Read Sangir AMOS 9 Bible Online

AMOS 9 - Sangir bible

AMOS 9

¹Iạ nakasilo MAWU e rụdarisị su rěduhu tampạ u pananěmbaěng. I Sie něngonggọu tita ini, ”Banggoko pakaihạ-ihạ kal᷊awọu těmbọu rihi su Wal᷊e-Ku tadeạu kal᷊awọu panonggene masue mahungkiọ. Lenggeko kal᷊awọu rihi ene pěngěpisẹ̌ taumata su těmbọ e. I sire apam bědang biahẹ̌ Takụ pateěng su ral᷊ungu pẹ̌sasekẹ. Tawẹ u sarang sěngkatau makatal᷊ang dingangu tawẹ u sarang sěngkatau mal᷊iwirẹ̌.

²Manilaing i sire matěpasu tampạ u taumata nate, Iạ e sarungbe makaal᷊ạ si sire. Manilaing i sire makoạ sarang langị, Iạ sarung mapakarělusʼi sire wọu ene.

³Kereu i sire mẹ̌kěmbuni su wowong Bul᷊udu Karmel, Iạ e sarung mědeạ dingangu měnamẹ si sire. Mạengu i sire měkěmbuni su wal᷊ang laudẹ̌, Iạ sarung měngoro nagạ u l᷊audẹ̌[7] pěngikị si sire.

⁴Kereu i sire itaweng u sekẹ, Iạ sarung měngoro tadeạu i sire pakipate. Iạ e piạ naungku mapakawinasan sire, ringangu tawe maontol᷊ẹ̌ si sire.”

⁵Banua e kumiọ dingangu tumanạ e rụdal᷊umpasiang, u nisenggehangu MAWU Kasěllahenge ringangu Limembong Kawasa. Mẹ̌sul᷊ungu Sal᷊ụ u Nil lumanabẹ̌ ringangu maohọ kerene kakoạ i sire mawị dingangu marělusẹ̌.

⁶MAWU e měmangung bal᷊enʼE su winangaeng marau, su wowom banua e niěmpahʼE langị kere sandala, dingangu akẹ bọu l᷊audẹ̌ e niwěmbingʼE su rul᷊unge, kụ nipakariadim patikụ ene tangú arengʼE ute kai MAWU!

⁷MAWU e něhengetang, ”Ei umatu Israel, Iạ tụtatingang tau Sudan mẹ̌sul᷊ungkeweng Iạ tụtatingang si kamene. Iạ e seng nẹ̌bawa tau Pilistin bọu Kreta ringangu tau Siria wọu Kir, mẹ̌sul᷊ungu Iạ nẹ̌bawa si kamene wọu Misirẹ̌.

⁸Iạ e, MAWU Kasěllahenge, kạpěnẹ̌nitị e kararatuangu Israel baradosa ini e, ringangu Iạ e sarung mapakapuạ u ene wọu wowon dunia. Arawe hěnton Yakub bal᷊inewe kěbị sarung Takụ ipakawinasa. Iạ e, MAWU kụ seng něhengetang.

⁹Iạ e sarung měngonggọu tita ringangu měmal᷊iri tau Israel kere měmal᷊iri gandung su ral᷊ungu nihung. Baugu mapakaraung kěbị apan tawẹ gunane su tal᷊oaran sire, Iạ e mělaụ i sire su tal᷊oarang manga wansa.

¹⁰Taumata apang barạdosa su tal᷊oarang umatẹ̌-Ku e nẹ̌bera, ’Duata e sarung tawe mapakawalang kitẹ e ambungangu hombang.’ Kaiso, i sire sarung pateěng su pẹ̌seketang.”

¹¹ MAWU něhengetang, ”Sarung midatingu tempone Iạ e měngul᷊ị kararatuang i Daud kapia. Orasẹ̌ ini e kararatuang ene seng nakoạ kere wal᷊e nahaka. Kaiso manga mesele sarung Takụ ul᷊ikang dingangu Takụ pětikang kapia hakịu makoạ kere nạung kal᷊imona-mona.

¹²Tau Israel sarung mẹ̌kawasa wanuang Edom kụ bědang nal᷊ěmbe ringangu kal᷊awọu wansa nạung kal᷊imona e tataghuaneng-Ku. Iạ e kai MAWU, kụ seng něhengetang dingangu Iạ sarung mẹ̌koạ hal᷊ẹ̌ ene.”

¹³MAWU e něhengetang, ”Sarung mịdating tempone gandunge tumuwo kereng kasahawụ e hakịu musungu měměnsạ tawẹ apa pontode. Kalung anggorẹ̌ e sarung tumendang maral᷊ighạ, hakịu taumata tatapẹ̌ mẹ̌kẹ̌koạ akẹ u anggorẹ̌. Akẹ u anggorẹ̌ e sarung tumědọ bọu manga wul᷊ude kụ melehẹ̌ bọu manga wěntihe.

¹⁴Iạ e sarung mapakariading manga umatẹ̌-Ku Israelẹ̌ e masorogạ kapia. I sire sarung měmangung lai manga soan sire kụ nạung naghoghahẹ̌, kụ i sire sarung matanạ sene. I sire sarung měmpẹ̌suang manga waelu anggorẹ̌ e, ringangu měmpanginung akene. I sire sarung mahěnsinuang, dingangu mẹ̌biahu ual᷊ine.

¹⁵Iạ e sarung měměllọu umatẹ̌-Ku e su wanua kụ seng nionggọ si sire. I sire semben tawe lai sarung sawukang bọu paị ene. Iạ e MAWU Ruatan sire kụ seng něhengetang.”