Read Sangir PẸ̌TATIẠ 28 Bible Online

PẸ̌TATIẠ 28 - Sangir bible

PẸ̌TATIẠ 28

¹MAWU e něngoro si Musa

²pělẹ̌habarẹ̌ su tau Israel u i sire harusẹ̌ pěnẹ̌naung pakapia, tadeạu suapạewen tempo kụ seng tinantu, ionggọ sasěmba kaěng kụ apạeweng makal᷊ahimpulu naungu MAWU.

³Kai ini e sasěmba kụ hinong isěmba su MAWU: Baugu sasěmba měllo-měllo, anạ u domba esẹ darua umbure pẹ̌sěntaung kụ tawẹ turạ e,

⁴sěmbaụ gunang sasěmba mal᷊ukadẹ̌, arawe sěmbaụewue ute waugu sasěmba wawěllo.

⁵Sěngkahindọ dingangu anạ u domba ene tangú harusẹ̌ lai pěněmbang tapoěng sěngkilo laukangu lanang zaitun kal᷊ěnggihange sěliterẹ̌.

⁶Kai ene sasěmba tẹ̌tutungang kụ tawẹ pontode kụ baugu kahumotongange isěmba su Wul᷊udu Sinai. Dal᷊urune makạl᷊ahimpulu naungu MAWU.

⁷Sěngkahindọ dingangu anạ u domba ene tangú harusẹ̌be lai isěmba akẹ u anggorẹ̌ sěliterẹ̌ kụ sěbohẹ̌ su wowong pananěmbaěng.

⁸Anạ u domba waugu isěmba wawěllo harusẹ̌ ionggọ dingangu kakakoạ e mẹ̌sul᷊ungu kere sasěmba mal᷊ukadẹ̌, piạko l᷊ai akẹ u anggorẹ̌. Dal᷊urung sasěmba tinongkạ ene makal᷊ahimpulu naungu MAWU.

⁹ Su ěllong Sabatẹ̌ harusẹ̌ isěmba anạ u domba esẹ duam baụ umbure sěntaung tawẹ turạ e tapoěng duang kilo laukangu lanan zaitun baugu sasěmba sẹ̌sadiang dingangu gaghěllị akẹ u anggorẹ̌.

¹⁰Sasěmba tinongkạ ene harusẹ̌ isěmba apang ěllon Sabatẹ̌ kere tatamba sasěmba ěllo-ěllo sěngkahindọ dingangu sasěmba akẹ u anggore.

¹¹Su panětakengu apam bul᷊ang harusẹ̌ isěmba su MAWU sasěmba tinongkạ sapi esẹ kawuhuang darua ringangu domba esẹ sěmbaụ; anạ u domba esẹ umbure pẹ̌sěntaung pitum baụ kụ tawẹ turạ e.

¹²Kere sasěmba kụ sẹ̌sadiaěng harusẹ̌ paněmban tapoěng kụ laukangu lanan zaitun; tapoěng těllung kilo waugu apan sapi esẹ pẹ̌sěmbaụ; tapoěng duang kilo waugu domba esẹ,

¹³dingangu tapoěng pẹ̌sěngkilo waugu apang anạ u domba esẹ pẹ̌sěmbaụ. Sasěmba tinongkạ ene al᷊ingkai sasěmba kaěng, dingangu samatang tumbạu mapakạl᷊uasu naungu MAWU.

¹⁴Ipěndingang sasěmba tinongkạ ene harusẹ̌be lai paněmbang akẹ u anggorẹ̌, pẹ̌tahạ dua literẹ̌ baugu apan sapi esẹ sěmbaụ, sěliterẹ̌ dingangu mal᷊oara waugu domba esẹ, dingangu sěliterẹ̌ baugu apang anạ u domba sěmbaụ. Kai ene atorangu hal᷊ẹ̌ u sasěmba tinongkạ kụ harusẹ̌ isěmba su apang tanggalẹ̌ humotong apam bul᷊ang kanandung taung.

¹⁵Nakoạ kere tatamba su sasěmba tinongkạ měllo-měllo ringangu akẹ u anggore, i kamene harusẹ̌be lai paněmbang u kambing esẹ sěmbaụ baugu sasěmbang ampungu rosa.

