Read Sangir PẸ̌TATIẠ 19 Bible Online

PẸ̌TATIẠ 19 - Sangir bible

PẸ̌TATIẠ 19

¹MAWU e něngoro si Musa rẹ̌duang Harun,

²waugu pěngonggotangu manga pělatorange ini su tau Israel: Al᷊ạko sapi mahamụ bawine kụ tawẹ turạ e ringangu ren tawe nipẹ̌pakẹ baugu apěmasaěng bawawaěng.

³Sarakangke sapi ene su Imang i Eleazar. Binatang ene harusẹ̌be sěbang bọu pẹ̌darasengang kụ bọu ene potọ su těngong imang.

⁴Mase Imang i Eleazar harusẹ̌ pěngal᷊ạ dahang binatang ene kadodọ kụ pěnědọ manga pitu sul᷊e sol᷊ong lantehu Tentaʼm MAWU.

⁵Kal᷊awọu binatang ene, pisine, gěsine, rahane, ringangu lohon tiange, harusẹ̌ tongkạ su těngong imang.

⁶Mase imang e harusẹ̌ měngal᷊ạ kalung aras kadodọ, kalung ěhe sělelang dingangu tal᷊i mahamụ sěndul᷊ung, bọu e niwahung su ral᷊ungu putung kạpěnẹ̌nongkạ e sapi mahamụ ene.

⁷Bọu ene imange harusẹ̌ měngunsạ pakeange ringangu měndenọ. Bọu ene i sie wotonge su ral᷊ungu pẹ̌darasengang, katewe i sie wědang mal᷊amuhụ sarang matangěllo sumědạ.

⁸Taumata kụ mẹ̌tongkạ sapi ene lai harusẹ̌ měngunsạ pakeange ringangu měndenọ; i sie lai wědang mal᷊amuhụ sarang matangěllo sumědạ.

⁹ Mase pẹ̌sěngkatau kụ apan tawẹ turạ e harusẹ̌ měngomol᷊ẹ̌ awun sapi ene kụ měmělọ su tampạ kụ burěsi su l᷊ikudu pẹ̌darasengang. Awu ene iresọ sene tadeạu tau Israel makapẹ̌pakẹ baugu mẹ̌koạ tundung pěnganguhasu kal᷊aampungu rosa.

¹⁰Taumata kụ měngomol᷊ẹ̌ awun sapi ene harusẹ̌ měngunsạ pakeange, katewe i sie kai mal᷊amuhụ sarang matangěllo sumědạ. Atorange ene makoạ sarang marěngụ-děngụ, baẹbe waugu tau Israel arau waugu tau raghị kụ mạtanạ tatapẹ̌be sutal᷊oaran sire.

¹¹Taumata kụ kinahinoěngu maietẹ̌ e mal᷊amuhụ karěngụ u pitu ěllo.

¹²Su ěllo katěllune ringangu kapitune i sie harusẹ̌ měnguhasẹ̌ batangenge ringangu akẹ u tundum pamamurěsi; buhụewe i sie mawurěsi, kaiso kamagengu su ěllo katěllune ringangu kapitune i sie tawe měmurěsi watangenge, i sie těbe mal᷊amuhụ.

¹³Taumata kụ kahinoěngu maietẹ̌ dingangu tawe mapakasusim batangenge ute kai mal᷊amuhụ, batụu i sie wědang tawe nisěbohangu akẹ u pěndal᷊anisẹ̌. I sie napakal᷊amuhụ u Tentaʼm MAWU ringangu ual᷊ingu ene sembelain tawe nirekeng dal᷊ohong umatʼu MAWU.

¹⁴Kereu piạ u pẹ̌sěngkatau mate su ral᷊ungu tenta, ute walạewe i sai su ral᷊ungu tenta ene arau masuẹ̌ su ral᷊unge, makoạ mal᷊amuhụ karěngụ u pitu ěllo.

¹⁵Kěbịewe wěnsadẹ̌ dingangu kuring kụ tawẹ tatakạ e mal᷊aing mal᷊amuhụ.

¹⁶Apan taumata kụ kahinoěngu maietu taumata kụ nate nipate, arau nate sẹ̌sane su rahami, mal᷊amuhụ karěngụ u pitu ěllo. Kerene lai taumata kụ makasenggehẹ̌ lěbing arau ruhin taumata nate.

¹⁷Mědeạu makauhasẹ̌ taumata kụ mal᷊amuhụ ene, harusẹ̌ al᷊akeng kadodọ awul᷊ẹ̌ bọu sapi mahamụ bawine kụ seng nitongkạ baugu ipěngěmụ dosa. Awul᷊ẹ̌ ene harusẹ̌ tahoěng su ral᷊ungu kuring sěmbaụ, bọu ene tahoěngu akẹ kụ al᷊akeng bọu akẹ kụ lụelehẹ̌.

¹⁸Su hal᷊ẹ̌ humotong tangú kamagengu piạ u taumata mate su ral᷊ungu tenta, taumata kụ tawẹ turạ e harusẹ̌ pěngal᷊ạ děmpugu ěhe, uno su ral᷊ungu akẹ ene, bọu ene pěnamusẹ̌ko tenta ene ringangu kal᷊awọu sạbarang su ral᷊unge, ringangu kal᷊awọewen taumata sene. Su hal᷊ẹ̌ karuane ute kamagengu pẹ̌sěngkatau e makasenggehẹ̌ maietẹ̌, kubul᷊ẹ̌ arau ruhin tau nate, ute apan taumata tawẹ turạ e harusẹ̌ pěnambusẹ̌ taumata mal᷊amuhụ ene dingangu koạ e pẹ̌sul᷊ung.

¹⁹I sie harusẹ̌ pěnambusẹ̌ su ěllo katěllune ringangu su ěllo kapitune. Su ěllo kapitune ene nasuẹ̌ e munaraʼm pěnanusi taumata mal᷊amuhụ ene. Tau ene harusẹ̌ pěngunsạ pakeange ringangu pěndenọ. Manětạ bọu matangěllo sumědạ i sie mawurěsi.

²⁰Taumata kụ makoạ mal᷊amuhụ dingangu tawe mẹ̌kakoạ hal᷊ẹ̌ u pěnganguhasẹ̌ batangeng, mang těbe mal᷊amuhụ ual᷊ingu tawe nisěbohu akẹ u pěndal᷊anisẹ̌. I sie nakal᷊amuhụ Tentaʼm MAWU, dingangu lai tawe irarekeng dal᷊ohong umatʼu Mawu.

²¹Tiahane ene kinoạ baugu sarang karěngụ e. Taumata kụ měnẹ̌nambusu akẹ u tundu ene mal᷊aing harusẹ̌ pěngunsạ pakeange ringangu taumata kụ kahinoěngu akẹ ene makoạ mal᷊amuhụ sarang matangěllo sumědạ.

²²Apal᷊iwụ kụ senggehang u taumata mal᷊amuhụ ene makoạ mal᷊amuhụ, mase taumata wal᷊inẹ kụ měnenggehẹ̌ e mal᷊aing mal᷊amuhụ sarang matangěllo sumědạ.