Read Sangir PẸ̌TATIẠ 18 Bible Online

PẸ̌TATIẠ 18 - Sangir bible

PẸ̌TATIẠ 18

¹MAWU e něhengetang si Harun, ”I kau, manga anạ u ringangu tau Lewi e harusẹ̌ měnanggung aị u kal᷊awọu pẹ̌sasal᷊a kụ nariadi su ral᷊ungu Tenta-Ku, kaiso tambaěng i kau ringangu manga anạ u samatang kụ harusẹ̌ měnal᷊udẹ̌ pẹ̌sasal᷊a su ral᷊ungu munarang manga imang.

²Manga anạ u sěmbaụ u, hěnton Lewi e harusẹ̌ paringang dingangu kere lumaontol᷊ẹ̌ su pẹ̌kakoạ munaranu ringangu tawakal᷊ing manga anạu.

³Hěnton Lewi harusẹ̌ pẹ̌koạ munaran sire waugʼi kamene, ringangu pẹ̌koạ hal᷊ẹ̌ i sire su Tenta-Ku, arawe i sire tawe wotonge měndanim pananěmbaěng arau měnenggehẹ̌ apal᷊iwụ susi su Huange Susi. Kereu i sire lumampa tiahane ene, ute waẹbe i sire ringangu waẹbe lai i kamene e sarung mate.

⁴I sire harusẹ̌ pěmunara sěngkapěmunara ringang i kamene, ore lai pẹ̌koạ kal᷊awọu hal᷊ẹ̌ i sire kụ piạ kal᷊ahěmpukange ringangu patikụ pẹ̌tatangkiang su ral᷊ungu Tenta-Ku, kaiso apang tawe nighěllirangu wahageange waugu ene, kumbahang měhal᷊ẹ̌ sěngkapěhal᷊ẹ̌ dingang i kamene.

⁵Kětạeng i kau, i Harun, ringangu manga anạ u e sarung hinone mẹ̌koạ munara su Huange Susi e ringangu pananěmbaěng, tadeạu Iạ kumbahang delaing lumangehẹ̌ su tau Israel.

⁶Hatede, Iạ e seng němile manga anạ u sěngkataunu tau Lewi wọu tal᷊oaran tau Israel kere laonggọ baugʼi kau. I sire e seng nitani waugu Iạ, mědeạu mẹ̌tangkiang su Tenta-Ku.

⁷Kaiso kawe samatang i kau ringangu manga anạu e wotonge měndal᷊engu munarang sěngkatau imang, su ral᷊ungu kal᷊awọu munara kụ piạ kal᷊ahěmpukange ringangu pananěmbaěng dingangu apạeweng kẹ̌kaěbakeng su Huang KasusiangʼE. Seng ene e wawawaěngu, ual᷊ingu Iạ e seng něngonggọu kal᷊aianeng si kamene kere sěngkatau imang, apan taumata kụ tawẹ bahageange sarungbe ihukung pakapate kereu mẹ̌těngkaraning manga apal᷊iwụ susi ene.”

⁸MAWU e něhengetang si Harun, ”Tahěndungeko! Kal᷊awọu sasěmba těntani kụ nionggọ si Siạ kụ tawe nitongkạ ute kai waugʼi kau. Ene kai wahageangu kụ seng nitantu sarang marěngụ-děngụ. Ene kai Takụ nionggọ si kau ringangu suapang hitenu.

⁹Bọu e manga sasěmba kasusiange, kụ tawe tutungang su wowom pananěmbaěng, tuhụ e ini tangú kai waugʼi kau: Sasěmba sẹ̌sadiaěng, sasěmbang ampungu rosa ringangu sasěmba laaweng dugi. Kěbị ene ute sasěmba susi kụ nakoạ bageangu ringangu bageangu manga anạ u.

¹⁰Ene ute kai susi waugʼi kau, kụ i kamene harusẹ̌be kaěng lai su tampạ susi. Kětạeng manga esẹ botonge měmpẹ̌kaěng.

¹¹Kal᷊awọu sasěmba těntani wal᷊ine kụ nisěmban tau Israel si Siạ, ute waugʼi kamene lai. Iạ něngonggọu ene si kamene ringangu su manga anạ i kamene esẹ dingangu wawine. Tiaha ene nikoạ baugu sarang marěngụ-děngụ. Apan dal᷊ohom balagu kụ tawẹ lamuhụ e tangu wotonge kumaěng.

¹²Takụ ionggọ si kamene kal᷊awọu apang kapiaěnge wọu wuane humotong kụ isěmban tau Israel si Siạ apan taung, kụ kai lanan zaitun, akẹ u anggorẹ̌ dingangu gandung.

¹³Kěbị ene tangu kai waugʼi kau. Apang dal᷊ohom bal᷊enu kụ tawẹ turạ e botongewe měmpẹ̌kaěng ene.

¹⁴ Patikụ sabarang su ěntanang Israel kụ seng nitani waugu Iạ e ute kai waugʼi kamene.

¹⁵Kěbịewe apang piněhěnding kal᷊imona sutal᷊oaran taumata arau waebe lai binatang kụ isěmban tau Israel si Siạ, ute kai wahageangu. Kai i kamene harusẹ̌ měnubusẹ̌ manga anạ i kamene i akang, kerene lai anạ u manga binatang pẹ̌pẹ̌pělli, humotong piněhanạ.

