Read Sangir PẸ̌TATIẠ 23 Bible Online

PẸ̌TATIẠ 23 - Sangir bible

PẸ̌TATIẠ 23

¹Angkuěng i Bileam si Balak, ”Darisịko su tampạ ini pananěmbaěng pitum baụ baugu iạ, dingangu sadiaiko sini sapi esẹ pitum baụ dingangu domba esẹ pitum baụ.”

²I Balak nẹ̌koạ kerẹewe ilẹ̌habari Bileam si sie. Su wowong apan sasěmba ene nisěmbang sire sapi esẹ sěmbaụ dingangu domba esẹ sěmbaụ.

³Mase i Bileam nẹ̌bera si Balak, ”Darisịko su rěduhu sasěmban Tuangku. Těntal᷊ang ene iạ den tamai měmanda měnsang MAWU mapulu wue mẹ̌sombang u iạ arau tala. Iạ hědon sarung maul᷊ịu patikụ sabarang apan piněhengetang u MAWU si siạ.” Tangú i Bileam dimal᷊eng sẹ̌sane tudẹ sarang pusigu wukide sěmbua;

⁴kụ sene Mawu Ruata e riměnta si sie. Angkuěng i Bileam su Ruata, ”Iạ seng napararisị u pananěmbaěng pitu ringangu měnarakangu sapi esẹ sěmbaụ dingangu domba esẹ sěmbaụ su wowom pananěmbaěng ene sěmbaụ-sěmbaụ.”

⁵Mase MAWU něhabarẹ̌ si Bileam apang hinong ipěhengetange, dingangu něngoro si sie kạpia pẹ̌sẹ̌sul᷊e su anung Balak mědeạu pělẹ̌habaru tatanatang Mawu e si sie.

⁶I Bileam nẹ̌sul᷊e ringangu nakaěbạ si Balak bědang dụdarisị su rěduhu sasěmba tinongkạ e, sěngkararisị dingangu kal᷊awọu těmbonangu Moab.

⁷Bọu e i Bileam nẹ̌berang nubuetẹ̌ ini, ”Bọu Aram bawul᷊urange pai su sěmběkan daki, i Balak, datung Moab nẹ̌kui si siạ, angkuěnge, ’Děntako kụ pẹ̌berako waugu iạ. Aneiko tau Israel ěndai!’

⁸Botonge iạ měngane, kereu Ruata e tawe něngane? Botonge iạ měhukung kereu MAWU e tawe něhukung?

⁹Bọu manga wawul᷊urange takụ kẹ̌kasilo i sire, bọu manga wukide takụ pẹ̌pandaěng i sire. Kakěllạe, bansa sěmbaụ kụ nahae, tawe nasowa su ghal᷊ipohong manga wansa wal᷊ine.

¹⁰Pal᷊ahiten Yakub tabidạu awul᷊ẹ̌ kụ tawe kinarekenang; tau Israel kal᷊awọe wal᷊inewe mal᷊ongkọ. Karimạko iạ deng mairị kere taumata matul᷊idẹ̌, ringangu karimạko papateku e kere kapapaten sire ene.”

¹¹Bọu e i Balak nẹ̌bera si Bileam, ”Kai apạe nikoạ u waugu iạ e? I kau e takụ niwawa ramahi mědeạu měngane manga sědụku e. Arawe i kau e katewe mundangu něngal᷊amatẹ̌ si sire.”

¹²Sasimbangi Bileam, ”Iạ e kětạeng makawerang apang ipakịberang MAWU.”

¹³Bọu ene i Balak nẹ̌bera si Bileam, ”Bọete i kitẹ dumal᷊eng sěngkaral᷊eng sarang tampạ bal᷊ine; kụ bọu ene tampạ ene i kau makasilo kụ kětạeng sěmbahageang bọu tau Israel. Aneị e i sire wọu tampạ ene.”

¹⁴Tangú i Balak nẹ̌bawa si Bileam sarang bimbaengu Zofim, su pusigu Wul᷊udu Pisga. Sene i sie mal᷊aing něndarisị u pananěmbaěng pituʼm baụ dingangu nẹ̌gěllịu sasěmba sapi esẹ sěmbaụ dingangu domba esẹ sěmbaụ su wowong pananěmbaěng ene sěmbaụ-sěmbaụ.

