̌sul᷊e tumbạeng mahasụ; soa wal᷊ine napasěbang u mahasụ su kataune, kụ nẹ̌sul᷊e tumbạeweng mapul᷊o.”

⁴MAWU e něhengetang su manga umatu Israel, ”Pẹ̌sul᷊ẹ e su anu-Ku, tangú i kamene sarungbe mẹ̌biahẹ̌.

⁵Kumbahang tamai sol᷊ong Bersyeba waugu mẹ̌tahamawu. Kumbahang mẹ̌deạ si Siạ su Betel, u Betel kai sarung matadise. Abe lai kakoạ sol᷊ong Gilgal, u tumanạu soa ene sarung hengketang sol᷊ong pinamembangeng.”

⁶Pẹ̌sul᷊ẹ e su anum MAWU, tangú i kamene sarung mẹ̌biahẹ̌. Kereu i kamene tawe měmpẹ̌sul᷊e su anun Sie, i Sie sarung duměnta kere putung mẹ̌dẹ̌darakị dingangu měnutung tau Israel pakasue. Su Betel tawẹ u sarang sěngkatau makasěbu putung ene.

⁷Kạěngkěhang i kamene, i kamene apang měmpạngal᷊intuing kaadilẹ̌ dingangu lụl᷊ia tataghuaneng u taumata!

⁸ MAWU e nẹ̌koạ manga wituing su winangaeng — wituing Katělluang dingangu wituing Pahi. I Sie měmẹ̌mal᷊ui kararěndung makoạ tualagẹ̌ dingangu ěllo makoạ hěbi; akẹ u sasị sẹ̌sěbohangʼE surul᷊unge. Mẹ̌kakoạ kěbị ene tangú arengʼE kawe MAWU.

⁹I Sie mạminasa taumata kawasa ringangu wal᷊oarị i sire.

¹⁰I kamene mạběnsing u taumata kụ dụdokạ tạ kaadile ringangu apang měmpẹ̌bẹ̌bisarang katul᷊idẹ̌ su ral᷊ungu kạadilẹ̌.

¹¹I kamene měnẹ̌nědạ taumata kasiang dingangu gandung i sire lẹ̌hampaseng i kamene. Ual᷊ingu ene i kamene sarung tawe matanạ su manga wal᷊eng kamene maral᷊ěnggihẹ̌, kụ seng nipětị i kamene ene. I kamene tawe sarung měnginung anggorẹ̌ bọu manga waelu anggorẹ̌ nạung nisuang i kamene.

¹²Iạ e masingkạ u enẹ e kasariane karal᷊akisu ringangu apạe kal᷊awọe rosanu. I kamene němpěnědạ taumata mapapia; i kamene němpěnarimạ u sasorokẹ̌ dingangu němalan tau kasiang nikoạ tạ kaadile su pěnggaghutaěng.

¹³Ual᷊ingu kakanoạu ene, tangu kal᷊awọu taumata apang pelesa makạpěndang u mạpiaěngbe marěmasẹ̌ su tempong karal᷊akisẹ̌ kerene.

¹⁴Pẹ̌tawakal᷊iko pẹ̌koạ mapia ringangu kumbahang mẹ̌koạ dal᷊akisẹ̌, tadeạu i kamene mẹ̌biahẹ̌. Tangu MAWU Limembong Kawasa e sarung kahěnga-hěngang matanạ su tal᷊oarang kamene kere iwẹ̌berang kamene.

¹⁵Kawěnsingken dal᷊akisẹ̌, karalọkoʼm mapia ringangu pẹ̌disịkong kạadilẹ̌. Kiwuạu MAWU e sarung kuměndagu taumata apan nal᷊ěmbe wọu tau Israel.

¹⁶MAWU Limembong Kawasa e něhengetang, ”Su manga ral᷊engu soa, taumata e sarung mẹ̌kẹ̌kiạ dingangu lụlungkangu susa naung. Sarang manga mělahěnsinuang sarung kuiang mědeạu apasangị sěngkasangị dingangu taumata kụ bẹ̌baehang mědeạu lumungkangu tau nate.

¹⁷Su patikụ baelu anggorẹ̌ e taumata sarung mahungkiạ u Iạ diměnta ringangu měhukungu i kamene. Iạ e kai MAWU, kụ seng něhengetang.”

¹⁸Mambeng kạěngkěhang i kamene kụ mẹ̌kẹ̌karalọ u ěllong MAWU! Apa wue gunane ěllo ene si kamene? Ěllo ene kětạeng nakoạ kere ěllo kụ marěndung, bal᷊inewe ěllo kụ matualagẹ̌ si kamene.

¹⁹Kakakoạ e ute mẹ̌sul᷊ungu taumata kụ timal᷊angu watangenge wọu singa, kutẹu kawe nẹ̌sombangu běruang. Arau kere taumata kụ napul᷊ẹ sol᷊ong bal᷊e kụ nẹ̌tiningkondọu l᷊imane su meselẹ̌, kụ bọu ene nikikiʼn těmpu!

²⁰Ělloʼm MAWU mambeng makạkaděntang kararěndung, bal᷊inewe tualagẹ̌ — ěllo e mal᷊uẹ̌ kụ masunaubẹ̌.

²¹ MAWU e něhengetang, ”Iạ e mạběnsing dingangu seng masahe makasilo tundung pěngangagamang kamene.

²²Kamagengu i kamene mẹ̌bawa sasěmba tẹ̌tutungang dingangu sasěmba gandung, Iạ e tawe měnarimạ u ene. Iạ mạdiri měnarimạ u manga binatang i kamene matatawa ene kụ isẹ̌sěmbang kamene si Siạ kere sasěmbang pẹ̌darame.

²³Ědọ e kal᷊awọu kakantarị i kamene makạsěmbeng ene; Iạ madiri rumaringihẹ̌ tingihu kobị u kěcapinu.

²⁴Mạěndokangbe pẹ̌tawakal᷊i tadeạu kạadilẹ̌ melehẹ̌ kere akẹ, dingangu katul᷊idẹ̌ e mẹ̌sul᷊ungu sal᷊ụ kụ tawẹ maral᷊ẹ̌sa.

²⁵ Ei umatʼu Israelẹ̌, su tempong Iạ něngahạ i kamene limiu ngara l᷊inggi ěpạ u pul᷊o su taunge karěngụ e, Iạ e tawe něnuntụ sasěmba ringangu ghaghěllị bọʼi kamene.

²⁶Arawe orasẹ̌ ini e i kamene kawe mạněmba si Sakut ikẹ̌koạ datung kamene e, ringangu i Kewan, kere wituing sẹ̌subaěng i kamene. Ual᷊ingu ene manga tul᷊ada kụ nikoạ i kamene ene, harusẹ̌ hengkẹ i kamene hala.

²⁷Su tempong Iạ měnděmmẹ i kamene sarang banua sěmbaụ kụ limembong karaune wọu Damsyik. Iạ e kai MAWU Ruata Limembong Kawasa e seng něhengetang.”