¹⁶Manga rariọ harusẹ̌ itubusẹ̌ su tempong i sire umure sěmbul᷊ang. Arěgane nipoěng baugu ene ute roitẹ̌ sal᷊aka limang kal᷊ěpa, tuhụewe arěga su Tenta-Ku.

¹⁷Arawe sapi, domba ringangu kambing kụ piněhanạ humotong tawe wotonge itubusẹ̌. Binatang ene harusẹ̌ baugu Iạ samatang kụ harusẹ̌ isěmba. Sěbohẹ̌ko rahane su pananěmbaěng kụ tongkạko tawane koạ sasěmba. Dal᷊urune makạl᷊ahimpulu naung-Ku.

¹⁸Gěsine ute waugʼi kau, mẹ̌sul᷊ungu kere sěbạ e ringangu palange koaneng bọu sasěmba kụ nilahẹ si Siạ.

¹⁹Baugu sarang marěngụ-děngụ, kal᷊awọu sasěmba těntani kụ niwawan tau Israel su anu-Ku, Takụ ionggọ si kau ringangu su manga anạ u esẹ dingangu wawine. Atorang ene mariadi sarang marěngụ-děngụ dingangu makoạ laikị diandi kụ tawe ikaontol᷊ẹ̌ sutal᷊oarang Iạ dingang i kau ringangu kal᷊awọu hitenu.”

²⁰MAWU e něhengetang lai si Harun, ”I kamene tawe makaěbạ pusakạ apa-apa. Su wanua kụ Takụ nikědo ene tawẹ u sarang ěntana sěngkempang kadiongeng nakoạ tataghuanengu. Iạ e MAWU kai nasowa wahageangu pusakạ u.”

²¹ Angkuěngu MAWU si Harun, ”Kal᷊awọu sasěmba pẹ̌sěngkatahạpul᷊one wọu tau Israel Takụ ionggọ su tau Lewi. Seng ene e wahageangu pusakạ i sire waugu munaran sire su Tenta-Ku.

²²Taumatang Israel bal᷊ine tawe wotonge lai humaung Tenta ene tadeạu i sire kumbahang makakarěntan dosa ringangu hukumang papate waugu watangeng i sire.

²³Manětạ bọu orasẹ̌ ini kětạeng tau Lewi kụ botonge měngurusẹ̌ Tenta-Ku ringangu měmasaěng bawawaěng napenẹ kahiang hal᷊ẹ̌ ene. Tiahan sire ene mariadi lai waugu hitenu sarang marěngụ-děngụ. Tau Lewi e tawe něnaghuang pusakạ su Israel,

²⁴batụu waugu pusakạ i sire Iạ e seng něngonggọu kal᷊awọu sasěmba pẹ̌sěngkatahạpul᷊one kụ isěmban tau Israel si Siạ kere laonggọ tani. Kai ual᷊ingu ene mạanun tau Lewi e Iạ kai maul᷊ị u i sire tawe makaěbạ bahageang i sire wọu pusakạ su Israel.”

²⁵MAWU e rimolohʼi Musa,

²⁶pělẹ̌habaru parenta ini su tau Lewi: Kereu i kamene měnarimạ bọu tau Israel sasěmba pẹ̌sěngkatahạpul᷊one kụ isarakangu MAWU e si kau makoạ bahageangu, i kamene harusẹ̌ měngonggọu pẹ̌sěngkatahạpul᷊ong bahageange su MAWU waugu sasěmba taninu.

²⁷Sasěmba tani ene mẹ̌sul᷊ungu sasěmba gandung buhu wọu akẹ u anggorẹ̌ buhu.

²⁸Ual᷊ingu kerene tangú i kamene lai harusẹ̌ maněmba gunang sasěmba těntani su MAWU sěmbahageang bọu sasěmba pẹ̌sěngkatahạpul᷊one wọu tau Israel. Sasěmba tani ene harusẹ̌be sarakang i kamene su Imang i Harun.

²⁹Gěllirengkom bahageange kapiaěnge wọu apang kụ tarimakeng i kamene.

³⁰Bọuten manarakangu wahageang ene e, i kamene wotonge měngal᷊ạ lěmbene, kere sěngkatau mělahěnsinuang kụ měngal᷊ạ lěmbene wọuteng i sie nẹ̌bawa sasěmbane.

³¹Lěmbene ene wotongewe kanengang i kamene sěngkakaěng walạewe měnsang suapa ringangu ral᷊ohom bal᷊enu kere tatendengu munaranu su Tentaʼm MAWU.

³²I kamene tawẹ sal᷊ane kereu mahungkaěng ene asal᷊eweng bahageang kapiaěnge seng isěmbang kamene su MAWU. Kumbahang makal᷊amuhụ sasěmban tau Israel susi e ual᷊ingu měmpẹ̌kaěng apa-apa wọu sasěmba ene, kal᷊amonan bahageange kapiaěnge ihạ e waugu MAWU. Kereu i kamene lumampa tita ene, i kamene sarung mate.