Read Sangir PẸ̌TATIẠ 14 Bible Online

PẸ̌TATIẠ 14 - Sangir bible

PẸ̌TATIẠ 14

¹Kanandung hěbi umatu Israel mẹ̌kẹ̌kiaratagẹ̌ dingangu měmpạhunsangị.

²I sire sụsimbulung si Musa rěduang Harun kụ mẹ̌bẹ̌bera, ”Mạpiaěngbe i kitẹ mate su Misirẹ̌ arau su wanua l᷊inggi ini! Balạete i kitẹ kapapatene!

³Baugu apa MAWU nẹ̌bawa si kitẹ sarang banua ene? Hědọ e i kitẹ mate su ral᷊ungu pẹ̌seketang dingangu manga kawing ore lai manga anạ i kitẹ e itaweng. Kai wal᷊inewe limembong kapiane mẹ̌bal᷊i kapia sol᷊ong Misirẹ̌ tangu?”

⁴Bọu e i sire nẹ̌bera sěmbaụ su wal᷊ine, ”Mapiawe i kitẹ měmile sěngkatau pangahạ e kụ mẹ̌sul᷊e sarang Misirẹ̌!”

⁵Mase i Musa rěduang Harun nẹ̌tumpěkuhẹ̌ su těngong kal᷊awọu kawanua.

⁶I Yosua anạ i Nun dẹ̌duang Kaleb anạ i Yefune, duang katau wọu tal᷊oarang mẹ̌papahimang ene, něnggehẹ pakeang i sire tatialang nělutu.

⁷I sire nẹ̌bera su patikụ kawanua ene, ”Banua kụ nisẹ̌suiang i kami ene e tawẹ sihinge kapiane.

⁸Kereu MAWU e mal᷊uasẹ̌ si kitẹ e, i Sie sarung měngahạ si kitẹ sarang tamai kerene kụ měngonggọu ěntana kalạ dingangu matawa ene si kitẹ.

⁹ Kumbahang bue rumokạ MAWU, dingangu kumbahangbe matakụ u taumata apang měmpẹ̌tẹ̌tanạ su wanua ene, batụu tawẹ susane wue i kitẹ měmatạ si sire. Měngangěllung si sire sen naněntang i sire, arawe MAWU e mạněntanudẹ̌ si kitẹ. Kụ pẹ̌bangungke abe katakụ.”

¹⁰Kal᷊awọu kawanua mẹ̌kalakua měmahungu watu si sire sarang mate. Kaiso sěngkělěndịu i sire ene nakasilo tualagu MAWU mahamagẹ̌ siměnnang su wowon TentanʼE.

¹¹MAWU e něhengetang si Musa, ”Kạděngụ e lai i sire ini rumokạ si Siạ? Sarang kạnge i sire tawe mangimang si Siạ, manilaing Iạ seng nẹ̌koạ karal᷊inaụ kereng kal᷊awọe sutal᷊oaran sire.

¹²Iạ e sarung mapakawinasan sire ringangu maparěntan sakị marěkẹ. Arawe i kau sarung Takụ ipakakoạ i amang u wansa sěmbaụ limembong kasěllahe ringangu limembong katoghase wọʼi sire.”

¹³ Mase i Musa nẹ̌bera su MAWU, ”O MAWU, tau Misirẹ̌ e sarung makaringihẹ̌ hal᷊ẹ̌ ene! Sumbal᷊iau kahiang kawasanʼU i Kau seng naněbang i kami wọu wanua ene,

¹⁴ringangu i sire sarung mẹ̌běkeng ene su kal᷊awọu taumata su wanua ini, kụ seng nakaringihẹ̌ lai u i Kau, MAWU, riměndingang si kami. I sire seng nakaringihẹ̌ lai u i Kau nẹ̌těngkal᷊ahẹ u watangeng si kami su tempong i Kau rụdal᷊eng su těngong kami su ral᷊ungu rihi winawa mạeng ěllo, ringangu su ral᷊ungu rihi putung su tempong hěbi.