¹⁵Angkuěng i Bileam si Balak, ”Katanạ e sini, su rěduhu sasěmba tẹ̌tutungang i Tuangku, těntal᷊ang iạ den tamai mẹ̌sombangu MAWU sene.”

¹⁶MAWU e nẹ̌sombang i Bileam dingangu něhabarẹ̌ si sie apa hinong iwerane, bọu ene něngoro si sie pẹ̌sul᷊e su anung Balak baugu maul᷊ịu tatanatang MAWU ene.

¹⁷Tangu nẹ̌sul᷊ẹ e i Bileam dingangu nakaěbạ si Balak bědang dụdarisị su rěduhu sasěmbane tẹ̌tutungang sěngkapahundarisị dingangu těmbonangu Moab. I Balak nakiwal᷊ong apa nạung niwerang MAWU.

¹⁸Bọu ene i Bileam něnutureng nubuetẹ̌ ini, ”Ei Balak, anạ i Zipor mahịe rěnta, daringihẹ̌ko apa hinon takụ iwera.

¹⁹Duata e wal᷊inewe kere taumata kụ mal᷊owọ mẹ̌sasěsilẹ̌ dingangu puluang mẹ̌konti. Kereu Ruata e mẹ̌diandi, nal᷊ahẹu i Sie mang mitụ ene! Kereu i Sie mẹ̌bisara, tantu sarung mariadi.

²⁰Iạ e nioro pěngal᷊amatẹ̌; kụ kereu Ruata e měngal᷊amatẹ̌, semben tawe saụ takụ sawukang.

²¹Si Yakub tawe ikasasilo karal᷊akisẹ̌; su Israel tawe ikasasilo kasasigěsạ. MAWU e Ruatan sire, maněntanudẹ̌ si sire. I sire němpẹ̌tahimokoi: Kai i Sie e Ratu!

²²Duata e nẹ̌bawa si sire niapasěbang bọu Misirẹ̌; mẹ̌sul᷊ungu banteng maghaěng i Sie mẹ̌sẹ̌sekẹ baugi sire.

²³Tawẹ apa lahopa kụ makatětelẹ̌ si Yakub tawe apa tariang kụ makakoạ apa su Israel. Mạanung bansa ene, taumata e sarung mẹ̌bera, ’Kakěllạe karal᷊inaụ kụ kinoạ u Ruata!’

²⁴Bansa ene nẹ̌pětị kere singa wawine, kụ dimarisị matei kere singa esẹ. I sie tawe rumaral᷊oka kal᷊imonang kuminạ kinaěnge, ringangu měnginung dahang sasěmba kụ nitěmboěnge.”

²⁵Bọu e i Balak nẹ̌bera si Bileam, ”Kerenẹ e kereu i kau e madiri měngane tau Israel; kaiso kumbahang-bahangbe měngal᷊amatẹ̌ si sire!”

²⁶Sasimbangi Bileam, ”Bal᷊inewe seng bọu takụ nipẹ̌bera si Tuangku u iạ e sarung mẹ̌koạ kal᷊awọu apang kụ niparentan MAWU?”

²⁷I Balak nẹ̌bera, ”Bọete i kitẹ sarang tampạ bal᷊inẹ. I sai masingkạ Duata e mapakawalang kau měngane Israel baugu iạ su tampạ ene.”

²⁸Tangu niwawane i Bileam sarang su pusigu Wul᷊udu Peor tụtatěngo kěhu l᷊inggi.

²⁹Angkuěng i Bileam si Balak, ”Pěndarisịko pananěmbaěng sini pitum baụ dingangu riahiko sapi esẹ pitum baụ dingangu domba esẹ pituʼm baụ.”

³⁰I Balak nẹ̌koạewe kere niwerang Bileam. I sie něnarakang u sapi esẹ sěmbaụ dingangu domba esẹ sěmbaụ su wowong pananěmbaěng ene sěmbaụ-sěmbaụ.