Read Sangir PẸ̌TATIẠ 3 Bible Online

PẸ̌TATIẠ 3 - Sangir bible

PẸ̌TATIẠ 3

¹Seng ini e walagʼi Harun dẹ̌duang Musa su tempong MAWU nẹ̌bisara si Musa su wowom Bul᷊udu Sinai.

² I Harun piạ anạ e manga esẹ ěpạ u katau: i Nadab anạ e i akang, bọu ene i Abihu, i Eleazar dingangu Itamar.

³I sire nilanisang nakoạ imang dingangu pẹ̌kakoạ hal᷊ẹ̌ u pamaměmbing lana su pusigẹ̌.

⁴ Arawe i Nadab dingang i Abihu nate su wanua l᷊inggin Sinai, su tempon sire nẹ̌těngoʼm MAWU ringangkewen putung kụ ilẹ̌larang. I rẹ̌dua tawẹ anạ i rẹ̌dua. Kụ karěngụeweng i Harun deng bědang biahẹ̌, i Eleazar dingangu Itamar němpẹ̌munara lawọ imang.

⁵MAWU e něhengetang si Musa,

⁶”Oroko hěnton Lewi aparěnta pẹ̌těngo, ringangu těbọko i sire apakakoạ mẹ̌tatangkiang si Harun.

⁷I sire pěmunara su Tenta-Ku dingangu harusẹ̌ pẹ̌tangkiang manga imang ore lai kal᷊awọu umatẹ̌ dingangu munaran sire su Tenta-Ku ene.

⁸Hal᷊ẹ̌ i sire ute pẹ̌padul᷊i kal᷊awọu apal᷊iwụ u Tenta-Ku ringangu pẹ̌koạ munara su Tenta-Ku ene kere apěngaweng tau Israel.

⁹Bọu tau Israel, kětạeng hěnton Lewi Takụ nioro nakoạ mẹ̌tatangkiang tatapẹ̌ baugʼi Harun dingangu hitene.

¹⁰Arawe i Harun dingangu manga anạ e harusẹ̌ ihengkẹu baugu mẹ̌koạ munarang imang su l᷊ikudʼi sire, walạewe měnsang i sai kụ měnal᷊ukạ mẹ̌koạ hal᷊ẹ̌ ene tangu harusẹ̌ ihukung pakapate.”

¹¹MAWU něhengetang si Musa,

¹² ”Orasẹ̌ ini e taumatan Lewi Takụ ipile makoạ tataghuaneng-Ku. Piạ e nạung Iạ němate kal᷊awọu anạu tau Misirẹ̌ i akang, Takụ itani waugu Iạ kal᷊awọu manga rariọ esẹ u tau Israel kaiakanenge dingangu kal᷊awọu binatang i sire humotong piněhěnding. Kěbị ene ute kai tataghuaneng-Ku. Kere laaweng manga anạ u tau Israel esẹ laiakange, Iạ měngal᷊ạ tau Lewi e waugu Iạ; i sire sarung makoạ tataghuaneng-Ku. Seng Iạ e MAWU.”

¹³

¹⁴Su wanua l᷊inggin Sinai MAWU e něngoro si Musa,

¹⁵pẹ̌koạko rol᷊ẹ̌ u tau Lewi tuhụ gal᷊ipoho ringangu walagu sěmbaụ-sěmbaụ; apang manga rariọ esẹ kụ umbure sěmbul᷊ang taraị harusẹ̌ bohekang arenge.

¹⁶Mase i Musa něndal᷊engu parentam MAWU ene.

¹⁷I Lewi piạ anạ e esẹ tatěllu: i Gerson, i Kehat, dingangu i Merari. I sire ute kai i upungu manga ghal᷊ipoho kụ nisěbạ tuhụewe areng i sire. I Gerson piạ anạ e esẹ darua: i Libni ringangʼi Simei. I Kehat piạ anạ e esẹ ěpạ: i Amram, i Yizhar, i Hebron, i Uzielẹ̌. I Merari piạ anạ e esẹ darua: i Mahli rěduang Musi. I sire ene ute kai i upungu manga walagẹ̌ kụ nisěbạ tuhụewe areng i sire.

¹⁸

¹⁹

²⁰

²¹Gal᷊ipohong Gerson ute kai walagʼi Libni rěduang walagʼi Simei.

²²Kal᷊awọu manga esẹ gal᷊ipohong Gerson kụ umure sěmbul᷊ang taraị kạbawohẹ ute pitu hiwu lima hasụ su kataune.

²³I Elyasap anạ i Lael nakoạ tuměllangu ghal᷊ipoho ene. Su ral᷊ungu pẹ̌darasengangu tau Israel, gal᷊ipoho ene něngal᷊ạ tampạ su sěmběkang bahẹ su l᷊ikudʼu Tentaʼm MAWU.

²⁴

²⁵Su ral᷊ungu měngurusẹ̌ Tentaʼm MAWU, i sire masasingkạ u Tenta ringangu tatakạ e, hekạ su tukadẹ̌ sasuěkang,

²⁶hekạ u rělahẹ̌ mạngělikụ Tenta ringangu pananěmbaěng, dingangu ral᷊ansen tukadu rělahe ene. I sire masasingkạ u kal᷊awọu munara kụ piạ kal᷊ahěmpukange ringangu apal᷊iwụ ene.