¹⁵Kereu i Kau měmate kal᷊awọu umatʼU ini, tangú manga wansa kụ nạung bọu makạdingihẹ̌ u i Kau kawe timeleng kụ sarung měmpẹ̌bera u

¹⁶i Kau kawe měmate manga umatʼU su kěhu l᷊inggi ual᷊ingu i Kau tawe makaumal᷊ẹ̌ mẹ̌bawa si sire sol᷊ong banua kụ sen nikědonʼU.

¹⁷Ual᷊ingu ene, MAWU, iạ mẹ̌dẹ̌dorong, todẹko kawasanʼU si kami ringangu koạko apan seng nikědonʼU. I Kau e seng něhengetang,

¹⁸ ’Iạ e kai MAWU, tawe měngkai apidu lumangehẹ̌. Iạ e kai mělahẹu kakěndagẹ̌-Ku ringangu satia-Ku mẹ̌dẹ̌dal᷊embo. Iạ e měngampung taumata kụ nẹ̌dosa ringangu apang lụlawang si Siạ. Maningbe kerene, pẹ̌sasal᷊an taumata maghurang Takụ sarung bal᷊isang su manga anạ dingangu pulunge sarang hitene katěllu ringangu kaěpạ u hawenge.’

¹⁹Arawe ini MAWU, ual᷊ingu kasariane tatal᷊ěntụʼU ringangu i Kau satia su kědonʼU, iạ mělẹ̌harapẹ̌ ampunge wue rosan sire ini kerẹewe lai i Kau seng nangampung si sire dokeng i sire naněntangu ěntanang Misirẹ̌.”

²⁰Mase MAWU e simimbang, ”Kerenẹ e Iạ sarungbe měngampung si sire kerẹewe nirorongangu.

²¹ Arawe Iạ e nẹ̌kědo waugu watangeng-Ku ringangu waugu Iạ kụ biahẹ̌ dingangu kawasa su dunia ini,

²²u wọu i sire ini tawẹu sarang sěngkatau reng bědang biahẹ̌ baugu makakasuẹ̌ su wanua nạung Takụ nikědo su manga i upung i sire. Batụu i sire mạdiri rumaringihẹ̌ si Siạ, mase měngkate tatapẹ̌ mạnal᷊ukạ si Siạ. Sumbal᷊iau i sire sen nakasilo tualagẹ̌-Ku mahamagẹ̌, dingangu apạeweng karal᷊inaụ kụ Takụ kinoạ su Misirẹ̌ dingangu su kěhu l᷊inggi.

²³Tala! I sire tawe sumuẹ̌ sarang banua ene. Bọu tal᷊oaran sire apan dumokạ si Siạ e tawẹ u sarang sěngkatau sarung makatahida wanua ene.

²⁴ Arawe su ěllang-Ku i Kaleb tangú wal᷊inewe kerene. I sie těbewe satia si Siạ. Ual᷊ingu ene Iạ sarung mẹ̌bawa si sie sarang banua kụ seng nisuěkange. Arawe ini e tau Amalek dingangu tau Kanaan mạtanạ su matenene ini e. Arawe wanua ene tangú sarung makoạ tataghuanengu pal᷊ahiteng Kaleb, ěllang-Ku ene. Dịěllo i kamene harusẹ̌ pẹ̌sul᷊e kapia kụ kěngkakoạko sol᷊ong kěhu l᷊inggi pẹ̌timona Wěngạ u Akaba.”

²⁵

²⁶MAWU něhengetang si Musa ringangu si Harun,

²⁷”Sarang kạngerẹ taumata raral᷊akisẹ̌ ene e mẹ̌sungutẹ̌ si Siạ? Kal᷊awọu kakiạ i sire e sen Takụ niraringihang.

²⁸I kamene harusẹ̌be sumimbahẹ̌ kere ini: MAWU e něhengetang, ”Iạ e nẹ̌salu su areng-Ku kụ biahẹ̌ u i kamene sarung Takụ koateng kere pinẹ̌berang kamene su těngo-Ku. Iạ e kai MAWU seng něhengetang.

²⁹ I kamene seng nẹ̌sungutẹ̌ su těngo-Ku. Ual᷊ingu ene i kamene sarung mate, ringangu apang maietʼi kamene sarung mẹ̌sal᷊iawuhẹ̌ su kěhu l᷊inggi ini.

