Read Sangir PẸ̌TATIẠ 26 Bible Online

PẸ̌TATIẠ 26 - Sangir bible

PẸ̌TATIẠ 26

¹ Sarangke silakạ ene nal᷊iu, MAWU něhengetang si Musa rẹ̌duang Eleazar ahusʼu Imang i Harun,

²”I kamene harusẹ̌ měndol᷊ẹ̌ kal᷊awọu umatʼu Israel tuhụ balagu sěmbaụ-sěmbaụ. Kal᷊awọu, manga esẹ kụ umbure ruam pul᷊o su taunge taraị kụ makaumal᷊ẹ̌ makoạ sordado ute harusẹ̌ bohekang.”

³I Musa rěduang Eleazar timuhụ tita ene. Irẹ̌dua nẹ̌kui kěbị manga esẹ umbure su wowon duam pul᷊o su taunge ringangu něnampung si sire su wimbaengu Moab, su sěmběkan Sal᷊ụ u Yordan, masandigu soan Yerikho. Kai ini e tau Israel kụ nahunsěbang bọu Misirẹ̌:

⁴

⁵Bọu hěnton Ruben, anạ i Yakub i akang: Hěnton Henokh, Palu,

⁶Hezron dẹ̌duang Karmi.

⁷Manga esẹ su ral᷊ungu manga hěnto ene kal᷊awọe 43.730 su kataune.

⁸Anạ i Palu ute kai i Eliab,

⁹dingangu manga anạ i Eliab ute kai i Nemuel, i Datan dẹ̌duang Abiram. I Datan dẹ̌duang Abiram ene seng nipileng umatẹ̌, kaiso i sire nẹ̌dal᷊aụ u manga tumatol᷊e si Korah waugu lumawang si Musa rẹ̌duang Harun dingangu rumokạ MAWU.

¹⁰Mase ěntana nahěngẹ kụ něnělohe si sire hakịu i sire nate ringangʼi Korah ringangu manga tumatol᷊ene piạ e nạung putung napakawinasang manga esẹ i sire rua hasụ limam pul᷊o su kataune. Hal᷊ẹ̌ ene nakoạ tatahěndung baugu tau Israel.

¹¹Arawe manga anạ i Korah tawe nate ringang.

¹²Bọu hěnton Simeon: Ghal᷊ipohong Nemuel, Yamin, Yakhin,

¹³Zerah ringangu i Saul.

¹⁴Manga esẹ su ral᷊ungu manga ghal᷊ipoho ene kal᷊awọe 22.200 su kataune.

¹⁵Bọu hěntong Gad: Ghal᷊ipohong Zefon, Hagi, Syuni,

¹⁶Ozni, Eri,

¹⁷i Arod dingangi Areli.

¹⁸Manga esẹ su ral᷊ungu manga ghal᷊ipoho ene kal᷊awọe 40.500 su kataune.

¹⁹Bọu hěnton Yehuda: Ghal᷊ipohong Syela, Peres, Zerah, Hezron dingangu i Hamul. Anạ i Yehuda ruang katau i Er rěduang Onan, seng nate su ěntanang Kanaan.

²⁰

²¹

²²Manga esẹ su ral᷊ungu ghal᷊ipoho ene kal᷊awọe 76.500 su kataune.

²³Bọu hěntong Isakar: Ghal᷊ipohong Tola, Pua,

²⁴Yasub dingangu Simron.

²⁵Manga esẹ su ral᷊ungu manga ghal᷊ipoho ene kal᷊awọe 64.300 su kataune.

²⁶Bọu hěnton Zebulon: Ghal᷊ipohong Sered, i Elon dingangu Yahleel.

²⁷Manga esẹ su ral᷊ungu ghal᷊ipoho ene kal᷊awọe 60.500 su kataune.

²⁸Bọu hiten Yusup, kụ piạ anạ esẹ darua: ghal᷊ipohong Manasye, ringangu ghal᷊ipohong Efraim.

²⁹Bọu ghal᷊ipohong Manasye: i Makhir, anạ i Manasye, ute i amang i Gilead, dingangu manga ghal᷊ipoho tuhụ e ini ute kai hěntong Gilead:

³⁰Ghal᷊ipohong Iezer, Helek,

³¹Asriel, Sekhem,

³²Semida ringangu Hefer.

³³Zelafehad anạ i Hefer tawẹ apa anạ e manga esẹ, tumbạeng anạ bawine. Areng i sire ute i Mahla, i Noa, i Hogla, i Milka ringangu i Tirza.

³⁴Manga esẹ su ral᷊ungu manga ghal᷊ipoho ene kal᷊awọe 52.700 su kataune.