²⁷Gal᷊ipohong Kehat ute kai wọu walagʼi Amram, i Yizhar, i Hebron dingangʼi Uziel.

²⁸Manga esẹ kụ umbure sěmbul᷊ang taraị bọu gal᷊ipoho ene kěbị kal᷊awọe 8.600 su kataune. I sire piạ hal᷊ẹ̌ e měngurusẹ̌ manga apal᷊iwụ su Tentaʼm MAWU.

²⁹I Elisafan anạ i Uziel naněllang gal᷊ipoho ene. Su ral᷊ungu pẹ̌darasengang, gal᷊ipoho ene něngal᷊ạ tampạ e su sěmběkan timuhẹ̌ bọu Tentaʼm MAWU.

³⁰

³¹I sire kai masasingkạ u Petiʼm Pẹ̌dariandi, meda, laedu sol᷊o, mangạewe pananěmbaěng, apal᷊iwụ pẹ̌paketangu manga imang su Huange Susi, ringangu ral᷊anse kụ naměta Huang Susi. I sire kai masasingkạ u munara kụ piạ kal᷊ahěmpukange ringangu manga apal᷊iwụ ene.

³²Těmbonangu hěnton Lewi ute kai i Eleazar, anạ i Harun. I sie měnanahimata apan taumata kụ měmpẹ̌munara su Huange Susi.

³³Gal᷊ipohong Merari ute kai wọu walagʼi Mahli ringangu walagʼi Musi.

³⁴Manga rariọ esẹ umbure sěmbul᷊ang taraị bọu ghal᷊ipoho ene, kěbị e kal᷊awọe tangu 6.200 su kataune.

³⁵I Zuriel anạ i Abihail naněllang gal᷊ipoho ene. Su ral᷊ungu pẹ̌darasengang, gal᷊ipoho ene něngal᷊ạ tampạ su sěmběkan sawěnahẹ̌ bọu Tentaʼm MAWU.

³⁶I sire kai masasingkạ u kakakoạ u Tenta ene, manga balake, rihine, ěnsal᷊ị e ringangu kal᷊awọu apal᷊iwụ ore kal᷊awọu munara kụ piạ kal᷊ahěmpukange ringangu manga apal᷊iwụ ene.

³⁷Kerene lai waugu manga rihine, laěmpahe, ringangu manga pasạ arau kal᷊awọu tal᷊i waugu rělahẹ̌ watuhu l᷊ikude.

³⁸Su ral᷊ungu pẹ̌darasengang i Musa rẹ̌duang Harun dingangu manga anạ e harusẹ̌ měngal᷊ạ tampạ su těngon Tentaʼm MAWU watuhu sěmběkan daki. I sire masasingkạ u pẹ̌kakoạ u pẹ̌kakal᷊iomaneng baugu kawanuang Israel su Huange Susi. Sul᷊iun sire, walạewe i sai kụ mẹ̌tawakal᷊i mẹ̌koạ hal᷊ẹ̌ ene tangú hinong ihukungu papate.

³⁹Kal᷊awọu manga esẹ bọu hěnton Lewi umbure sěmbul᷊ang taraị kụ nirol᷊ẹ̌ i Musa tuhụ gal᷊ipohone sěmbaụ-sěmbaụ e ual᷊ingu laorom MAWU tangú kěbị kal᷊awọe 22.000 su kataune.

⁴⁰MAWU e něhengetang si Musa, ”Kal᷊awọu manga anạu tau Israel esẹ laiakang e kai tataghuaneng-Ku. Bohẹko areng i sire apang umbure sěmbul᷊ang taraị. Arawe kere laaweng si sire, Iạ mělahẹ u patikụ taumatan Lewi e makoạ tataghuaneng-Ku. Seng Iạ e MAWU! Dingangu binatang tau Lewi e mal᷊aing Takụ pělahekangu makoạ měngangaweng patikụ binatang kụ kakal᷊imonaěnge ipěhěnding sutal᷊oarang binatangu tau Israel.”

⁴¹

⁴²I Musa mẹ̌kẹ̌koạ apang kụ ilẹ̌orong MAWU; i sie měmẹ̌mohẹ kěbị arengu manga rariọ esẹ iakang,

⁴³umbure sěmbul᷊ang taraị. I sire ene kěbị kal᷊awọe 22.273 su kataune.

⁴⁴Bọu e MAWU něhengetang si Musa,

⁴⁵”Haeko taumatan Lewi e waugu Iạ kere laaweng kěbị anạ u tau Israel manga esẹ laiakang; kerene lai binatang u tau Lewi kere laaweng binatang u tau Israel.

⁴⁶Ual᷊ingu manga anạ u tau Israel esẹ i akang kai 273 su kataune limembong kal᷊awọe wọu kal᷊awọu tau Lewi e, tangú apang lembone ene harusẹ̌be itubusʼi kamene.

⁴⁷Baugu apang anạ i kamene harusẹ̌ měmaehu roitẹ̌ sal᷊aka limang kal᷊ěpa tuhụewe arěga su Tenta-Ku;

⁴⁸gěllịko roitẹ̌ ene si Harun, dingangu manga anạ e.”

⁴⁹I Musa něndal᷊engu parentan MAWU ene.

⁵⁰I sie něngal᷊ạ doitẹ̌ sal᷊aka 1.365 sukal᷊ěpane,

⁵¹ringangu něnarakang si Harun dingangu manga anạ e.