Read Sangir PẸ̌TATIẠ 21 Bible Online

PẸ̌TATIẠ 21 - Sangir bible

PẸ̌TATIẠ 21

¹ Arad kai soa sěmbaụ su sěmběkan timuhẹ̌ bọu ěntanang Kanaan. Piạ e nạung datun soa ene nakaringihẹ̌ u tau Israel diměnta wọu ral᷊engu Atarim, tamaị e i sie něngalo si sire ringangu něnawengu pirang katau wọʼi sire.

²Mase tau Israel nẹ̌diandi kere ini su MAWU, ”Kereu i Kau měngonggọu kal᷊auntu masahẹ si kami bọu wansa ene, i sire ringangu manga soan sire sarung upuang i kami sarang tawe mal᷊ěmbe.”

³MAWU e něnarimạ dorongu tau Israel dingangu mẹ̌tul᷊ung i sire kụ nẹ̌matạ tau Kanaan. Tangú tau Israel mapakawinasang kal᷊awọu tau Kanaan ene, ringangu manga soan sire, bọu ene tampạ ene nisěbạ i sire Horma.[5]

⁴ Bọu ene tau Israel naněntangu Wul᷊udu Hor, kụ dimal᷊eng nẹ̌timona Wěngạ u Akaba, waugu mangělikụ ěntanang Edom. Kai sutal᷊oaran dal᷊eng, bansa ene nasue sabare,

⁵ kụ němpẹ̌simbulung su těngon Duata ringang i Musa. I sire nẹ̌bera, ”Unụe i kau nẹ̌bawa si kami niapasẹ̌bang bọu Misirẹ̌? Kai měmate si kami su wanua l᷊inggi ini tangu? Sini tawẹ apa kaěng, sarang lai akẹ tawe apa. I kami seng nawiul᷊u kaěng kụ tawẹ temange ini!”

⁶Tangú MAWU e naparěntang manga těmpu mawawira sutal᷊oarang manga wansa ene. Mal᷊awọ tau Israel nate nitěmboěngu manga těmpu ene.

⁷Mase manga wansa ene riměnta nẹ̌těngong Musa kụ nẹ̌bera, ”I kami seng nẹ̌dosa ual᷊ingu simimbulung su MAWU ringangu si kau. Pẹ̌kal᷊iomanengke su MAWU tadeạu manga těmpu ini ipakarau wọu anung kami.” Tangu i Musa nẹ̌kal᷊iomanengu wansa ene.

⁸Bọu e MAWU něngoro si Musa pinẹ̌koạ těmpu sěmbua wọu tambaga kụ nipěllọe su kotọ u rihi sěmbua. Apan taumata kụ kikiangu těmpu, sarung mapia kereu makasilo těmpu wọu uada ene.

⁹ Tangú i Musa nẹ̌koạ e těmpu wọu tambaga kụ nipěllọe su kotọ u rihi sěmbua. Apan taumata kụ nikikin těmpu, wotonge mapia kamagengu měmanda těmpu tambaga ene.

¹⁰Tau Israel nẹ̌buạ kapia, wọu ene nẹ̌daseng su soang Obot.

¹¹Bọu naněntangu tampạ ene, i sire nẹ̌daseng su ěnnạu Abarim su wanua l᷊inggi su sěmběkan daki wọu ěntanang Moab.

¹²Bọu ene i sire nẹ̌daseng su Wal᷊ang Zered.

¹³Bọu tampạ ene i sire saụ dimal᷊eng kụ nẹ̌daseng su sěmběkan Sal᷊ụ u Arnon, su ngara kụ naěmpahẹ̌ sarang banuan tau Amori. Sal᷊ụ u Arnon ene kai nakoạ kere pẹ̌saraěng u wanuaʼn tau Moab dingangu wanuaʼn tau Amori.

¹⁴Kụ kai ene sěbapẹ̌ e kụ su ral᷊ungu, ’Bukẹ̌ u Pẹ̌sasekẹ u MAWU’, kabawohẹ: ”… Su kampongu Waheb su ěntanan Sufa ringangu manga wal᷊ane; Sal᷊ụ u Arnon

¹⁵dingangu wěntihu manga wal᷊ane kụ naěmpahẹ̌ sarang kampongu Ar dingangu mẹ̌tẹ̌timona sarang pẹ̌saraěngu ěntanan tau Moab.”

¹⁶Bọu tampạ ene i sire nakoạ sarang tampạ isẹ̌sẹ̌bạ Beer, mangal᷊ene tangú kai manga sumu. Sene MAWU e nạung bọu něhengetang si Musa, ”Oroiko manga umatẹ̌ e pẹ̌tampung; Iạ e sarung mẹ̌gěllịu akẹ si sire.”

¹⁷Su tempo ene tau Israel němpẹ̌kantarị u kantari kere ini, ”Ei manga pahighi, apasal᷊iwěbudẹ̌ko akẹu, i kami e reng maněnsomahẹ̌ dingangu kakantarị.

