Read Sangir PẸ̌TATIẠ 12 Bible Online

PẸ̌TATIẠ 12 - Sangir bible

PẸ̌TATIẠ 12

¹I Musa seng něngal᷊ạ sěngkatau wawine tau Kus nakoạ kawinge, kụ hal᷊ẹ̌ ene e nikoạ alasang i Miryam dẹ̌duang Harun mědeạu měheghesẹ̌ si Musa.

²Angkuěng i sire, ”Kai kětạeng si Musa MAWU e mẹ̌bisara tangu? Unụe wal᷊inewe lai si kitẹ e i Sie mẹ̌bisara tangu?” MAWU e rụdaringihẹ̌ apang iwẹ̌beran sire.

³I Musa e kai tau naunge masanạ-sanạ, něngalembo wọu patikụ taumata kụ mẹ̌bẹ̌biahẹ̌ su dunia ini.

⁴Sěngkianụ e MAWU něhengetang si Musa, i Harun dẹ̌duang Miryam, ”I kamene těllu kakoạko sol᷊ong Tenta-Ku.” Mase i sire natamai sol᷊ong paị ene

⁵kụ MAWU riměllusẹ̌ su ral᷊ungu rihi winawa. MAWU e rimarisị su tukadu TentanʼE kụ nẹ̌kui si Harun dingang i Miryam. I rẹ̌dua ene mambeng mal᷊intoị,

⁶kụ MAWU e něhengetang, ”Pẹ̌daringihẹ̌ko manga wawera-Ku ini! Kereu sutal᷊oarang kamene piạ sěngkatau nabi, Iạ e reng mẹ̌tẹ̌ngkatodẹ u watangeng-Ku si sie su ral᷊ungu manga papasilo, ringangu mẹ̌bisaran sie su ral᷊ungu ipi.

⁷ Kaiso wal᷊inewe kerene ringangu ěllang-Ku i Musa. Seng i sie taumata kụ satia sutal᷊oarang umatẹ̌-Ku.

⁸Mase Iạ mẹ̌bisaran sie reng mẹ̌těngong gati, pakal᷊ahẹ dingangu tawẹ deng piạ tatinggunge. Sarang lai ghahị-Ku seng kinasilone! Unụe wue i kamene wahani rumokạ si Musa, ěllang-Ku ene?”

⁹MAWU e limangehẹ̌ marasai si rẹ̌dua, kụ i Sie napul᷊ẹ.

¹⁰Ené piạ e winawa e naněntangu Tentaʼm MAWU, tangú kinasilọ e i Miryam nirorokangu sakị su pisị makạtatakụ; pisine mawira kere kapesẹ̌. Ene i Harun něbihu e si Miryam kụ nakasilọ e si sie nạung seng nirorokangu sakị ene,

¹¹něberạ e i sie si Musa, ”Tul᷊ungko, Tuang, abe wala i kami pakasunsara kahian dosa nikoạ i kami su ral᷊ungu karal᷊ongong i kami.

¹²Abe wala i sie makoạ kere rariọ kadodọ nawantelẹ̌ kụ seng nate, kụ gěsine seng mal᷊oarang buhụ e.”

¹³Tangú nẹ̌kiaratage i Musa su MAWU, ”O Ruata, ěllangu ghụgahiorọ, milumbạko i sie reng mapia!”

¹⁴ MAWU e simimbang, ”Manga andene ghatine kawe ěduang i amange, kai wal᷊inewe karěngụ u pitu ěllo i sie harusẹ̌ měnanggung meane? Geako i sie wọu pẹ̌darasengang karěngụe pitu ěllo, kụ bọu ene wotonge saụ pasuẹ̌.”

¹⁵Bọu e i Miryam nipasěbang bọu pẹ̌darasengang karěngụ e pitu ěllo, kụ bansa ene tawe něngal᷊ing bọu tampạ ene sarangi Miryam pinakawala mẹ̌sul᷊e kapia sol᷊ong pẹ̌darasengang.

¹⁶Bọu e i sire naněntangu Hazerot kụ nẹ̌daseng su Linggin Paran.