Read Sangir PẸ̌TATIẠ 29 Bible Online

PẸ̌TATIẠ 29 - Sangir bible

PẸ̌TATIẠ 29

¹Su tanggalẹ̌ humotong bul᷊ang kapitune i kamene harusẹ̌ pẹ̌dal᷊ahintaung koạ u pẹ̌kakal᷊iomaneng, dingangu kumbahang mẹ̌koạ munara mawawěhạ. Su ěllo ene manga slompretẹ̌ harusẹ̌ ipahěte.

²Sěmbako su MAWU sasěmba tinongkạ sapi esẹ kawuhuang, domba esẹ sěmbaụ, dingangu anạ u domba esẹ pitum baụ umbure sěntaung, kụ sěmbaụ-sěmbaụ tawẹ turạ e. Dal᷊urung sasěmba ene makạl᷊ahimpulu naungu MAWU.

³Sěmbako l᷊ai sasěmba kụ hinong pakisadia, tapoěng ikaugu lanang zaitun: těllung kilo su sapi esẹ, duang kilo waugu domba esẹ,

⁴dingangu sěngkilo waugu apang anạ u domba esẹ.

⁵Sěmbako l᷊ai kambing esẹ sěmbaụ baugu sasěmbang ampungu rosa. Kụ ual᷊ingu kakakoạ kerene tangú i kamene mẹ̌kẹ̌koạ tundung pěndarědasẹ̌ dosang umatẹ̌.

⁶Manga sasěmba tamai ene tangú tabidạu tatimu sasěmba tinongkạ kụ nisěmba sěngkasěmba ringangu sasěmba sẹ̌sadiaěnge su tanggalẹ̌ humotong apam bul᷊ang. Kerene lai tabidạu tatamban sasěmba tinongkạ měllo-měllo kụ isěmba sěngkasěmba ringangu sasěmba sẹ̌sadiaěng dingangu sasěmba akẹ u anggorẹ̌ e. Dal᷊urung sasěmba tinongkạ ene tangú makạl᷊ahimpulu naungu MAWU.

⁷ Su tanggalẹ̌ kapul᷊one wul᷊ang kapitune i kamene harusẹ̌ pẹ̌dal᷊ahintau pẹ̌kakal᷊iomaneng. Su ěllo ene i kamene harusẹ̌ pẹ̌puhědang dingangu kumbahang měmunara.

⁸Sěmbako sasěmba sapi esẹ kawuhuang sěmbaụ su MAWU, domba esẹ sěmbaụ dingangu anạ u domba esẹ umbure pẹ̌sěntaung kal᷊awọe pitum baụ kụ tawẹ turạ e. Dal᷊urung sasěmba ene makạl᷊ahimpulu naungu MAWU.

⁹Sěmbako sasěmba kụ hinong pakisadia tapoěng ikaugu lanang zaitun: těllung kilo waugu sapi esẹ, duang kilo waugu domba esẹ,

¹⁰dingangu sěngkilo waugu apang anạ u domba.

¹¹Sěmbako l᷊ai kambing esẹ sěmbaụ baugu tundung pěngangampungu rosa waugu umatẹ̌, sul᷊iung sasěmbang kal᷊aampungu rosa ringangu sasěmba tinongkạ měllo-měllo, dingangu sẹ̌sadiang dingangu sasěmba akẹ u anggore kụ i sěmba su ěllo ene.

¹² Su tanggalẹ̌ kapul᷊o l᷊imane su wul᷊ang kapitune i kamene harusẹ̌ pẹ̌dal᷊ahintau waugu pẹ̌kakal᷊iomaneng, dingangu kumbahang měhal᷊ẹ̌ masasěgadẹ̌. Karěngụ u pitu ěllo i kamene harusẹ̌ pẹ̌koạ pěmamantugẹ̌ baugu měngadatẹ̌ MAWU.

¹³Su ěllo humotong paněmbangkong sasěmba tinongkạ su MAWU kere sapi esẹ kawuhuang mapul᷊o těllu su waụ e, domba esẹ kawuhuang darua, dingangu anạ u domba esẹ umbure pẹ̌sěntaung mapul᷊o ěpạ su waụ e kụ tawẹ turạ e. Dal᷊urun sasěmba ene makạl᷊uasẹ̌ naungu MAWU.

¹⁴Pěngonggọko l᷊ai sasěmba sẹ̌sadiaěng kụ harusẹ̌ tapoěng kaugangu lanan zaitun pẹ̌tahạ: těllung kilo baugu sapi esẹ sěmbaụ, duang kilo waugu domba esẹ sěmbaụ,

¹⁵dingangu pẹ̌sěngkilo waugu anạ u domba sěmbaụ. Sěngkatakidẹ̌ dingangu sasěmba sẹ̌sadiaěng harusẹ̌be lai paněmbang akẹ u anggorẹ̌ gẹ̌gausang.

