Read Sangir PẸ̌TATIẠ 32 Bible Online

PẸ̌TATIẠ 32 - Sangir bible

PẸ̌TATIẠ 32

¹Manga ghal᷊ipohon Ruben dẹ̌duang Gad piạ binatang e mal᷊awọ-l᷊awọ. Ene i rẹ̌dua nakasilo u kai enẹ e mapia mạengu ěntanang Yaezer dingangu Gilead pěhikinang binatang,

²kụ natamaị e i rẹ̌dua nẹ̌tengon Musa, Imang i Eleazar, dingangu pangahạ e lai wal᷊ine wọu Israelẹ̌. Angkuěng i sire,

³”Ěntanang manga soang Atarot, Dibon, Yaezer, Nimra, Hesybon, Eleale, Sebam, Nebo ringangu Beon kụ seng nikaianengu Israel dingangu laontol᷊u MAWU, ute mapia pěhikinang binatang. Dingangu ual᷊ingu binatang i kami kai mal᷊awọ-l᷊awọ,

⁵i kami mělẹ̌harapẹ̌ u mal᷊owọko ěntana ini e reng ionggọ si kami makoạ tataghuaneng i kami. Kumbahangbe měndolohʼi kami apěngal᷊ing sarang sěmběkan Sal᷊ụ u Yordan.”

⁶Angkuěng i Musa, ”Kawe unụe i kamene mapulu matanạ sini, batụu i sire apam bansa sěmbaụ dingang i kamene kawe němpẹ̌tamai nẹ̌sekẹ?

⁷Unụe i kamene mapulu mapakariadin tau Israel matakụ lumiu Sal᷊ụ u Yordan kụ makasuẹ̌ su wanua kụ nionggọ u MAWU e si sire?

⁸ Manga i amang i kamene mal᷊aing němpẹ̌koa kerene, piạ iạ něndolohʼi sire wọu Kades-Barnea baugu apạměpidẹ̌ banua ene.

⁹I sire seng nahumpạu Wal᷊ang Eskol dingangu selain nakasilo ěntana ene. Arawe su tempong i sire nẹ̌bal᷊ị, i sire napakatakụ u tau Israel sumuẹ̌ su ěntana kụ nionggọu MAWU e si sire.

¹⁰ Tangú limangehe MAWU su tempo ene hakịu i Sie něhengetang, ’I sire ene tawẹ satiane si Siạ. Ual᷊ingu ene Iạ mẹ̌salu u wọʼi sire kụ umbure sen duam pul᷊o su taunge taraị su tempong i sire naněntangu Misirẹ̌, tawẹ apa kụ sarung makakasuẹ̌ su wanua kụ Takụ niriandi si Abraham, Ishak dingang i Yakub.’

¹²Kal᷊awọu taumata e kahinoěngu hukumang ene tabeạu katewe i Kaleb anạ i Yefune, tau Kenas, dingangu i Yosua anạ i Nun, ual᷊ingu i rẹ̌dua e těbe satia su MAWU.

¹³MAWU e limangehẹ̌ su tau Israel hakịu i Sie napakawalan sire nipẹ̌palilị su kěhu l᷊inggi ěpạ u pul᷊o su taunge karěngụ e sarang kal᷊awọe apang sěngkahiudẹ̌ kụ seng němpěnggohaeng si Sie seng nasue nate.

¹⁴Dingangu orasẹ̌ ini e, i kamene němpěnggohaeng kere i amang i kamene! I kamene mambeng sěngkamonaěngu taumata warạdosa kụ nakakal᷊angehẹ̌ MAWU e nělibutu kapia su tau Israel.

¹⁵Kereu i kamene mẹ̌bal᷊ị tumal᷊ikudẹ̌ MAWU, tangú patikụ bansa ini sarung iwala-Ne limembong karěngụ e lai su kěhu l᷊inggi, kụ seng i kamene nakawodaị kawawinasa si sire!”

¹⁶Mase taumatan Ruben dẹ̌duang Gad ene rimani si Musa kụ nẹ̌bera, ”Mapiawe i kami měngal᷊imona měmětị manga těndạ meselẹ̌ baugu manga dombang kami, ringangu manga soa piạ bal᷊oarị e waugu anạ dingangu kawing i kami.

¹⁷I kami sarung mẹ̌dariahi lighạ mẹ̌sekẹ sěngkapẹ̌sekẹ dingangu manga anạ u sěngkataung kami. I kami sarung měngahạ u alo ene ringangu mẹ̌bawa si sire sumuẹ̌ su wanua kụ nakoạ tataghuaneng i sire. Těntal᷊ang ene anạ dingangu kawing i kami botonge makapẹ̌tanạ sini, su manga soa piạ bal᷊oarị e, mal᷊ěmpị bọu along kawanuang banua ini.

¹⁸I kami reng tawe mapul᷊ẹ sarang bal᷊eng kami kal᷊imonang kěbị tau Israel managhuang ěntana waugu makoạ tataghuanenge.

¹⁹I kami madiri měnarimạ sarang kadodọ bọu ěntanan sire su sěmběkan Sal᷊ụ u Yordan, batụu kai seng něnarimạ bahageang i kami sini, su sěmběkan daki wọu Sal᷊ụ u Yordan.”

