Read Sangir PẸ̌TATIẠ 10 Bible Online

PẸ̌TATIẠ 10 - Sangir bible

PẸ̌TATIẠ 10

¹MAWU e něhengetang si Musa,

²”Pẹ̌koạko slompretẹ̌ darua wọu sal᷊aka nisěsal᷊ẹ̌ baugu ipẹ̌kui kawanua pẹ̌tampung arau ipěngoro si sire pẹ̌buạ.

³Kereu slompretẹ̌ darua e tiukang pakanandụ, ute kal᷊awọu umatẹ̌ e harusẹ̌ pẹ̌tampung pěngělikụ si kau su těngon sasuěkangu Tenta-Ku.

⁴Arawe kamagengu tumbạeng sěmbaụ tiukang, ute kětạeng apan těmbonange harusẹ̌ mẹ̌tampung mangělikụ si kau.

⁵Kereu slompretẹ̌ tiukang mananimbụ, ene tatialan manga hěnton taumata kụ měmpẹ̌dẹ̌daseng su sěmběkan daki e harusẹ̌ měmpẹ̌buạ.

⁶Kereu kawe tiukang pakanimbụ baugu karuan sul᷊ene, ute apang hěnto su sěmběkan timuhẹ̌ e harusẹ̌ apěbuạ. Ual᷊ingu ene tingihe mananimbụ e ute tatialang umatẹ̌ e harusẹ̌ měmpẹ̌buạ,

⁷arawe tingihe manandụ mangal᷊ene ute umatẹ̌ e harusẹ̌ mẹ̌tampung.

⁸Manga slompretẹ̌ e ene harusẹ̌ tiukang u manga imang, manga anạ i Harun. Kụ kawe seng ene atorange kụ hinon tuhukang i kamene sarang marěngụ-děngụ.

⁹Kụ kereu i kamene mẹ̌sekẹ su wanuanu mědeạu mẹ̌tahutěndạ u watangeng bọu rokạ kụ měngalo, ute pěniụko manga slompretẹ̌ ene. Tangú Iạ MAWU Ruatanu, sarung mẹ̌tul᷊ung dingangu mapakasal᷊amatʼi kamene wọu manga sědụ u e.

¹⁰Su ěllọeweng lai i kamene měmpahul᷊uasẹ̌ kụ su mangạewe sal᷊iwang u Wul᷊ang Buhu ringangu mangạewe pěmamantugẹ̌ ěllo wal᷊ine, slompretẹ̌ ene harusẹ̌ tiukang su tempong i kamene maněmban sasěmba tẹ̌tutungang dingangu sasěmbaʼm pẹ̌darame si Siạ. Tangú Iạ sarung mẹ̌tul᷊ung i kamene. Iạ e kai MAWU Ruatanu.”

¹¹Su ral᷊ungu taung karuane samurin tau Israel naněntangu Misirẹ̌, su tanggalẹ̌ karuam pul᷊one su wul᷊ang karuane, nasapuạ e winawa wọu wowon Tentaʼm MAWU.

¹²Bọu e tau Israel mẹ̌tẹ̌tatol᷊e nẹ̌buạ němpěněntangu linggin Sinai, ringangu winawa ene naědung su tempong i sire nahumpạ u ngaran Paran linggi e.

¹³Seng ene pẹ̌bawuạ i sire humotong su parentan MAWU pinakihabarẹ̌ si Musa.

¹⁴Kakal᷊imonaěnge nẹ̌buạ ute kai sordado kụ nạung mẹ̌tẹ̌těngkaěllung su al᷊ungu wanehang kasasěmbaụ u Yehuda, buntuang mẹ̌gẹ̌gaghanti wuntuang: i Nahason, anạ i Aminadab e měngẹ̌ngahạ barisangu hěnton Yehuda,

¹⁵i Netaneel anạ i Zuar něngahạ barisangu hěnton Isakar,

¹⁶dingangu i Eliab anạ i Helon něngahạ barisangu hěnton Zebulon.

¹⁷Bọu e Tentaʼm MAWU e nighoghahẹ̌, kụ nẹ̌buạ e ghal᷊ipohong Gerson dingangi Merari kụ němasaěng Tenta ene.