³⁰Su l᷊ikudʼi Kaleb dẹ̌duang Yosua, tawẹu sarang sěngkatau wọʼi kamene umbure duaʼm pul᷊o su taunge taraị sarung makakasuẹ̌ su wanua Takụ nikědo si kamene ene.

³¹I kamene sem bọu nẹ̌bera u manga anạ i kamene sarung itaweng. Kaiso kawe seng i sire Takụ bawaěng sarang banua tawe nitarimạ i kamene ene, ringangu wanua ene sarung makoạ pamamanuaěng i sire.

³²Arawe i kamene sarung mate su kěhu l᷊inggi ini.

³³ Ěpạ u pul᷊o su taunge karěngụ e manga anạ i kamene sarung mẹ̌palilị su kěhu l᷊inggi. Ual᷊ingu i kamene tawẹ satiane, manga anạ i kamene e sarung masunsara, sarang taumata kụ kasamuriange sutal᷊oarang kamene e selain nate.

³⁴I kamene sarung měnal᷊udẹ̌ dosang kamene ěpạ u pul᷊o su taunge karěngụe; sěntaung nirekeng baugu sěhěllo wọu apang ěpạ u pul᷊o su ěllone kụ nipakẹ i kamene waugu apẹ̌naněsui kakakoạ u ěntana ene. I kamene sarung makakasingkạ u kereapa pěndange kereu Iạ e rumokạ si kamene!

³⁵Iạ mẹ̌salu u Iạ sarung mẹ̌koạ hal᷊ẹ̌ ene si kamene, apan taumata ral᷊akisẹ̌ kụ sěngkanaung dumokạ si Siạ. Su kěhu l᷊inggi ini i kamene kěbị sarung mate. Iạ MAWU, seng nẹ̌bisara.”

³⁶Taumata apan sen nirolohʼi Musa apěnẹ̌něsui ěntana ene, kapia nẹ̌bawa habarẹ̌ tạ katěngade mạanun banua ene, ringangu hal᷊ẹ̌ ene nakawul᷊ugẹ̌ tau Israel němpẹ̌simbulung su MAWU. Ual᷊ingu ene MAWU e něhukung si sire hakịu i sire něngkapate kinahinoěngu sakị.

³⁷

³⁸Wọʼi sire mẹ̌papahimang mapul᷊o dua su kataune ene, tumbạeng i Yosua rěduang Kaleb bědang biahẹ̌.

³⁹Sarangke i Musa něhabaru tatanatang MAWU su tau Israel, bansa ene mangkewen němpělutu kahian susa naung.

⁴⁰Sěngkariěllone reng mal᷊uka-l᷊ukadẹ̌ němpẹ̌bal᷊ikěkase i sire mahunsaka sol᷊ong bowom bul᷊ude. Angkuěng i sire, ”I kami e mambeng nẹ̌dosa. Arawe orasẹ̌ ini e i kami seng sadia makoạ sol᷊ong tampạ tiněbọu MAWU.”

⁴¹Arawe i Musa e nẹ̌bera, ”Unụe orasẹ̌ ini i kamene mapulu lumampa parentaʼm MAWU? I kamene e tawe sarung makaual᷊i!

⁴²Kumbahang tamai! I kamene sarung ikawatạ u sekẹ i kamene watụ u MAWU e tawe ruměndingang si kamene.

⁴³Su tempong i kamene mẹ̌těngon tau Amalek dingangu Kanaan ene, i kamene sarum mate su pẹ̌seketang. MAWU e sarung tawe maněntanudẹ̌ si kamene, ual᷊ingu i kamene madiri rumaringihẹ̌ si Sie.”

⁴⁴Arawe kal᷊awọu tau Israelẹ̌ e wědang nasěmbaụ naunge lai měndol᷊ong bowom bul᷊ude ene, manilaing i Musa ringangu Petiʼm Pẹ̌dariandi e tawe maněntangu pẹ̌darasengang ene.

⁴⁵Tangú tau Amalek dingangu tau Kanaan kụ mạtanạ paị sene němpěngalo ringangu němatạ tau Israel dingangu němpěnahusu si sire sarang Horma.