Read Sangir YUNUS 4 Bible Online

YUNUS 4 - Sangir bible

YUNUS 4

¹I Yunus mamben tawẹ dal᷊uase su hal᷊ẹ̌ ene; i sie katewe mal᷊ạbe nẹ̌pědu.

² Bọu e i sie nẹ̌kal᷊iomaneng, ”O Mawu, bal᷊inewe sen takụ pinẹ̌bera kal᷊imonang nẹ̌buạ bọu wal᷊eku e kal᷊imona, u i Kau e nal᷊ahẹ u sarung mẹ̌koạ kere ini? Kai ual᷊ingu ene hakịu iạ e apidu timal᷊angu wadang sarang Spanyol! Iạ e masingkạ u i Kau e kai Ruata matal᷊ěntụ dingangu makěndagẹ̌ naunge manandụ, masikome ringangu sěntiniạ sadia waugu měmal᷊ui karakiʼm pělahukung.

³ Orasẹ̌ ini e, MAWU, balạekere iạ kapapatene, u mapiawe iạ mate sul᷊ungu wiahẹ̌.”

⁴Angkuěngu MAWU, ”I kau e tawẹ apa wanggile waugu mẹ̌pědu kerene.”

⁵Bọu ene i Yunus e nakoạ sarang sěmběkan daki wọu soa, wọu ene naiang sene. I sie nẹ̌koạ selo sěmbaụ mase nẹ̌těngkaěllung su ral᷊unge, kạpěngampal᷊e měnsang apa nariadi su soang Niniwe.

⁶Tangú MAWU Ruata e napatuwong sasuang sěmbaụ mělẹ̌lawe kụ makạonggọ u pẹ̌kakěllungang si Yunus kụ i sie makạpěndang mapia. Kahěngang bue, i Yunusẹ̌ e lẹ̌lahimpuluangu sasuang ene!

⁷Arawe sěngkariọěllone su tempong kalonge, Mawu Ruata e napakariadin lěheng sěmbua e piněngahutabẹ̌ hamụ u sasuang ene, hakịu nalolang.

⁸Sarangbe matangěllo e siměbangke, Duata e naparěntang anging matětị e kụ timiụ bọu sěmběkan daki. I Yunusẹ̌ e maraning mapinsang ual᷊ingu nikahinoěngu sěnnangu matangěllo kụ al᷊ingkai měhěngisẹ̌ těmbọ e. I sie e napěndụ naunge kụ mapulu mate. Angkuěnge, ”Mapiawe iạ mate sul᷊ungu mẹ̌biahẹ̌!”

⁹Arawe Mawu Ruata e něhengetang si sie, ”I kau e tawe hinone tumanịu masusa naungu e ual᷊ingu sasuang ene!” Sasimbangi Yunus, ”Kawe unụe tala? Sembeng hinone iạ e mẹ̌pědu kahěngang sarang mate.”

¹⁰Bọu e angkuěngu MAWU e si sie, ”Sasuang ini e timuwo su ral᷊ungu sěhěbi samatang, dingangu i sie e malolang su ěllo tuhụ e; i kau e mamben těngadẹ̌ tawe napatuwon sie arau tawe nẹ̌padul᷊i kaiso maning kerene i kau nakapěndang masusa ual᷊ingu i sie nalolang.

¹¹Unụ e wue Iạ tawe masusa naungku mẹ̌sipiru Niniwe, soa gẹ̌guwạ ene. U sul᷊iung manga binatange kụ tawe karekenang ene e, sene lai kaěbakeng něngalembo wọu 120.000 su kataune manga rariọ kụ bědang makạpẹ̌dal᷊ahaedu apang mapia ringangu apan dal᷊akisẹ̌ e.”