Read Sangir PẸ̌TATIẠ 16 Bible Online

PẸ̌TATIẠ 16 - Sangir bible

PẸ̌TATIẠ 16

¹ I Korah anạ i Yizhar bọu ghal᷊ipohong Kehat, hěnton Lewi, němpěnggohaeng si Musa. I sie tẹ̌tuilangu těllung katau wọu hěnton Ruben, kụ i Datan, i Abiram manga anạ i Eliab, dingangu i On anạ i Pelet, dingangu kahiang dua hasụ limam pul᷊o su kataune pangahạ e timeleng kụ nipileng kawanua.

³I sire sěngkarangeng tamai nẹ̌těngong Musa rěduang Harun ringangu něbera, ”Seng kapapiane ene, Musa! Kal᷊awọu umatu Israel nitani waugu MAWU, kụ MAWU e ene sutal᷊oarang kitẹ kěbị. Kaiso unụe i kau e mạngiral᷊ing u watangengu e kawe limembong karangẹ e wọu umatʼu MAWU?”

⁴Nakaringihẹ̌ ene, i Musa nẹ̌tumpěkuhẹ̌ su ěntana kụ nẹ̌kal᷊iomaneng su MAWU.

⁵Bọu ene i sie něhengetang si Korah ringangu apan tumatol᷊ene, ”Diěllo mal᷊ukadẹ̌ MAWU e sarung mapakal᷊ahẹ si kitẹ měnsang i sai tataghuanengʼE, ringangu i sai kụ itani waugʼi Sie. Taumata kụ nipilenʼE sarung pakawalanʼE humaung si Sie.

⁶Dịěllo mal᷊ukadẹ̌ i kau ringangu manga tumatuhụ e harusẹ̌ měngal᷊ạ manga tampạ u putung, kụ mělohong tětuhẹ̌ dingangu wuwụ, mase wawa sarang pananěmbaěng. Kụ kěnangko pandaěng i kitẹ kụ seng nipilem MAWU. Kapapianẹ e ene, ei apan taumatan Lewi!”

⁷

⁸Tuhụ e, i Musa nẹ̌bera si Korah, ”Pẹ̌daringihẹ̌ko apan tau Lewi!

⁹Su tiněnnang kamene ini kai hal᷊ẹ̌be kadodọ, u Ruatang Israel němile si kamene wọu tal᷊oaran tau Israel tadeạu i kamene wotonge mẹ̌těngkaranin Sie, ringangu měmunara su Tenta-Ne, ore lai měhal᷊ẹ̌ baugu umatʼu Israel dingangu mẹ̌tangkiang si sire?

¹⁰I kau, Korah, ringangu kěbị taumatang Lewi seng nakahombang adate ene wọu MAWU — ringangu orasẹ̌ ini i kamene něnuntụ baugu lai makoạ imang!

¹¹Kereu i kau ringangu manga tumatuhụ u sumimbulung si Harun, ute nal᷊ahẹ u i kamene seng dimokạ MAWU!”

¹²Bọu e i Musa něngoro nẹ̌kui si Datan dẹ̌duang Abiram, kaiso i sire nẹ̌bera, ”I kami e tawe mapulu ruměnta!

¹³Deng tawe nạsukụ i kau maněbang i kami wọu ěntanang Misirẹ̌ kụ matawa ene mědeạu měmate si kami su wanua l᷊inggi ini? Arau harusẹ̌ mẹ̌parenta lai si kami?

¹⁴Tumuhụ hinone i kau mamben tawe mẹ̌bawa si kami sol᷊ong ěntana matawa, arau měngonggọu manga rahami arau manga wawaelangu anggorẹ̌ kụ makoạ pusakạ tataghuaneng i kami! Kụ ini e i kau mapulu měngakal᷊ẹ̌ si kami! Tala wue, i kami madiri sumongo!”

¹⁵I Musa e limangehẹ̌ marasai kụ něbera su MAWU, ”MAWU, kumbahang měnarimạ u sasěmban sire. Tawẹ běke iạ nakarugi sarang sěngkatau wọʼi sire; sarang manga kalide lai sěmbaụ tawe nilẹ̌al᷊ạku wọu anun sire.”

