Read Sangir PẸ̌TATIẠ 15 Bible Online

PẸ̌TATIẠ 15 - Sangir bible

PẸ̌TATIẠ 15

¹MAWU e něngonggọu tiahane ini si Musa,

²kal᷊awọu pělatorange ini e kụ harusẹ̌ koateng u tau Israel su wanua kụ sarung gěllirangu MAWU e si sire.

³Baugu sasěmba tẹ̌tutungang arau sasěmba bawalarẹ̌ diandi arau sasěmban naung mal᷊uasẹ̌ arau sasěmba su tempong sal᷊iwang měllo-měllo, i kamene wotongewe lai mẹ̌gěllịu sasěmba su MAWU: sapi esẹ, domba esẹ, domba arau kambing. Dal᷊urung manga sasěmba ene makạl᷊uasẹ̌ naungu MAWU.

⁴I sai-saing mẹ̌gěllịu sasěmba domba arau kambing baugu sasěmba tẹ̌tutungang su MAWU, harusẹ̌ lai mẹ̌bawa sěngkawawa ringangu binatang piara pẹ̌sěmbaụ, tapoěng pẹ̌sěngkilo ikaugu lanang zaitun pẹ̌sěliterẹ̌ baugu sasěmba sẹ̌sadiang, dingangu lai akẹ u anggorẹ̌ pẹ̌sěliterẹ̌.

⁶Kereu isěmba kawe domba esẹ sěmbaụ, harusẹ̌be lai isěmba ringangu tapoěng duang kilo laukangu lanang zaitun sěliterẹ̌ dingangu mal᷊oara baugu sasěmba sẹ̌sadiang,

⁷dingangu akẹ u anggorẹ̌ sěliterẹ̌ dingangu mal᷊oara. Dal᷊urum sasěmba ene makal᷊uasẹ̌ naungu MAWU.

⁸Kereu isěmba ene kawe sapi esẹ sěmbaụ dingangu sasěmba tẹ̌tutungang arau sasěmba wawalarẹ̌ diandi arau sasěmbam pẹ̌darame,

⁹harusẹ̌ isěmba lai tapoěng těllung kilo kaugangu lanang zaitun dua literẹ̌ baugu sasěmba sẹ̌sadiaěng,

¹⁰dingangu akẹ u anggorẹ̌ dua literẹ̌. Dal᷊urung sasěmba ene makal᷊ahimpulu naungu MAWU.

¹¹Kụ kai ene harusẹ̌ isěmba sěngkaghěllị dingangu sapi esẹ pẹ̌sěmbaụ, domba esẹ, domba arau kambing.

¹²Kamagengu isěmba e kawe něngalembo wọu binatang sěmbaụ, tangu sasěmba tapoěng, lana, ringangu akẹ u anggorẹ̌ ene e harusẹ̌be itamba tuhụewe pẹ̌dal᷊ahaedange.

¹³Hal᷊ẹ̌ ene harusẹ̌be koatengu apan tau Israel su tempong i sie měnarakangu sasěmba. Dal᷊urung sasěmba ene makạl᷊ahimpulu naungu MAWU.

¹⁴Sěngkatau raghị kụ mạtanạ sutal᷊oarang kamene, baewe waugu kadodọ tempo arau waugu sarang marěngụ, harusẹ̌ tumatatuhụ patikụ tiahane ene kereu i sie měněmbang kaěng kụ dal᷊urune makạl᷊ahimpulu naungu MAWU.

¹⁵ Kal᷊awọu tita ringangu tiahane mang mẹ̌sul᷊ung baugʼi kamene ringangu waugu taumata raghị kụ mạtanạ sutal᷊oarang kamene, batụu i kamene ringangu i sire mang mẹ̌sul᷊ung su silom mataʼm MAWU. Kụ hal᷊ẹ̌ ene mariadi waugu sarang marěngụ-děngụ.

¹⁷MAWU e něngonggọ si Musa

¹⁸manga tita ini kụ hinom pakikoạ su tau Israel su wanua kụ sarung ionggọ u MAWU e si sire.

¹⁹Kereu i kamene seng manětạ e kumaěng apang nikaual᷊i wọu wanua ene, i kamene harusẹ̌ měhae sěmbahageang baugu sasěmba těntani waugu MAWU.

²⁰Kereu i kamene mẹ̌tongkạ borotẹ̌ bọu gandung humotong papěnsạ, borotẹ̌ ene hinon isěmba kere sasěmba těntani waugu MAWU. Kakakoạ u měngonggọ u sasěmba e mẹ̌sul᷊ung dingangu kakakoạ u měngonggọu gandung humotong nighiling i kamene.

²¹Baugu sarang marěngụ-děngụ apam borotẹ̌ bọu gandung humotong papěnsạ ene harusẹ̌be ghěllị i kamene kere sasěmba tani waugu MAWU.