¹⁶ Su tanggalẹ̌ kapul᷊o ěpạ e wul᷊ang humotong, ute kai ěllong Paskah baugu MAWU.

¹⁷Su ěllo tuhụ e, tanggalẹ̌ kapul᷊o l᷊imane, nanětạ e Pěmamantugu Borotẹ̌ Tawẹ Kabọ e, ringangu karěngụeweng pitu ěllo, i kamene tawe wotonge kumaěng borotẹ̌ nikoạ piạ kabọe.

¹⁸Su ěllo humotong pěmamantugẹ̌ ene i kamene harusẹ̌ pẹ̌dal᷊ahintau waugu mẹ̌kal᷊iomaneng, dingangu tawe wotonge mẹ̌koạ hal᷊ẹ̌ mawěhạ.

¹⁹Sěmbako su MAWU sasěmba tinongkạ kụ kawe sapi esẹ kawuhuang darua, domba esẹ sěmbaụ, dingangu anạ u domba esẹ pitum baụ umbure sěntaung, sěmbaụ-sěmbaụ tawẹ turạ e.

²⁰Gěllịko sasěmba kụ hinong harusẹ̌ sadiaěng, kere tapoěng laukangu lanang zaitun: tapoěng pẹ̌tahạ těllung kilo waugu apan sapi esẹ sěmbaụ, duang kilo waugu domba esẹ,

²¹dingangu pẹ̌sěngkilo waugu apang anạ u domba esẹ.

²²Sěmbako l᷊ai kambing esẹ sěmbaụ baugu kal᷊aampungu rosa. Ringangu kakakoạ kerene tangú i kamene mẹ̌kẹ̌koạ tiahang kal᷊aampungu rosang umatẹ̌.

²³Kal᷊awọu sasěmba ene nakoạ kere tatimun sasěmba tinongkạ kere tiasa mal᷊ukadẹ̌.

²⁴Dingangu kakakoạ e kerene lai i kamene harusẹ̌ paněmba su MAWU sasěmba tinongkạ karěngụewem pitu ěllo. Sasěmba ene nakoạ kere tatimuʼn sasěmba tětongkateng měllo-měllo ringangu sasěmba akẹ u anggorẹ̌ e. Dal᷊urung sasěmba ene makạl᷊ahimpulu naungu MAWU.

²⁵ Su ěllo kapitune i kamene harusẹ̌ mẹ̌dal᷊ahintaung hal᷊ẹ̌ u pẹ̌kakal᷊iomaneng dingangu kumbahang měngkai mẹ̌koạ hal᷊ẹ̌ mawawěhạ.

²⁶ Su ěllo humotong sal᷊iwangu Pěmaměnsạ; ěllo masěllahẹ̌ nal᷊iun pitung kamisa, su tempong i kamene naněmbang gandung buhu su MAWU, i kamene harusẹ̌ pẹ̌dal᷊ahintaung pẹ̌kakal᷊iomaneng, dingangu kumbahang mẹ̌koạ hal᷊ẹ̌ mawawěhạ.

²⁷Paněmbangkong sasěmba tinongkạ su MAWU kere sapi esẹ duam baụ, domba esẹ kawuhuang sěmbaụ dingangu anạ u domba esẹ pitum baụ umbure sěntaung tawẹ turạ e. Dal᷊urung sasěmba tinongkạ ene makạl᷊ahimpulu naungu MAWU.

²⁸Paněmbangkong sasěmba sẹ̌sadiaěng kere tundune tapoěng kẹ̌kaugangu lanang zaitun; těllung kilo baugu apang sapi esẹ sěmbaụ, duang kilo waugu domba esẹ,

²⁹dingangu sěngkilo waugu anạ u domba sěmbaụ.

³⁰Paněmbangkon lai kambing esẹ sěmbaụ baugu sasaěmbang kal᷊aampungu rosa. Dingangu kakakoạ kerene tangú i kamene mẹ̌kẹ̌koạ tundung pěndarědasẹ̌ dosang umatẹ̌.

³¹Kal᷊awọu sasěmba ene ringangu sasěmba anggore nakoạ kere tatimu su sasěmba tinongkạ měllo-měllo ringangu sasěmba sẹ̌sadiang.