¹⁶Bọu e angkuěng i Musa si Korah, ”Děntako rịěllo sol᷊ong Tentaʼm MAWU sěngkarěnta ringangu tumatol᷊enu i sire 250 su kataune. I Harun sarung ene lai paị sene. I kamene harusẹ̌ pẹ̌bawa tampạ u putung sěngkatau-sěngkatau. Pẹ̌tahongkom buwụ su ral᷊unge, bọu ene sěmbako su MAWU.”

¹⁷

¹⁸Tangú apan taumata kụ měngal᷊ạ tampạ u putunge, nělohong tětuhẹ̌ dingangu wuwụ, bọu ene rumarisị su tukadu Tentaʼm MAWU ringangi Musa rẹ̌duang Harun.

¹⁹Bọu ene i Korah něnampungu kal᷊awọu umatẹ̌ dingang i sire rimarisị nětěngon Musa rěduang Harun su tukadu Tentam MAWU. Sěngkělěndịu kal᷊awọu umatẹ̌ e nakasilo tualagu MAWU e kimerong.

²⁰Mase MAWU e něhengetang si Musa rẹ̌duang Harun,

²¹”Sohọko bọu anun sire ene; Iạ e reng měhukung i sire su orasẹ̌ lai ini.”

²²Arawe i Musa rẹ̌duang Harun nẹ̌tumpěkuhẹ̌ nẹ̌suba ringangu nẹ̌bera, ”O Ruata, seng i Kau něngonggọu pẹ̌bawiahẹ̌ su patikụ apang mẹ̌bẹ̌biahẹ̌. Kereu tumbạeng sěngkatau kụ barạdosa e, kụ kal᷊awọu umatẹ̌ e pẹ̌bawal᷊uangengu tangu?”

²³MAWU e něhengetang si Musa,

²⁴”Dolohẹ̌ko kal᷊awọu taumata e apělingkạ bọu kal᷊awọu tentang Korah, i Datan dingangu i Abiram.”

²⁵Bọu e i Musa nitakinangu manga těmbonangu Israelẹ̌ e, nakoạ sarang tampạ i Datan dẹ̌duang Abiram.

²⁶I Musa nẹ̌bera suapan tau Israel, ”Pělingkạko wọu tentang kal᷊awọu taumata ral᷊akisẹ̌ ini e ringangu kumbahang měnenggehẹ apa-apa wọu tataghuaneng i sire. Kereu i kamene tawe tumuhụ, i kamene sarung ipakawinasa sěngkawinasa ringang i sire kahian dosan sire.”

²⁷Bọu ene apan tau Israelẹ̌ e němpělingkạ bọu manga tentang Korah, i Datan dingangu i Abiram. I Datan dẹ̌duang Abiram seng siměbang kụ kạpahundarisị e su tukadu tentan sěngkatau-sěngkatau, dingangu anạ ore kawing i sire.

²⁸Mase i Musa nẹ̌bera, ”Ual᷊ingu ini tangu i kamene sarung masingkạ u MAWU e sen něndolohu iạ mědeạu mẹ̌koạ kěbị tamai ini dingangu su hal᷊ẹ̌ ene wal᷊inewe kapuluku sẹ̌saku.

²⁹Kereu i sire tamai ene mate kere wiasane, tawẹ manga hukumange apa wọu Ruata, ene ute tialane MAWU e tawe rimolohu iạ.

³⁰Arawe kamagengu MAWU e nẹ̌koạbe apan nạung tawe nikěkaringihʼi kamene karěngụu ini, dingangu kereu ěntana e nahěngẹ baugu měngělụ si sire ringangu kal᷊awọu tataghuaneng i sire, hakịu i sire makasuẹ̌ biahẹ̌ su ral᷊ungu dunian tau nate, nasingkạ e i kamene u i sire ene kawe rụdokạ MAWU.”

³¹Tạ kararěnane sarětạeng i Musa nasueng bisarane, ěntana su al᷊ungu laedʼi sire nahěngẹ,

³²kụ něnelohẹ̌ si sire ringangkeweng balagʼi sire ore lai patikụ tumatol᷊e si Korah, dingangu kal᷊awọu arětạ i sire.

³³Tangu nawunsal᷊e i sire wiahẹ̌ su ral᷊ungu runian tau nate ringangu kal᷊awọu apan tẹ̌taghuaneng i sire. Ěntana kụ nahěngẹ ene naghěming kapia kụ i sire nailang niěllụ u wanua.

