Read Sangir PẸ̌TATIẠ 24 Bible Online

PẸ̌TATIẠ 24 - Sangir bible

PẸ̌TATIẠ 24

¹Orasẹ̌ ini i Bileam seng masingkạ u Ruata e mapulu i sie měngal᷊amatẹ̌ tau Israel. Ual᷊ingu ene i sie tawe tamai mědeạ manga tatiala kerẹewe nạung nikoạ kal᷊imona. I Bileam němanda sarang kěhu l᷊inggi,

²kụ nakasilo tau Israel kapědẹ̌dasenge su ral᷊ungu ghal᷊ipoho tuhụ hěntom bansane. Bọu e Rohkẹ̌ u Mawu nẹ̌kawasa si Bileam,

³kụ i sie něnuturẹ̌ nubuetẹ̌ ini, ”Ini e kai tatanatang Bileam, anạ i Beor, angkuěngu sěngkatau kụ nakasilọ e

⁴kụ seng nakaringihẹ̌ hengetang u Ruata mase nakasilo pẹ̌tatumpasilo wọu e Limembong Makawasa, apidu nal᷊engge kaiso kawe mata kạbawekesẹ̌.

⁵Apạ e kaholẹ e manga tentanu ei Yakub, dingangu manga tampạ u katatanakengu e Israel!

⁶Kerẹewe wimbaenge mal᷊oahẹ̌ e naěmpahẹ̌, arau winal᷊aeng su wiwihu sal᷊ụ; kere kalung běngi kụ nisuangu MAWU, arau kalung aras su wiwihu sal᷊ụ.

⁷I sire nakaěbạ akẹ u tahiti nahěmpal᷊iu, binen sasuang nakahombang akẹ mal᷊awọ. Datune sarung maraitẹ̌ něngalembo wọi Agag, dingangu kararatuange sarung bantugang.

⁸Duata kụ nẹ̌bawa si sire nipasěbang bọu Misirẹ̌ e, kụ kere banteng maghaěng i Sie nẹ̌sekẹ baugʼi sire. Manga wansa apan sekẹ e sarung masueng ěllụʼE, manga ruhin sire masue lahěmpungangʼE ringangu manga papitị i sire masue papědiangʼE.

⁹ Bansa ene kai mẹ̌sul᷊ungu singa esẹ dingangu singa wawine, kụ dimarěmmạ dingangu rimal᷊oka. Kụ i sai wahani mamětị i sie? Mal᷊owọko taumata kụ měngal᷊amatẹ̌ si kau e al᷊amateng, dingangu taumata kụ měngane si kau e aneěng.”

¹⁰Dingangu ral᷊angehẹ e i Balakẹ̌ nělimbolong kěngkunge kụ nẹ̌bera si Bileam, ”I kau takụ kuiang mědeạu pěngane manga sědụku, kai i sire kawe nial᷊amatengu sarang těllu sul᷊e.

¹¹Ini e i kau wotongewe ral᷊eng, kapul᷊ẹ sarang bal᷊enu! Iạ mẹ̌diandi tatendenge si kau, arawe MAWU e tawe mapakawalang kau měněrimạ tatendenge ene.”

¹²Angkuěng i Bileam, ”Bal᷊inewe seng bọu takụ niwera su manga rarolohang i Tuangku, u

¹³manilaing i Tuangku měngonggọu kal᷊awọu sal᷊aka ringangu wul᷊aeng kụ piạ su istanang Tuangku, iạ e tawe makal᷊ampa titam MAWU ringangu měkoạ apa-apa tuhụ kapulun naungku? Iạ kětạeng makawerang apang kụ iorong MAWU pakiwera si siạ.”

¹⁴Angkuěng i Bileam si Balak, ”Sen tempone ini e iạ mapulu mapul᷊ẹ su wansaku. Kai těntal᷊ang den tawe napul᷊ẹ, mapiawe iạ maul᷊ị si Tuangku mạanung apa sarung koatengu tau Israel baugu wansan Tuang su tempo ramahi.”

¹⁵Bọu ene i Bileam něnuturu nubuetẹ̌ kere ini, ”Ini e kai tatanatang Bileam, anạ i Beor; angkuěng sěngkatau měnanitị

¹⁶kụ seng nakaringihẹ̌ apang nipěhengetangu Mawu, ringangu wotonge makakiral᷊a Limembong Karangetange; kụ nakasilo pẹ̌tatěmpasilo wọu Limembong Makawasa apidu nělengge kaiso mata kělla wue.

¹⁷Takụ ikasilo i sie, kaiso wal᷊inewe orasẹ̌ ini; takụ pandaěng i sie, kaiso kawe wọu maraune. Sěngkatau ratu asal᷊e wọu Israel, sarung duměnta kere wituing matualagẹ̌. Manga pangahạ u Moab sarung kakusuange tau Set sarung gagholokange.

¹⁸Ěntanang Edom sarung kakaianengu manga sědụ e, arawe Israelẹ̌ e mẹ̌kẹ̌koạ tindakange mal᷊ahasa.

¹⁹Bọʼi Yakub sarang suměpụ sěngkatau měngangawasa, kụ makawinasa manga sědụ e.”

²⁰Bọu ene su ral᷊ungu papasilo ene tangú i Bileam nakasilo kal᷊awọu tau Amalek. Tangú i sie něnuturu nubuetẹ̌ kere ini, ”Bọu kal᷊awọu wansa su dunia, Amalekẹ̌ e kai limembong kawasa. Kaiso wansa ene kasueěnge, sarung maupu l᷊ai waugu sarang marěngụ-děngụ.”

²¹Su ral᷊ungu papasilo ene i Bileam nakasilo pal᷊ahiten Keni, bọu ene něnuturu nubuetẹ̌ ini, ”Tampạ katatanakengu mambeng matoghasẹ̌, tabidạu sal᷊ehẹ̌ su wowong bongkong batu.

²²Arawe i kamene, tau Keni, sarung ipakawinasa, tạ kararěnane lai Asyur měhengkẹ si kamene mẹ̌sul᷊ungu taweng.”

²³Mase i Bileam něnuturu nubuetẹ̌ ini lai, ”Kạěngkěhang! I saing kụ biahẹ̌, kereu Ruata mẹ̌koạ hal᷊ẹ̌ ene?

²⁴Arawe wọu Siprus sarung marěnta armada sěmbaụ, kụ i sire sarung měmatạ Asyur dingangu Heber, bọu e armada ene mal᷊aing sarung mawinasa.”

²⁵Bọu ene i Bileam mědẹ̌dariahi mědeạu mapul᷊ẹ sarang tampạ katatanakenge, ringangu i Balak mal᷊aing tamai rimal᷊eng.