Read Sangir PẸ̌TATIẠ 25 Bible Online

PẸ̌TATIẠ 25 - Sangir bible

PẸ̌TATIẠ 25

¹Těntal᷊ang tau Israel mạtanạ su Wal᷊ang Sitim, apan tau esẹ e nẹ̌tatamba wiahẹ̌ dingangu manga wawineng Moab apạeweng ene sene.

²Manga wawine ene němpěmaringang si sire sarang manga sal᷊iwangu sasěmba měnal᷊e ruatan sire. Tau Israel mal᷊aing kiminạ sasěmba ene kụ naněmba ruatan tau Moab.

³Ual᷊ingu tau Israel kawe naněmba Baal su Peor, tangú MAWU e limangehẹ̌ si sire ringangu nẹ̌bera si Musa,

⁴”Samẹko kal᷊awọu taumata apang měmpaněmbonang bansa ene ringangu patẹ e i sire su těngon lawọ kere karal᷊ahẹ u tatuhụ tita-Ku, tadeạu Iạ sembelain tawe lumangehẹ̌ su wansa-Ku ene.”

⁵Bọu ene i Musa nẹ̌bera su manga mělahukungu tau Israel, ”I kamene harusẹ̌ pěmate kěbị apang gal᷊ipohonu kụ seng naněmba Baal su Peor.”

⁶Piạ i Musa ringangu kal᷊awọu umatẹ̌ e kapẹ̌kẹ̌kiaratage su tukadu Tentaʼm MAWU, i sire nakasilo tau Israel němaringang sěngkatau wawinen tau Midian nipasuẹ̌ su ral᷊ungu tentane.

⁷Su tempong i Pinehas, anạ i Eleazar, pulungu Imang i Harun nakasilo hal᷊ẹ̌ ene, i sie nẹ̌bangung kụ naněntangu komol᷊ang ene. Nial᷊ạ e wěngko sěmbua

⁸bọu ene nisahusuange tau esẹ dingangu tau wawine ene su ral᷊ungu tenta. I rẹ̌dua ene nilěngkanengu wěngko ene kụ něngědọ e silakạ kụ kạdal᷊enge su Israelẹ̌ ene.

⁹Arawe těntal᷊ang ene tangu apan nate ute seng 24.000 su kataune.

¹⁰Mase MAWU e něhengetang si Musa,

¹¹”I Pinehas anạ i Eleazar, pulungu Imang i Harun, apạ e matoghasẹ̌ mẹ̌tahutěndạ u kawantugẹ̌-Ku sutal᷊oaran tau Israel, hakịu ral᷊angehẹ̌-Ku e nal᷊ědạ e ringangu Iạ e seng tawe nisěhụ napakawinasang bansa ene.

¹²Kụ pẹ̌berako si Pinehas, u Iạ e kai němato pẹ̌kakakědo ringang i sie.

¹³I sie ringangu pal᷊ahitene Takụ ipato kere imang sarang marěngụ-děngụ, batụu i sie kai apạe matoghasẹ̌ mẹ̌tahutěndạu Iạ Duatane, ringangu kai seng nẹ̌koạ pẹ̌darame waugu rosan tau Israel.”

¹⁴Tau Israel kụ nipate sěngkapate ringangu wawinen tau Midian ene isẹ̌sěbạ si Zimri, anạ i Salu, tuměllangu ghal᷊ipohong balagẹ̌ sěmbaụ bọu hěnton Simeon.

¹⁵Bawine ene isẹ̌sěbạ si Kozbi; i sie kai anạ i Zur, sěngkatau těmbonang u ghal᷊ipoho su Midian.

¹⁶MAWU e něngonggọu tita ini si Musa,

¹⁷”Dokateko tau Midian, kụ bihuako i sire

¹⁸watụ u kakanoạ i sire ral᷊akisẹ̌ seng nihingidʼi sire waugʼi kamene su Peor, dingangu ual᷊ingu i Kozbi arau sěngkatau tuměllangu ghal᷊ipoho su Midian. I Kozbi ene kai wawine kụ nate nipaten sire su piạ karariadin silakạ ual᷊ingu hal᷊ẹ̌ nariadi su Peor.”