²²Kereu i kamene kụ tawe pinẹ̌tatudẹ napakawalan sěmbaụ bọu tal᷊oaran tita nionggọ u MAWU e si Musa, kụ nanětạ bọu ěllom pangangonggọu MAWU tita ene ringangu sarang hěnto mẹ̌bẹ̌bawěllasẹ̌, dingangu pẹ̌sasal᷊a ene kinoạ ual᷊ingu umatẹ̌ e wěgawen tita, tangú kal᷊awọu umatẹ̌ e harusẹ̌ maněmban sapi esẹ sěmbaụ baugu sasěmba tẹ̌tutungang. Sěngkatakidẹ̌ dingangu ene harusẹ̌ maněmban sasěmba sẹ̌sadiang dingangu akẹ u anggorẹ̌ kerẹewe sen nitantu. Dal᷊urun sasěmba ene makạl᷊uasẹ̌ naungu MAWU. Sul᷊iung ene harusẹ̌be lai ighěllị domba esẹ sěmbaụ baugu sasěmbang ampungu rosa.

²⁵Bọu e imang harusẹ̌ mẹ̌koạ kal᷊iomanengu ampungu rosa waugu umatẹ̌. Tangú i sire sarung ampungang ual᷊ingu pẹ̌sasal᷊a ene nikoạ i sire wal᷊inewe pinẹ̌tatudẹ, dingangu ual᷊ingu i sire seng nẹ̌bawa sasěmba ampungu rosa ore lai sasěmba tẹ̌tutungang baugu MAWU.

²⁶Kal᷊awọu umatʼu Israel dingangu taumata raghị kụ mạtanạ sutal᷊oaran sire ute ampungang, batụu kěbị e kai nasangkong su pẹ̌sasal᷊a kụ tawe nipẹ̌tatudẹ ene e.

²⁷ Kamagengu kětạeng piạ u sěngkatau nẹ̌dosa kụ bal᷊inewe pinẹ̌tatudẹ, tangu i sie harusẹ̌ měnarakangu kambing bawine sěmbaụ umbure sěntaung baugu bawalarẹ̌ ampungu rosa.

²⁸Imang tangu harusẹ̌ mẹ̌koạ tundung ampungu rosa su těngom MAWU, tadeạu tau ene maampung dosane.

²⁹Atorang ene tangu mihino lai su taumata walạewe měnsang i sai kụ nẹ̌dosa bal᷊ine nipẹ̌tatudẹ, baewe i sie tau Israelẹ̌ arau tau raghị kụ nẹ̌tanạ marěngụ sutal᷊oaran sire.

³⁰Kaiso kereu sěngkatau tau Israelẹ̌ arau sěngkatau tau raghị kụ nẹ̌tatudẹ nẹ̌dosa, ute i sie tawe něngarěgang MAWU. Tau ene harusẹ̌ ihukung pakapate,

³¹batụu i sie rụdokạ MAWU mase nẹ̌tatudẹ limewang parentan MAWU. Taumata ene mate kahian sal᷊ane hala.

³²Su tempon tau Israel ene su wanua l᷊inggi, sěngkatau esẹ kinaěbakeng kạpěnẹ̌nampunge kalum putung su ěllon Sabatẹ̌.

³³Tau ene niwawa nẹ̌těngon Musa, i Harun dingangu kal᷊awọu umatẹ̌,

³⁴bọu ene niaresẹ̌ batụu wědang tawe nal᷊ahẹ měnsang i sie kapuraneng.

³⁵MAWU něhengetang si Musa, ”Tau ene harusẹ̌ ihukung pakapate. I sie harusẹ̌ isěbang bọu pẹ̌darasengang dingangu paị sene kal᷊awọu umatẹ̌ e harusẹ̌ měmahungu watu si sie sarang pakapate.”

³⁶Tangú kal᷊awọu umatẹ̌ e něngahạ i sie apasěbang bọu pẹ̌darasengang kụ měmahungu watu si sie sarang pakapate, kerẹewe niorong MAWU.

³⁷MAWU něngoro si Musa,

³⁸ apạul᷊ị su tau Israel, ”Koateko manga humbune su manga kahokọ u pakeang i kamene, kụ ikiten tal᷊i wirụ su apang humbune. Kụ ene tangú harusẹ̌be koạ i kamene su apang hěnto mẹ̌bẹ̌bawěllasẹ̌.

³⁹Humbune tamai ene tangú kai tatahěndung: Suapạeweng i kamene makasilo tangu i kamene sarung makatahěndung kal᷊awọu tita-Ku mase i kamene tumuhụ ene. Kụ ual᷊ingu ene tangú i kamene tawe miwul᷊eng Iạ kereu tumol᷊e kapulu ringangu lẹ̌ěnningʼi kamene hala.

⁴⁰Manga humbune tamai ene sarung mapẹ̌tahěndung i kamene waugu tumuhụ kal᷊awọu tita-Ku, hakịu i kamene mamben těngadẹ̌ makoạ tataghuaneng-Ku.

⁴¹Kai Iạ e MAWU Ruatanu; kai Iạ e naněbang i kamene wọu Misirẹ̌ tadeạu Iạ makoạ Duatang kamene, Iạ e MAWU.”