²⁰Angkuěng i Musa, ”Kereu i kamene kahěnga-hěngang mapulu mẹ̌dariahi mẹ̌sekẹ baugu MAWU,

²¹ringangu kěbị sutal᷊oarang kamene kụ makapẹ̌sekẹ lumiu Sal᷊ụ u Yordan, dingangu su al᷊ungu pěngangahạ MAWU něnekehẹ̌ kal᷊awọu rokạ sarang MAWU e makatokol᷊ẹ̌ si sire,

²²hakịu wanua ene mẹ̌suba si Sie, tangú i kamene wotonge mapul᷊ẹ, kụ i kamene mal᷊iwirẹ̌ bọu wawawaěngu su MAWU ringangu waugu manga anạ u sěngkataunu, ringangu MAWU e sarung mẹ̌gěllịu ěntana su sěmběkan daki wọu ini makoạ tataghuanengu.

²³Kaiso pẹ̌tahěndung, kereu i kamene tawe mapakasěhụ u kědong kamene, i kamene nẹ̌dosa su MAWU ringangu sarung ihukung ual᷊ingu rosang kamene ene.

²⁴Dakọko pěndarisị manga soa ringangu manga těndạ u dombang kamene, ringangu abe kiwul᷊ei apan seng nirianding kamene ene!”

²⁵Mase taumatang Gad dingangu taumatang Ruben mẹ̌berau, ”Tuang, i kami sarung mẹ̌koạ apang kụ nioron Tuang.

²⁶Anạ dingangu kawing i kami ringangu sapi papiarang ore lai dombang kami sarung matěntang sini su manga soang Gilead.

²⁷Arawe i kami ini e sadia rumal᷊eng mẹ̌sekẹ su ahạ u MAWU. I kami sarung lumiu Sal᷊ụ u Yordan kụ mẹ̌sekẹ kerẹewe seng niweran Tuang.”

²⁸ Tangú i Musa něngonggọu parenta ini su Imang i Eleazar, i Yosua ringangu pangahạ u Israel,

²⁹”Kereu taumatang Gad dẹ̌duang Ruben tumuhụ titang MAWU kụ lumiu Sal᷊ụ u Yordan baugu mẹ̌sekẹ, dingangu kereu ual᷊ingu laontol᷊i sire i kamene nakapul᷊aho wanua ene, kụ ěntanang Gilead harusẹ̌ ionggọ i kamene si sire kụ makoạ tataghuaneng i sire.

³⁰Kaiso kamagengu i sire tawe lumiu Sal᷊ụ u Yordan baugu mẹ̌sekẹ sěngkapẹ̌sekẹ dingang i kamene, tangú i sire harusẹ̌ manarimạ bahageangu pusakạ banua su Kanaan, mẹ̌sul᷊ung i kamene.”

³¹Angkuěngu taumatang Gad dingangu taumatang Ruben, ”Tuang, i kami sarung mẹ̌koạ apan niorong MAWU.

³²Ual᷊ingu ahạ u MAWU tangú i kami sarung dumakị sarang banuang Kanaan kụ dumal᷊eng mẹ̌sekẹ, kaiso mal᷊owọko ěntana su sěmběkan daki wọu Sal᷊ụ u Yordan ini e těbewe makoạ tataghuaneng i kami.”

³³Mase i Musa něnarakang su ghal᷊ipohong Gad dẹ̌duang Ruben dingangu su mal᷊oara wọu ghal᷊ipohong Manasye kạguwạu wanuang Sihon, datung Amori, dingangu wanuang Og, datung Basan, nasowa kal᷊awọu soa ringangu ěntana mạngělikụ e.

³⁴Ghal᷊ipohong Gad němangung kapia soan Dibon, Atarot, Aroër,

³⁵Atarot-Sofan, Yaezer, Yogbeha,

³⁶Bet-Nimra, dingangu Bet-Haran kere manga soa piạ bal᷊oarị e ringangu kere manga těndạ u domba.

³⁷Ghal᷊ipohong Ruben němangung kapia manga soang Hesybon, Eleale, Kiryataim,

³⁸Nebo, Baal-Meon, dingangu Sebam. Manga soa apang nirarisị i sire kapia e niwal᷊ui arenge.

³⁹Ghal᷊ipohong Makhir, anạ i Manasye, něhěso ěntanang Gilead, bọu e nẹ̌kawasa kụ něnokol᷊ẹ̌ taumatang Amori kụ apan sene.

⁴⁰Ual᷊ingu ene i Musa něgěllịu ěntanang Gilead ene su ghal᷊ipohong Makhir, kụ i sire nẹ̌tanạ sene.

⁴¹I Yair bọu ghal᷊ipohong Manasye něhěso ringangu němul᷊aho soa rarodọ piram baụ, mase nẹ̌sěbạu arenge, ”Manga soang Yair”.

⁴²I Nobah něhěso ringangu němul᷊aho Kenat ringangu manga soane rarodọ mạngělikụ e, bọu e nẹ̌sěbạu arenge Nobah timuhụ arenge hala.