³⁴Kal᷊awọu taumatan Israel apan ene sene němpẹ̌tal᷊ang u watangenge piạ nakaringihẹ̌ i sire němpẹ̌bansagẹ̌, ”Tal᷊ang, měntěhang i kitẹ e selohangu wanua!”

³⁵Mase MAWU e nẹ̌parentam putung kụ něhěngisẹ̌ si sire 250 su kataune apang němpaněmbang buwụ ene.

³⁶Bọu e MAWU něhengetang si Musa,

³⁷”Dolohẹ̌ko i Eleazar anạ u Imang i Harun něhengkẹ manga tampạ u putung bọu manga lěmben tutung ene ringangu něngal᷊iaesu awung ahine sarang tampạ bal᷊ine, batụu tampạ u putung ene e kawe susi. Apal᷊iwụ tamai ene ute kai sasěmban taumata apan seng nihukungu papate ual᷊ingu rosane. Apal᷊iwụ tamai ene kawe susi ual᷊ingu seng nisěmba su těngom MAWU, ual᷊ingu ene harusẹ̌be sěsal᷊eng makoạ pakananipị baugu pěngěmbo likudu pananěmbaěng. Hal᷊ẹ̌ ene sarung makoạ kere tatahěndung baugu tau Israel.”

³⁸

³⁹Tangú Imang i Eleazar něngal᷊ạ tampạ u manga putung ene ringangu něngoro taumata pěnẹnesal᷊ẹ̌ uasene pakạkoạ pakananipị baugu ipangěmbo likudu pananěmbaěng.

⁴⁰Ene nakoạ kere tatahěndung su tau Israel u su l᷊iung hěnton Harun, tawẹ u sarang sěngkatau wotonge ruměnta su pananěmbaěng baugu měnutung buwụ baugu MAWU. Taumata kụ lumawang atorang ene e sarung ipakawinasa kere i Korah ringangu apạewen tumatol᷊ene. Kěbị ene kẹ̌koateng kerẹewe niorong MAWU si Eleazar limiung Musa.

⁴¹Sěngkarịěllone kal᷊awọu umatʼu Israel měngkate hanesẹ̌ pědu si Musa rẹ̌duang Harun. Angkuěng i sire, ”I kamene seng němate umatʼu MAWU.”

⁴²Ene kapẹ̌kẹ̌komol᷊e i sire rumokạ si Musa rẹ̌duang Harun, i sire němpẹ̌bihụ e sol᷊ong Tentam MAWU, kụ nakasilo winawa něnakạ Tenta ene, kụ kinasilọ e tualagu rarěntam MAWU.

⁴³I Musa rẹ̌duang Harun nakoạ sol᷊ong Tentaʼm MAWU,

⁴⁴kụ bọu ene MAWU nẹ̌bera si Musa,

⁴⁵”Sohọ e wọʼi sire ene. Iạ sarung mapakawinasan sire su tampạ ene lai!” I rẹ̌dua nẹ̌tumpěkuhẹ̌ nẹ̌suba,

⁴⁶mase i Musa nẹ̌bera si Harun, ”Pěngal᷊ạko tampạ u putungu, kụ lohoingkong tětuhẹ̌ bọu pananěmbaěng kụ tahoing buwụ su wowone. Kụ bawako pakal᷊ighạ baugu umatẹ̌ kụ pẹ̌koạko tundung pěngangampung dosa waugʼi sire. Pakal᷊ighạ! Dal᷊angehu MAWU e seng simahoka kụ sahindạ e seng nanětạ.”

⁴⁷I Harun nẹ̌koạ apang kụ niwerang Musa. I sie timal᷊ang sarang tal᷊oarang umatẹ̌ kụ kapẹ̌tẹ̌tampunge kụ seng nanětạ e kẹ̌kahinoěngu sahindạ. Tangú i Harun naměllọeng buwụ su wowon tětuhẹ̌, kụ nẹ̌koạ e hal᷊ẹ̌ u pěngangampung dosa waugu umatẹ̌.

⁴⁸Sahindạ e napontọde, kụ i Harun ene sutal᷊oaran taumata apang bědang biahẹ̌ dingangu apạeweng seng nate.

⁴⁹Apang nate su tempo ene piạ u 14.700 su kataune, tawe narekeng i sire apang kụ nate su ral᷊ungu pěnggaghohaengi Korah.

⁵⁰Samurin sahindạ ene něngědo, i Harun nẹ̌sul᷊e kapia su anung Musa su tukadu Tentaʼm MAWU.