Read Sangir PẸ̌TATIẠ 20 Bible Online

PẸ̌TATIẠ 20 - Sangir bible

PẸ̌TATIẠ 20

¹Su wul᷊ang humotong kakěpal᷊u tau Israel nahumpạ u Kěhu Linggin Zin kụ nẹ̌banua su Kades. I Miryam napul᷊ẹ asal᷊ẹ̌ kụ nilěbing sene.

²Piạ tempo sěmbaụ su tampạ u tentan sire tawẹ apa akẹ. Tangú narěntạ e taumata sene němpẹ̌dulu si Musa rẹ̌duang Harun

³apidu kapẹ̌sẹ̌simbulunge, ”Nạung mapiangbe i kami nate su těngom MAWU ringangu manga anạ u sěngkataung kami!

⁴Unụe i kamene nẹ̌bawawe si kami sarang kěhu l᷊inggi ini? Kai mědeạu pakapate i kami ringangu manga binatang i kami e sini?

⁵Kai waugu apa i kami nipasěbang bọu Misirẹ̌ niwawa sarang tampạ masigěsạ ini tawe kapẹ̌suangengu apa-apa? Sini tawẹ apa gandung, tawẹ apa kalung ara, anggorẹ̌ dingangu delima. Sarang lai akẹ inungang tawẹ apa!”

⁶I Musa rěduang Harun nẹ̌těngkaraun sire ene kụ dimarisị su rěduhu tukadu Tentaʼm MAWU. I sire němpẹ̌tumpěkuhẹ̌, mase tualagu rarěntang MAWU siměnnang si sire.

⁷MAWU e něhengetang si Musa,

⁸”Al᷊ạko těking su těngong Petiʼm Pẹ̌dariandi, bọu ene i ruang Harun harusẹ̌ pěnampungu umatẹ̌ kěbị. Su těngon sire kěbị, i kau harusẹ̌ pẹ̌bera su wukidu watu sene tadeạu mapěměsịu akẹ. Kerene i kau mapasěbangu akẹ bọu wukidu watu ene, tadeạu kawanua ringangu binatang i sire makapanginung.”

⁹Tangú tamaị e i Musa něngal᷊ạ těking ene kerẹewe niorong MAWU.

¹⁰I Musa rěduang Harun něnampungu patikụ umatẹ̌ su těngom bukidu watu ene. Bọu ene i Musa nẹ̌bera, ”Daringihẹ̌ko, ei tahapěndongka! Unụe i kami kai harusẹ̌ pěněbangu akẹ bọu wukidu watu ini e waugi kamene?”

¹¹Mase i Musa něhengkẹ těking ene niwěbahe su wukidu watu ene rua sul᷊e. Tangú něměsịe akẹ maihạ, hakịu kěbị taumata ringangu manga binatang nakapěnginung.

¹²Arawe MAWU e naul᷊ị si Musa rẹ̌duang Harun, angkuěngʼE, ”Ual᷊ingu i kamene kadodọ pangangimange si Siạ baugu nělahẹ u kawasa-Ku nạung susi su těngon tau Israel, i kamene e tawe sarung makapěngahạ si sire sumuẹ̌ su wanua kụ Takụ niriandi si sire.”

¹³Kai seng ěndaị ene matang akẹ u Meriba.[4] Su tampạ ěndaị ene tau Israel němpẹ̌sungutẹ̌ su MAWU, ringangu sene lai MAWU e něnodẹu kawasa-Ne kụ susi su wansa ene.

¹⁴Masene wọu Kades, i Musa něndingọ u manga rarolohang baugu pẹ̌těngon datung Edom. Angkuěng i sire, ”I kami e kai wọu kal᷊awọu hěnton Israel kụ bědang piạ běhịu pamili wọʼi Tuangku. I Tuangku aramanung masingkạ u kasasusa kụ himombang si kami.

¹⁵I upung gaghurang i kami e nakoạ sol᷊ong Misirẹ̌ kụ nangindunụ paị sene ringangu taunge karěngụ e. I upung i kami ringangu i kami e niral᷊akisang u tau Misirẹ̌,

¹⁶ringangu i kami e kụ kahiorọ su MAWU mẹ̌dẹ̌dorong tul᷊ung. I Sie rudaringihẹ̌ kakindoạ i kami ringangu rimolohu sěngkatau malạekatẹ̌. Malạekatẹ̌ ene něngahạ si kami siměbang bọu ěntanang Misirẹ̌. Ini e i kami mạtanạ su Kades, soa sěmbaụ su pẹ̌saraěngu wanuan Tuangku.

¹⁷I kami mẹ̌dẹ̌dorong u mal᷊umbạko i Tuangku rembeng mapakawalang kami lumiu wọu wanua ini. I kami ringangu manga binatang i kami ren tawe mělenga wọu raral᷊engang dingangu tawe makakasuẹ̌ su manga ansedẹ̌ arau manga waelu anggorẹ̌. I kami tawe měnginung akẹ bọu manga pahighing Tuangku. I kami sarung dumal᷊eng su ral᷊eng gẹ̌guwạ samatang, sarang i kami siměbang bọu wanuan Tuangku.”

¹⁸Arawe tau Edom simimbang, ”I kamene tawe iwalang kami lumiu wọu wanuang kami. Mạengu i kamene sembeng gẹ̌guwa naung i kamene, ute i kami sarung měngalo si kamene.”

¹⁹Tau Israel nẹ̌bera, ”I kami sarung dumal᷊eng lumiu ral᷊eng gẹ̌guwạ, dingangu kamagengu i kami arau binatang i kami e měnginung akẹ i kamene, i kami hědọ e měmaehẹ̌. I kami tumbạeng mapulu lumiu.”

²⁰Tau Edom nẹ̌bera ko l᷊ai, ”Tawe wotonge!” Mase i sire siměbang dingangu sordadone matoghasẹ̌ mědeạu ipěngalo tau Israel.

²¹Tangú tau Israel němpẹ̌sul᷊e kụ nẹ̌deạ dal᷊eng bal᷊ine batụu tawe nipakawalan tau Edom limiu wanuan sire.

²²Kěbị umatu Israel naněntangu Kades kụ nahumpạ u Wul᷊udu Hor,

²³su pẹ̌saraěngu Edom. Sene MAWU e nẹ̌bera si Musa rẹ̌duang Harun,

²⁴”I Harun tawe makakasuẹ̌ su wanua kụ sen Takụ niriandi su tau Israel; i sie sarung mate ual᷊ingu i rua kawe seng dumokạ tita-Ku maranim simbul᷊u akẹ u Meriba.

²⁵Paringangko i Harun dẹ̌duang Eleazar, anạe, apasaka Wul᷊udu Hor.

²⁶Luạko pakeang i Harun kụ luheko si Eleazar. Su wěntihu wul᷊ude ene i Harun sarung maněntangu dunia.”

²⁷I Musa nẹ̌koạewe apang niorong MAWU. I Musa, i Harun dingangu i Eleazar simaka Wul᷊udu Hor nisahidiangu kal᷊awọu umatẹ̌.

²⁸ Mase i Musa něluạ pakeang i Harun dingangu niluhene si Eleazar. Kụ su pusigu wul᷊ude ene i Harun naněntangu dunia, bọu ene i Musa ringangu i Eleazar diměsung kapia.

²⁹Kal᷊awọu umatẹ̌ e nakaringihẹ̌ u i Harun seng nate, kụ i sire kěbị němpělutu waugʼi sie těllum pul᷊o su ěllone karěngụ e.