Read Sangir PẸ̌TATIẠ 17 Bible Online

PẸ̌TATIẠ 17 - Sangir bible

PẸ̌TATIẠ 17

¹MAWU e něhengetang si Musa,

²”Dolohẹ̌ko tau Israel pěngonggọu těking mapul᷊o dua si kau kụ suapang gal᷊ipoho e těking sěmbaụ, kụ harusẹ̌ sarakang suapan těmbonange. Bohẹko arengu apan těmbonange ene su těkinge,

³dingangu areng i Harun su těkingu hěnton Lewi. Baugu apang pangahạ u hěnto e harusẹ̌ piạ těkinge sěmbaụ.

⁴Bawako kal᷊awọu těking ene sol᷊ong Tenta-Ku, dingangu pěllọko su těngom Petiʼm Pẹ̌dariandi, tampạ-Ku wiasa mẹ̌sombang dingang i kamene.

⁵Těkingu taumata Takụ nipile e sarung humětị. Dingangu kakakoạ e kerene e Iạ sarung mapangědong kakahiorọ u taumata kụ měngkai hanesẹ̌ měmpẹ̌sẹ̌simbulung i kamene.”

⁶Hal᷊ẹ̌ ene nihabarʼi Musa su tau Israel. Mase manga pangahạ i sire něnarakangu těking pẹ̌sěmbua si sie waugu apang pangahạ u ghal᷊ipohong hite sěmbaụ. Kěbị tangú mapul᷊o dua su wuane, dingangu těking i Harun ene lai su tal᷊oarane.

⁷I Musa wọu ene naměllọu kal᷊awọu těking ene su ral᷊ungu Tentaʼm MAWU su těngoʼm Petim Pẹ̌dariandi.

⁸ Sěngkarịěllone, piạ i Musa nasuẹ̌ e su ral᷊ungu Tentaʼm MAWU e, i sie nakasilo nạung těking i Harun kụ kawe těking u hěnton Lewi e, seng nẹ̌tumbal᷊ẹ̌. Těking ene nẹ̌kohabẹ̌, nẹ̌bungang dingangu nẹ̌bua wuan sal᷊ise maghurang.

⁹Kụ i Musa e něngal᷊ạ e těking ene kěbị bọu e něnodẹ u ene su tau Israel. I sire němanda apang kụ sen nariadi, bọu ene apang pangahạ e něngal᷊ạ e těking e kapia.

¹⁰Bọu e MAWU něhengetang si Musa, ”Pěllọko kapia těking i Harun su těngom Petiʼm Pẹ̌dariandi. Těking ene harusẹ̌ iresọ kere tatahěndung baugu tau Israel apang puluang měmpẹ̌pahuwungkadẹ̌ e u i sire sarung mate kereu i sire tawe měngědo mẹ̌sungutẹ̌.”

¹¹I Musa e nẹ̌koạ apang niorom MAWU.

¹²Bọu e tau Israel nẹ̌bera si Musa, ”Kamageng kerene, silakạ bue i kami! I kami sarung mawinasa!

¹³Kereu taumata e mẹ̌těngkaranin Tentaʼm MAWU e harusẹ̌ mate, tangú nal᷊ahẹ u semben tawẹ apa lai harapang baugʼi kami!”