Read Sangir YUNUS 1 Bible Online

YUNUS 1 - Sangir bible

YUNUS 1

¹ Piạ sěhěllo e, MAWU nẹ̌bisara si Yunus, anạ i Amitai.

²AngkuěngʼE, ”Dakọko sarang Niniwe, soa ghẹ̌guwạ ene, waugu ipěmatakụ batụu Iạ e masingkạ u tumanạ u e mamben dal᷊akị-lakisẹ̌.”

³Arawe i Yunus katewe mal᷊ạ dimal᷊eng nẹ̌deạ timonane wal᷊ine mědeạu mẹ̌těngkaraung MAWU. I sie nakoạ sarang Yopa, dingangu nẹ̌sarětạu nẹ̌sombang u kapal᷊ẹ̌ kụ mẹ̌buạ sarang Spanyol. Bọuteng němaehẹ̌ ongkosu raral᷊enge, i sie simake kapal᷊ẹ̌, kụ nẹ̌sakaeng dingangu masanaeng kapal᷊ẹ̌ e sarang Spanyol, tadeạu mẹ̌těngkarau wọu anum MAWU.

⁴I Yunus diměsung nẹ̌deạ bal᷊ahuangu kapal᷊ẹ̌ mase rimal᷊oka sene, sarang kinahuntikilang mal᷊ěna-l᷊ěnabẹ̌. Bọu ene MAWU e naparěntang anging maihạ su l᷊audẹ̌, tangú nariadị e suwu-suwu marasai, kụ timanggạ e kapal᷊ẹ̌ e hakịu masarạ magholang. Masanaeng kapal᷊ẹ̌ e natakụ-takụ kụ němpẹ̌bansagẹ̌ makitul᷊ung su mahan duatan sěngkatau-sěngkatau e. Mědeạu mẹ̌tihọ u tumanị u masiladẹ̌ e[1] i sire němpěnděmmẹ u lurangu[2] kapal᷊ẹ̌ e sěnggạ sarang laudẹ̌.

⁶Su tempong kapiteěngu kapal᷊ẹ̌ ene riměsung sarang bal᷊ahuange, i sie nakaěbạ si Yunus kapẹ̌tẹ̌tikị e sene. Kụ nẹ̌berạ e i sie, ”Seng tumanịu i kau makạtikị banua kere ini! Hotede pẹ̌bangungko, pẹ̌kal᷊iomanengko su mawunu kụ pakitul᷊ung. I saiwe masingkạ i sie sarung tumal᷊ěntụ i kitẹ e kụ i kitẹ e tawe mawinasa.”

⁷Bọuteng i Yunus dingangu kapiteěng e nawị sarang bowone rasị, mangạewe masanaeng kapal᷊ẹ̌ e němpahumbisara l᷊awọ i sire, ”Mahịe i kitẹ měnawụ lotẹ̌ tadeạu i kitẹ e masingkạ u kai i sai nẹ̌sal᷊a hakịu i kitẹ e nionganengkeng hombang ini!” Ene němpěnawụ e lotẹ̌ i sire e, kụ arengkeng Yunusẹ̌ e nikahinoěnge.

⁸Bọu ene angkuěng i sire e si Yunus, ”Kahěngang i kau e nakaongang silakạ ini? I kau kai wọu a? Tau a? Unụ e i kau sini?”

⁹Sasimbangi Yunus, ”Iạ e tau Ibrani. Iạ měněmba MAWU Ruata su sorga, kụ něndiadi laudẹ̌ dingangu rul᷊unge.”

¹⁰Bọu ene niwěkene kereapa i sie nẹ̌tawakal᷊i timal᷊angu wadange wọu anum MAWU. Nakaringihẹ̌ ene manga masanaeng kapal᷊ẹ̌ e sahuneng něngkatakụ, kụ nẹ̌bera si sie, ”Kai tawẹ adate kahěngang kakanoạu ene!”[3]

¹¹Těntal᷊ang ene e děllang e mangkeng kạpahuntinambane, mase manga masanaeng kapal᷊ẹ̌ e němpẹ̌kiwal᷊ọ e si sie, ”Kai apạ e hinong koateng i kami si kau e tadeạu rěllang ini e mal᷊ěda?”

¹²Sasimbang i Yunus, ”Děmẹ e iạ sarang dal᷊ungu laudẹ̌, nal᷊ahẹ u rěllang e sarung mal᷊ěda. U orasẹ̌ ini e iạ masingkạ, u kai nạung iạ e nakaongang děllang maihạ ini e nihombang si kamene.”

¹³Kaiso manga masanaeng kapal᷊ẹ̌ e wědang mẹ̌tẹ̌tawakal᷊i sěngapam botonge mẹ̌děndalung kapal᷊ẹ̌ e sarang dul᷊unge. Kaiso rěllange mangkeng kapẹ̌tẹ̌tondaise lai, hakịu tawakal᷊ing sire e mamben tawẹ kěhase.

¹⁴Ual᷊ingu ene i sire kimahiorọ su MAWU, ”O MAWU! I kami mẹ̌dorong kereu wotonge kumbahangbe i kami mawinasa, ual᷊ingu něngal᷊ạ himukudu taumata kụ tawe nẹ̌koạ manga pẹ̌sasal᷊a apạ e si kami. O MAWU! I Kau e seng nẹ̌koạ apang kụ kẹ̌kapulu-Nu e.”

¹⁵Bọu ene i sire něnděmmẹ i Yunus sarang dal᷊ungu laudẹ̌. Tangu rěllang ene něngědọ e nẹ̌kalulu.

¹⁶Manga masanaeng kapal᷊ẹ̌ e něngkatakụ e kahěngang su MAWU, ringangu sarětạeng nahumpạ u rul᷊unge, i sire e němpěnarakangu sasěmba gaghěllị dingangu nẹ̌dianding kal᷊awọu haghing patikụ e su MAWU.

¹⁷ Těntal᷊ang ene MAWU e naparěntang kinạ gẹ̌guwạ sěmbua kụ něnelohẹ̌ si Yunus. Tangú natanạ e i Yunus su ral᷊ungu tiangu kinạ ene e karěngụ u těllu ěllo těllu hěbi.