¹⁸Mase nẹ̌buạ e sordado nạung mẹ̌tẹ̌těngakěllung su al᷊ungu wanehang kasasěmbaụ i Ruben, buntuang mẹ̌gẹ̌gaghanti wuntuang: i Elizur anạ i Syedeur něngahạ barisangu hěnton Ruben.

¹⁹I Selumiel anạ i Zurisyadai něngahạ barisangu hěnton Simeon;

²⁰dingangu i Elyasap anạ i Rehuel něngahạ barisangu hěnton Gad.

²¹Bọu ene něbuạ e tau Kehat němpěmasaěng apal᷊iwụ susi. Kereu i sire nahumpạen tampạ u pẹ̌darasengang tuhụ e, Tentaʼm MAWU e seng saụ nisakẹ kapia.

²²Bọu ene nakatol᷊e sordado kụ nạung mẹ̌tẹ̌těngkaěllung su al᷊ungu wanehang kasasěmbaụ u hěnton Efraim, buntuang mẹ̌gẹ̌gaghanting buntuang: i Elisama anạ i Amihud něngahạ buntuangu hěntong Efraim,

²³Gamaliel anạ i Pedazur něngahạ barisangu hěnton Manasye,

²⁴dingangu i Abidan anạ i Gideoni něngahạ barisangu hěnton Benyamin.

²⁵Pěngěnsueěnge něbuạ e sordado kụ nạung mẹ̌tẹ̌těngkaěllung su al᷊ungu wanehang kasasěmbaụ hěnton Dan. I sire ene kai měndariagạ likudu patikụ buntuang. I sire rụdal᷊eng buntuang mẹ̌gẹ̌gaghanting buntuang: i Ahiezer anạ i Amisyadai něngahạ buntuang u hěnton Dan.

²⁶I Pagiel anạ i Okhran něngahạ barisang u hěnton Asyer,

²⁷dingangu i Ahira anạ i Enan něngahạ barisangu hěnton Naftali.

²⁸Kai ene pẹ̌tatuhukang u pẹ̌bawarisu tau Israel, buntuang mẹ̌gẹ̌gaghantim buntuang balạewe apang pẹ̌bawuạ i sire měmpěngal᷊ing.

²⁹I Musa e nẹ̌bera su ipage i Hobab anạ i Rehuel tau Midian, ”I kami sarung mẹ̌buạ sarang tampạ kụ angkuěng u MAWU e sarung ionggọ si kami. MAWU e seng nẹ̌diandi mapia su tau Israel. Kụ tol᷊ẹ e, i kami e hědong mẹ̌koạ mapia si kamene.”

³⁰Sasimbangi Hobab, ”Tarimakasẹ, kai arawe iạ mẹ̌mẹ̌nningu mẹ̌sul᷊e sol᷊ong soang kami piněmitingang puidẹ̌.”

³¹”Kumbahangbe itěntang i kami,” angkuěng i Musa, ”i kau e wotonge makoạ měngangahạ u ral᷊eng baugʼi kami, batụu i kau e masingkạ suapa i kitẹ botonge makapẹ̌daseng su kěhu linggi.

³²Kereu i kau tumol᷊e, tangú patikụewe apang kụ kinoạ u MAWU e si kami sarung koateng i kami e lai si kamene.”

³³Samurin tau Israel naněntangu Sinai, wul᷊ude katatanakengu MAWU, i sire rimal᷊eng těllu ěllo karěngụe. Petiʼm Pẹ̌dariandiʼm MAWU masau wawaěng pěngal᷊imona si sire baugu pědeạ tampạ pẹ̌darasengang i sire.

³⁴Kereu i sire mẹ̌buạ bọu pẹ̌darasengang, binawaʼm MAWU sidutu mang ene su lantehu pusigi sire su tempong ěllo rangẹ.

³⁵ Balạewe Petiʼm Pẹ̌dariandi e hengketang, i Musa nẹ̌bera, ”Pěbangungke, o MAWU, kal᷊iaesěko sědụʼU hakịu apan měbẹ̌binsị i Kau e masịtal᷊ang u watangenge.”

³⁶Kụ balạewe apan Petiʼm Pẹ̌dariandi ene mahumpạ su tampạ pěngirol᷊ong, i Musa nẹ̌bera, ”Pẹ̌sul᷊e wue MAWU, sol᷊ong anung balagu tau Israel dingangu hiwune.”