¹⁸Pahighi nạung nikal᷊ing manga těmbonange, ringangu manga pangahạu wansa e niwangka ringangu těkingu pěngangahạ e ringangkewelain těkingu tandang kawasan sire.” Bọu wanua l᷊inggi i sire něngal᷊ing sarang Matana,

¹⁹ringangu wọu ene i sire makoạ sarang Nahaliel, bọu e sarang Bamot,

²⁰bọu ene sarang bal᷊ane su ěntanan tau Moab, su al᷊ungu pusigu Wul᷊udu Pisga tụtatěngo wanua l᷊inggi.

²¹Bọu e tau Israel něndingọ u manga rarolohange sarang anun Sihon, datung Amori, apělẹ̌habaru tatanata ini,

²²”Pakawalako i kami lumiu wanuan Tuangku. I kami ringangu binatang i kami tawe mělenga wọu ral᷊eng dingangu sarungbe tawe sumuẹ̌ sarang dahami arau manga waelu anggorẹ̌ arau manginung akẹ u manga pahighi. I kami e tawe sarung mělenga wọu ral᷊eng gẹ̌guwạ sarang i kami masěbang bọu wanuan Tuangku.”

²³Arawe Ratun Sihon tawe mapakawalan tau Israel lumiu wanuane. I sie měnampungu wuntuange bọu e makoạ sarang Yahas su wanua l᷊inggi kụ měnakẹ tau Israel sene.

²⁴Arawe su ral᷊ungu pẹ̌seketang ene mal᷊awọ sordadong Amori nipaten tau Israel. Bọu e tau Israel nakakaiang banuan sire wọu Sal᷊ụ u Arnon sarang Sal᷊ụ u Yabok, banua pẹ̌saraěngu tau Amon, batụu pẹ̌saraěng ene apạ e matoghasẹ̌ pẹ̌tatahuntěndakenge.

²⁵Ual᷊ingu kawe kerene tangú tau Israel němul᷊aho kal᷊awọu soan tau Amori, nasowa lai Hesybon dingangu kěbị soa rarodọ pạngělikụ e, bọu e nẹ̌tanạ e i sire sene.

²⁶Hesybon kai niupunangu soan Datu i Sihon. I sie reng bọu nẹ̌sekẹ dimokạ datung Moab dingangu němul᷊aho wanuane sarang karaun Sal᷊ụ u Arnon.

²⁷Kai ene sěbapẹ̌ e hakịu měndal᷊anging papantung kai nẹ̌pantung kere ini, ”Děntako su Hesybon, soan Datu i Sihon. I kami lụěnningu makasilo soa ini ipětị dingangu ul᷊ikang kapia.

²⁸ Piạ sěnsul᷊e bọu soa ini buntuangu Sihon timol᷊ọ kere putung. Něnggagholọ soang Ar su Moab, dingangu nẹ̌kawasa manga wukide su kanandung Arnon.

²⁹Kạěngkěhang bue tau Moab i kau e masilakạ! Mẹ̌suba Kamos, i kau e mawinasa! I kau e iwalan duatanu kụ makoạ tumatal᷊ang, manga ghal᷊ipohong bawineng kamene e makoạbe tawengu ratung Amori.

³⁰Arawe orasẹ̌ ini e měngkawinasa wue pal᷊ahiten sire, kanandun dal᷊eng bọu Hesybon sarang Dibon, bọu Nasyim sarang Nofah maraning Medeba.”

³¹Kụ ual᷊ingu kawe kerene ute tau Israel matatapẹ̌be su ěntanan tau Amori.

³²Bọu ene i Musa něngoro taumata nipẹ̌deạ dal᷊eng kapiange baugu měnekẹ soang Yaezer. Bọu ene tau Israel němul᷊aho soa ene ringangu manga soa rararodọ mạngělikụ dingangu něnokol᷊u tau Amori apang měmpẹ̌tẹ̌tanạ paị sene.

³³Bọu ene tau Israel nělenga kụ dimal᷊eng nẹ̌timona Basan. Datu i Og bọu Basan timol᷊ọ dingangu wuntuange baugu měnekẹ tau Israel su soang Edrei.

³⁴MAWU e něhengetang si Musa, ”Kumbahang matakụ i sie. Iạ e sarung měngonggọu kal᷊auntu si kau. I kau sarung makawatạ si sie, kakěpal᷊eweng kawanuane ringangu wanuane. Pẹ̌koạko si sie kerẹewe seng nikoạ u su Ratun i Sihon kụ něparenta su Hesybon.”

³⁵Tangú tau Israel němatạ dingangu němate Ratung Og, manga anạ e ringangu kal᷊awọu kawanuane; tawẹ apa kụ deng nal᷊ěmbe. Bọu ene i sire nakakaiang su wanua ene.