Read Sangir PẸ̌TATIẠ 13 Bible Online

PẸ̌TATIẠ 13 - Sangir bible

PẸ̌TATIẠ 13

¹MAWU něhengetang si Musa,

²”Bọu apang hěnton Israel pěndolohẹ̌kong pẹ̌sěngkatau wọu tal᷊oarang manga těmbonange apěnahimata ěntanang Kanaan kụ sarung Takụ ionggọ su tau Israel.”

³Natuhụ e kere su parentan Duata e, i Musa něndolohʼi sire wọu Linggin Paran. Kal᷊awọu taumata ene ute kai manga měngangahạ e sutal᷊oaran tau Israelẹ̌ e: [Hěntoʼn] — [Pangahạ e] Ruben — I Syamua anạ i Zakur Simeon — I Safat anạ i Hori Yehuda — I Kaleb anạ i Yefune Isakar — I Yigal anạ i Yusup Efraim — I Hosea anạ i Nun Benyamin — I Palti anạ i Rafu Zebulon — I Gadiel anạ i Sodi Manasye — I Gadi anạ i Susi Dan — I Amiel anạ i Gemali Asyer — I Setur anạ i Mikhael Naftali — I Nahbi anạ i Wofsi Gad — I Guel anạ i Makhi

¹⁶Ene ute kai měnanahimata nirolohi Musa pẹ̌pẹ̌pahimang banua ene. I Hosea anạ i Nun niawengang arenge kahiang Musa nakoạ i Yosua.

¹⁷Piạ i Musa něngoro si sire piněbuạ, i sie timanata si sire, ”Dal᷊engke sarang sěmběkan sawěnahẹ̌, pẹ̌timona watuhu sěmběkan timuhẹ̌ bọu ěntanang Kanaan, bọu ene turusẹ̌ u wawul᷊udange.

¹⁸Sẹ̌suieko kereapa kakoạ u wanua ene, měnsang tumanạ e mal᷊awọ arau mahal᷊i, arau měnsang i sire matoghasẹ̌ bue arau kai lome.

¹⁹Parikẹ̌saiko měnsang banua ene mapia arau ral᷊akị, dingangu měnsang tumanạ e mạtanạbe su manga weọ e kụ mạbawualagẹ̌ arau kawe su ral᷊ungu manga soa kụ piạ těndạ e.

²⁰Pakatatapẹ̌ bue naungu. Kakěllako měnsang ěntanane matawa wue ringangu lawọ bue kakaluange. Abe kiwul᷊ei mẹ̌bawa manga bua-bua apan timuwo paịse maning kadodọ.” Su tempo ene ute pěnẹ̌takengu musungu anggorẹ̌.

²¹Tangú tamaị e i sire sol᷊ong sěmběkan sawěnahẹ̌ kụ něnaněsui soa ene e nanětạ bọu Linggin Zin kụ su sěmběkan timuhẹ̌ sarang sawěnahẹ̌ sarang soan Rehob maranin dal᷊eng sarang Hamatẹ̌.

²²Humotong i sire nakoạ sarang banua ene su sěmběkan timuhẹ̌ kụ nahumpạ u soang Hebron, katatanakengu tau Ahiman, Sesai ringangu Talmai pal᷊ahiten Enak. Hebron nirarisị pitu taung kal᷊imonang soan Zoan su Misirẹ̌.

²³Ene nahumpạ e i sire su wal᷊ang Eskol.[3] Sene i sire němesang anggorẹ̌ sělelang nawěhạ u wuane hakịu hinong kalu sěmpědi kahiang duang katau. I sire nẹ̌bawa l᷊ai wuan delima piram baụ dingangu wuang ara.

²⁴Tampạ ene isẹ̌sěbạ Bal᷊ang Eskol ual᷊ingu lelangu wuang anggorẹ̌ e nipesang u tau Israelẹ̌ e sene.

²⁵Bọuten něnanẹ̌sui wanua ene ěpạ u pul᷊o su ěllone karěngụ e mẹ̌papahimang ene e nẹ̌sul᷊e kapia,

²⁶ringangu naul᷊ịu habarẹ̌ si Musa, i Harun dingangu kal᷊awọu umatʼu Israel apang kạpẹ̌tẹ̌tampunge su Kades, su Linggin Paran. I sire němpẹ̌běkeng apan seng kinasilon sire dingangu napatodẹ u wua-bua niwawan sire.

²⁷Angkuěng i sire si Musa, ”I kami seng něnanẹ̌sui wanua ene ringangu němanda watụ u ěntanane kai kalạ dingangu matawa, sini wua-bua e mahal᷊i wọu pai ene.

²⁸Arawe tumanạ u wanua ene matatoghasẹ̌. Manga soan sire gaghaghuwạ dingangu piạ těndạe. Maseko l᷊ai, i kami nakasilo kal᷊awọu taumata hiteng ansuang paị sene.

²⁹Tau Amalek měmpẹ̌tẹ̌tanạ su wahageang sěmběkan timuhẹ̌ bọu wanua ene; tau Het, Yebus dingangu Amori mạtanạ su wawul᷊urange; arawe tau Kanaan mạtanạ su wanua su kanandung laudẹ̌ dingangu su kanandun Sal᷊ụ u Yordan.”

³⁰Arawe i Kaleb mapakal᷊enehu naungu apan taumata kụkakindoạ si Musa. Angkuěng i Kaleb, ”Banua ini harusẹ̌ seketang i kitẹ kụ pul᷊ahoěng i kitẹ orasẹ̌ ini lai, batụu i kitẹ e sembeng matoghasẹ̌ kahěngang baugu mapakawata.”

³¹Arawe kal᷊awọu taumata kụ apang němpẹ̌sul᷊e ringangʼi Kaleb e němpẹ̌bera, ”Tala, i kitẹ e tawe makatohạ sumekẹ si sire. Tumanạ u wanua ene limembong katoghase wọi kitẹ.”

³²Bọu e i sire mẹ̌kẹ̌kakekeng běke konti sutal᷊oarang tau Israel mạanung banua kụ seng bọu pẹ̌pahimangeng i sire ene. Angkuěng i sire, ”Banua ene apạ e makasilakạ, sarang kate tumanạ e hala. Taumata apang ikẹ̌kasilong kami paị sene apạe gaghagherẹ badange.

³³ Sarang lai i kami makạsilo taumata mẹ̌sul᷊ungu ansuang, kụ i sire apang hěnton tau Enak. Isul᷊ung si sire pěndangeng, i kami kai kere kal᷊imbotong, dingangu nal᷊ahẹu mambeng kerene su sipirang i sire mạanung kami.”