¹⁶Sul᷊iung ene paněmbangko l᷊ai kambing esẹ sěmbaụ baugu sasěmbang ampungu rosa. Sasěmba ene tabidạu tatimu sasěmba tinongkạ měllo-měllo daringang sasěmba sẹ̌sadiaěng dingangu sasěmba akẹ u anggore.

¹⁷Su ěllo karuane paněmbangkon sapi esẹ kawuhuang mapul᷊o dua su waụ e, domba esẹ duam baụ, dingangu anạ u domba esẹ umbure pẹ̌sěntaung mapul᷊o ěpạ su waụ e, kụ tawẹ manga turạ e sěmbaụ-sěmbaụ.

¹⁸Paněmbako sěngkasěmba ringangu ene kěbị sasěmba wal᷊ine kerẹewe seng nighausang baugu ěllo humotong.

²⁰Su ěllo katěllune paněmbako sapi esẹ kawuhuang mapul᷊o ěsa su waụ e, domba esẹ duam baụ, dingangu anạ u domba esẹ umbure pẹ̌sěntaung mapul᷊o ěpạ su waụ e, kụ sěmbaụ-sěmbaụ e tawẹ turạ e.

²¹Sěmbako sěngkasěmba ringangu ene kal᷊awọu sasěmba wal᷊ine kere ghẹ̌gausang su ěllo humotong.

²³Su ěllo kaěpạ e paněmbangkon sapi esẹ kawuhuang mapul᷊om baụ, domba esẹ duam baụ, dingangu anạ u domba esẹ umbure pẹ̌sěntaung mapul᷊o ěpạ su waụ e, kụ sěmbaụ-sěmbaụ tawẹ turạ e.

²⁴Sěngkahindọ dingangu ene sěmbako l᷊ai kěbị sasěmba wal᷊ine kerẹewe ghẹ̌gausang su ěllo humotong.

²⁶Su ěllo kal᷊imane sěmbako sapi esẹ kawuhuang siom baụ, dingangu domba esẹ duaʼm baụ, dingangu anạ u domba esẹ umbure pẹ̌sěntaung mapul᷊o ěpạ su waụ e sěmbaụ-sěmbaụ tawẹ turạ e.

²⁷Sěngkahindọ dingangu ene sěmbako l᷊ai kal᷊awọu sasěmba wal᷊ine kere nạung nighausang su ěllo humotong.

²⁹Su ěllo kaěnnunge sěmbako sapi esẹ kawuhuang ual᷊ung baụ, domba esẹ duaʼm baụ, anạ u domba esẹ pẹ̌sěntaung umbure, mapul᷊o ěpạ su waụ e kụ sěmbaụ-sěmbaụ tawẹ turạ e.

³⁰Sěngkahindọ dingangu ene sěmbako l᷊ai kal᷊awọu sasěmba wal᷊ine kere nạung gẹ̌gausang su ěllo humotong.

³²Su ěllo kapitune sěmbako sapi esẹ kawuhuang pituʼm baụ, domba esẹ duaʼm baụ, anạ u domba esẹ umbure pẹ̌sěntaung mapul᷊o ěpạ su waụ e kụ tawẹ turạ e.

³³Sěngkahindọ dingangu ene tangú sěmbako l᷊ai kal᷊awọu sasěmba wal᷊ine kere ghẹ̌gausang su ěllo humotong.

³⁵Su ěllo kaual᷊une i kamene harusẹ̌ pẹ̌dal᷊ahintaung pẹ̌kakal᷊iomaneng dingangu tawe wotonge mẹ̌koạ hal᷊ẹ̌ mawěhạ.

³⁶Sěmbako su MAWU sasěmba tinongkạ sapi esẹ kawuhuang sěmbaụ, domba esẹ sěmbaụ, dingangu anạ u domba esẹ umbure pẹ̌sěntaung pituʼm baụ kụ tawẹ turạ e. Dal᷊urun sasěmba ene makạl᷊uasẹ̌ naungu MAWU.

³⁷Sěngkahindọ dingangu ene sěmbako l᷊ai kal᷊awọu sasěmba wal᷊ine kere ghẹ̌gausang su ěllo humotong.

³⁹Kai ene kal᷊awọu tiahan sasěmba tinongkạ, sasěmba sẹ̌sadiang, sasěmba akẹ u anggorẹ̌, ore lai sasěmbang pẹ̌darame kụ hinong isěmbang kamene su MAWU, su kal᷊awọu pěmamantugʼi kamene kụ seng nitantu. Kal᷊awọu sasěmba ene nakoạ kere tatimu kal᷊awọu sasěmba kụ nisěmbang kamene pěmaehẹ̌ diandi arau sasěmba ringangu naung mal᷊uasẹ̌.

⁴⁰I Musa něhabarẹ̌ su tau Israel kal᷊awọu sabarang kụ niorong MAWU si sie.