Read Sangir YUNUS 2 Bible Online

YUNUS 2 - Sangir bible

YUNUS 2

¹Bọu ral᷊ungu tiangu kinạ ene e, i Yunus nẹ̌kal᷊iomaneng su MAWU Ruatane. Angkuěnge,

²”O MAWU, su ral᷊ungu kasasusaku iạ e mẹ̌kẹ̌kui si Kau, kụ i Kau e simimbang si siạ. Bọu runian tau nate iạ e mẹ̌gẹ̌gausẹ̌ tul᷊umang, kakindoạku e niraringihangʼU ringangu nẹ̌naungangʼU.

³Sarang tampạ kụ maral᷊ung iạ e nirěmmẹʼU, sarang běntang laudẹ̌. Sene iạ e nilikutangu sěllihe, luạ dingangu mělisange něngěnsạ u iạ.

⁴Su ral᷊ungu naungku e iạ mẹ̌bẹ̌bera: MAWU e seng něnokol᷊u iạ ini wọu těngo-Ne. Iạ e sembelain tawe makasilo wal᷊e katatakengʼE kụ susi.

⁵Sasị e naawị sarang biwihẹ̌ku, laudẹ̌ mal᷊oange něliwung kạguwạu wadangku e, gilamung laudẹ̌ e nělawung těmbọku.

⁶Iạ e timumpa sarang bal᷊ang bawul᷊urange, sarang alang kụ pasěllangenge mạkạkunsị sarang pěngěnsueěngu tempo.[4] Himukudẹ̌ku e naral᷊owe su ral᷊ungu wadangku mase iạ e nẹ̌tahěndung dingangu nẹ̌kui si Kau. Tangú nahumpạ e kakal᷊iomanengku si Kau, su ral᷊ungu Wal᷊e-Nu kụ susi e. Mase i Kau e napaawị u iạ bọu ral᷊ungu laudẹ̌, O MAWU Ruataku!

⁸Apaʼm něnaněmba mahan duata kụ sia-sia e, naněntang i Kau ringangu sen tawẹ lai satiane.

⁹Arawe iạ sarung mẹ̌kantarị u raralo waugʼi Kau, kụ takụ isěmba ghaghěllị si Kau e. Kal᷊awọu riandiku e sarung takụ koateng. I Kau e MAWU kụ makasal᷊amatẹ̌.”

¹⁰Bọu e ual᷊ingu parentaʼm MAWU e, kinạ ene e něluang Yunus su rul᷊unge.