³⁵Bọu ghal᷊ipohong Efraim: Balagi Sutelah, Bekher, dingangu i Tahan.

³⁶Balagʼi Eran e kai hěnton Sutelah.

³⁷Manga esẹ su ral᷊ungu manga walagẹ̌ ene kal᷊awọe 32.500 su kataune. Seng ene e manga walagẹ̌ hěnton Yusup.

³⁸Bọu ghal᷊ipohong Benyamin: Balagʼi Bela, Asybel, Ahiram,

³⁹Sefufam dingangu i Hufam.

⁴⁰Balagʼi Ared dẹ̌duang Naaman ute kai hěnton Bela.

⁴¹Manga esẹ su ral᷊ungu manga walagẹ̌ ene, kal᷊awọe 45.600 su kataune.

⁴²Bọu ghal᷊ipohong Dan: Walagʼi Suham.

⁴³Manga esẹ su ral᷊ungu walagẹ̌ ene kal᷊awọe 64.400 su kataune.

⁴⁴Bọu ghal᷊ipohong Asyer: Balagʼi Yimna, Yiswi ringangi Beria.

⁴⁵Balagʼi Heber dingangi Malkiel ute kai hěnton Beria.

⁴⁶I Asyer piạ anạ e wawine sěngkatau arenge i Serah.

⁴⁷Manga esẹ apan su ral᷊ungu manga walagẹ̌ ene kal᷊awọe 53.400 su kataune.

⁴⁸Bọu ghal᷊ipohong Naftali: Balagʼi Yahzeel, Guni,

⁴⁹i Yezer dingangu i Syilem.

⁵⁰Manga esẹ su ral᷊ungu manga walagẹ̌ ene kal᷊awọe 45.400 su kataune.

⁵¹Patikụ manga esẹ u Israel kal᷊awọe 601.730 su kataune.

⁵² MAWU něhengetang si Musa,

⁵³”Pahiạko ěntana ene su manga ghal᷊ipohong Israel tuhụ kasěllahu apang ghal᷊ipoho.

⁵⁴Koạko ene ringangu pěnanawụ lahurị. Baugu ghal᷊ipoho masasěllahẹ̌ e harusẹ̌ pẹ̌gěllịu wahageang e masaria, ringangu waugu ghal᷊ipoho rararodọe, wahageange rararodọ.”

⁵⁵

⁵⁶

⁵⁷Ghal᷊ipohong Lewi kai wọu walagʼi Gerson, Kehat dingangi Merari.

⁵⁸Su ral᷊ungu pal᷊ahiten sire nataho l᷊ai walagʼi Libni, Hebron, Mahli, Musi ringangu walagʼi Korah. I Kehat ute kai i amangʼi Amram.

⁵⁹I Amram nẹ̌kawing dingangi Yokhebed, anạ i Lewi. I Yokhebed ene pinẹ̌hěnding su Misirẹ̌. I Amram dẹ̌duang Yokhebed piạ anạ e esẹ darua: i Harun dẹ̌duang Musa, ringangu anạ e wawine sěngkatau i Miryam.

⁶⁰ I Harun piạ anạ e esẹ ěpạ u katau: i Nadab dingang i Abihu, i Eleazar dingangu i Tamar.

⁶¹ I Nadab dingangi Abihu nate piạ i sire naněmbam putung kụ tawe nẹ̌tatal᷊ahino su kapulung Duata.

⁶²Manga esẹ bọu ghal᷊ipohong Lewi kụ umbure su wowon sěmbul᷊ang, karangẹ e 23.000 su kataune. I sire nirol᷊ẹ̌ nahae wọu wansane, batụu i sire kai tawe nakahombang ěntana pusakạ i sire su Israel.

⁶³Kai ene rol᷊ẹ̌ nikoạ i Musa ringangu Imang i Eleazar mạanung manga walagu Israel piạ i sire nẹ̌koạ pěndarol᷊ẹ̌ su wal᷊ang Moab su sěmběkan Sal᷊ụ u Yordan maraning soan Yerikho.

⁶⁴Bọʼi sire nạung kal᷊imona nirol᷊ẹ̌ i Musa rẹ̌duang Harun su kěhu l᷊inggin Sinai, tawẹ u sarang sěngkatau reng biahẹ̌.

⁶⁵ MAWU seng něhengetang u i sire kěbị sarung mate su kěhu l᷊inggi. Dingangu mambeng kahěngang i sire kěbị mate, tabeạu katewe i Kaleb anạ i Yefune ringangu i Yosua anạ i Nun.