Read Sangir PẸ̌TATIẠ 27 Bible Online

PẸ̌TATIẠ 27 - Sangir bible

PẸ̌TATIẠ 27

¹I Zelafehad piạ anạ e wawine i sire lima, kụ i Mahla, i Noa, i Hogla, i Milka ringangu i Tirza. I amang i Zelafehad ute kai i Hefer, i amang i Hefer ute kai i Gilead. I amang i Gilead ute i Makhir, i amang i Makhir ute i Manasye, dingangu i amang i Manasye ute i Yusup.

²Anạ i Zelafehad limang katau ene tangú tamai nẹ̌těngon Musa, ringangu Imang i Eleazar, ore lai manga pangahạ dingangu kakěpal᷊eweng umatẹ̌ kụ kapẹ̌tẹ̌tampunge su rěduhu tukadu Tentaʼm MAWU. Angkuěng i sire,

³”Amang i kami e mate su kěhu l᷊inggi ringangu i sie tawẹ apa anạ e esẹ. I sie wal᷊inewe tumatol᷊e si Korah, kụ něndongkạ su těngom MAWU. I amang i kami e nate ual᷊ingu rosane hala.

⁴Kaiso unụe arenge harusẹ̌ mailang bọu tau Israel kětạeng ual᷊ingu i sie tawẹ hitene esẹ? Onggoteko i kami ěntana pusakạ sěngkahindọ dingangu manga anạ u sěngkataung amang i kami.”

⁵Mase i Musa nẹ̌habaru pěrkaran sire su MAWU

⁶kụ MAWU e něhengetang si Musa,

⁷ ”Apa niwerang anạ i Zelafehad ene mambeng hinone. Kụ onggotẹ e i sire ěntana pusakạ sěngkahindọ dingangu manga anạ u sěngkataung amang i sire. Budelʼi Zelafehad ene hinong ipakailasẹ̌ su manga anạ i sire wawine.

⁸Habareko su tau Israel u kereu piạ sěngkatau esẹ nate kụ tawẹ anạ e esẹ, tangú ěntana pusakạ e hinon ighěllị su anạ e wawine.

⁹Kereu i sie tawẹ apa anạ e wawine, ěntana pusakạ ene pakailasẹ̌ su tuarine esẹ.

¹⁰Kereu i sie tawẹ tuarine esẹ, ěntana ene waugu tuaring amange.

¹¹Kereu i sie tawẹ tuarine esẹ, ringangu tawẹ apa lai tuaring amange, ute ěntana ene makoạ tataghuanengu anạ u sěngkatau karaniange wọu pamiline.” Atorang ene hinong tuhukangu tau Israel tabidạu tiahan tita kụ niorong MAWU wọʼi Musa.

¹² MAWU e něhengetang si Musa, ”Sakako sarang Bul᷊udu Abarim, dingangu wọu ene tinganeko wanua kụ sarung Takụ ionggọ su tau Israel.

¹³Bọuten timingang, i kau sarung mate kere tuhangu i Harun,

¹⁴batụu su Kěhu L᷊inggin Zin i rua seng limawang tita-Ku. Piạ nạung su Meriba kal᷊awọu kawanua němpẹ̌simbulung su těngo-Ku, i kamene mělahẹu kawasa-Ku su těngon sire ual᷊ingu piạ akẹ ene.” (Hal᷊ẹ̌ ene nariadi simbul᷊u akẹ u Meriba su Kades, su Kěhu L᷊inggin Zin.)

¹⁵Bọu e i Musa nẹ̌kal᷊iomaneng,

¹⁶”O MAWU Ruata, kụ něngonggọu pẹ̌bawiahẹ̌ patikụ apang biahẹ̌, iạ mẹ̌dorong, lahẹko sěngkatau kụ botonge makaahạ bansa ini;

¹⁷ sěngkatau kụ botonge makoạ mol᷊ensekẹ su tempong i sire mẹ̌sekẹ. Abe wala umatʼU ini kere ghapaěngu domba kụ tawẹ apa měngangahạ e.”

¹⁸ Angkuěngu MAWU si Musa, ”Kuieko i Yosua anạ i Nun. I sie kai sěngkatau pelesa. Lěngkangko takiahu su wowon těmbọ e.

¹⁹Oroiko i sie pararisị su těngong Imang i Eleazar dingangu kal᷊awọu umatẹ̌. Su těngong sire kěbị i kau harusẹ̌ pěhabarẹ̌ u i Yosua kai piněngaweng si kau.

²⁰Sarakangke kěbị si sie sěmbahageang bọu paparentaěngu, tadeạu umatʼu Israel tumuhụ si sie.

²¹ I Yosua harusẹ̌ mẹ̌dorong tatumbal᷊ung bọu Imang i Eleazar, dingangu i Eleazar harusẹ̌ makiwal᷊ong kapulu-Ku ual᷊ingu pẹ̌papakẹ u Urim dingangu Tumim.[6] Ual᷊ingu kakakoạ kerene tangú i Eleazar něngahạ i Yosua ringangu kal᷊awọu tau Israel su ral᷊ungu patikụ munara kụ tẹ̌tatěngoěng i sire.”

²²I Musa měkẹ̌koạewe kere niorong MAWU e si sie. I sie něndolohʼi Yosua pạdarisị su těngong Imang i Eleazar dingangu patikụ umatẹ̌.

²³ Bọu e i sie něměllọu l᷊imane su wowong těmbọʼi Yosua ringangu něhabarẹ̌ u i Yosua e kai laaweng si sie, kerẹewe seng niwerang MAWU e si sie.